Sport

Nuk ishte vetëm fundi i kontratës si ambasador: Man.United merr masa të reja të ashpra ndaj legjendës Sir Alex Ferguson…

Vendimi i ri i pronarëve të 'Djajve të Kuq' e ndalon ish-trajnerin legjendë të futet edhe në dhomat e zhveshjes së skuadrës

17 Tetor 2024, 10:30 Nga DOSJA

Nuk ishte vetëm fundi i kontratës si ambasador: Man.United merr masa

ANGLI - Disa ditë pas ndërprerjes së kontratës me Sir Alex Ferguson, i cili merrte rreth 2 milionë euro në vit si ambasador i Manchester United, INEOS, pronar i “Djajve të Kuq”, e ndaloi trajnerin historik të futej edhe në dhomat e zhveshjes së klubit.

Ish-trajneri i “Djajve të Kuq” ruan rolin e ambasadorit botëror për klubin; lidhja me klubin vazhdon, por jo si anëtar ekzekutiv i Bordit.

Prishja e lidhjes kontraktuale, pjesë e politikës së shkurtimit të buxhetit që ka ndjekur INEOS, thuhet se u negociua miqësisht midis Ferguson dhe Sir Jim Ratcliffe, CEO i grupit të investimeve që bleu Man.United, por tani ka hyrë në fuqi një rregull i ri që nuk u lejon figurave të mëparshme të vizitojnë kabinat e skuadrës pas ndeshjeve.

Kjo praktikë nuk ndodhi vetëm me Alex Ferguson. Bobby Charlton, për shembull, ishte gjithashtu një prani e rregullt me lojtarët pas ndeshjeve. Pavarësisht kësaj, skocezi, 13 herë fitues i Premierligës dhe që dy herë fitoi Ligën e Kampionëve, sipas shtypit britanik do të vazhdojë të jetë i mirëpritur në Old Trafford, ku zakonisht është i pranishëm për të parë ndeshjet e klubit që ai e drejtoi për 26 sezone.

Duhet mbajtur mend se kur u ndërpre kontrata, Eric Cantona shprehu pakënaqësinë me vendimin, duke thënë se "Ferguson duhet të jetë në gjendje të bëjë çfarë të dojë në klub deri në ditën e vdekjes".

B.T (Dosja.al)