Aktualitet

EMRI/ Ktheu kancelarinë në bazë falsifikimi dokumentesh, Apeli lë në "arrest shtëpie" ekspertin e IT në Gjykatën e Korçës

Prokuroria kishte ankimuar vendimin e Gjykatës së Shkallës së Parë në Korçë që ndryshoi masën për ekspertin e IT nga "arrest në burg" në "arrest shtëpie".

3 Qershor 2024, 18:13 Nga M.B
EMRI/ Ktheu kancelarinë në bazë falsifikimi dokumentesh, Apeli
Mjeti identifikues i falsifikuar


TIRANA- Gjykata e Apelit të Juridiksionit të Përgjithshëm ka lënë në fuqi masën "arrest shtëpie" për ekspertin e IT, Zheni Lilo, i cili kishte kthyer kancelarinë e Gjykatës së Korçës në bazë për falsifikim dokumentesh. Prokuroria kishte ankimuar vendimin e Gjykatës së Shkallës së Parë në Korçë që ndryshoi masën për ekspertin e IT nga "arrest në burg" në "arrest shtëpie".

Për një pasaportë, patentë apo kartë identiteti porositësit i paguanin ekspertit 2400 Euro. Hetimet kishin nisur pasi në rrugë operative u mësua se shtetas të ndryshëm në bashkëpunim me njëri-tjetrin kundrejt pagesës ndihmonin persona të caktuar për kalim të paligjshëm të kufirit nëpërmjet falsifikimit të kartave të identitetetit italiane dhe vendeve të tjera të Europës.

Me anë të këtyre dokumenteve të falsifikuara, porositësit shmangnin kontrollet në vendet e BE-së, duke e bërë më të lehtë transportimin e lëndëve narkotike, që si destinacion final kishin Britaninë e Madhe. E gjithë skema u zbulua nga një agjent i infiltruar i cili hyri në kontakt duke u takuar në Pogradec me 39-vjeçarin për të kërkuar 3 pasaporta italiane.

Agjentët nuk janë mjaftuar vetëm me prodhimin e këtyre tre dokumenteve të falsifikuar, por kanë ndjekur dhe dokumentuar të gjithë itinerarin e lëvizjeve të IT të Gjykatës së Korçës, që çoi më pas edhe arrestimin e Zhenika Lolit me urdhër të Prokurorisë së Tiranës. 39-vjeçari akuzohet se ka ngritur bazën e prodhimit të dokumenteve të falsifikuara dhe ndaj tij pas zbardhjes së audio-përgjimeve dhe pamjeve filmike rëndojnë 3 akuza: ajo për falsifikim të dokumenteve, mashtrim dhe ndihma për kalim të paligjshëm të kufijve. 

Njoftimi i plotë:

Referuar raportimeve të mëparshme në media, Gjykata e Apelit të Juridiksionit të Përgjithshëm, informon sa më poshtë:

Nga ana e Specialistëve të Seksionit për Krimin Ekonomiko - Financiar janë marrë informacione në rrugë operative se shtetas të ndryshëm në bashkëpunim me njëri tjetrin kundrejt pagesës ndihmojnë persona të caktuar për kalim të paligjshëm të kufirit nëpërmjet falsifikimit të kartave të identitetit të shteteve Europiane, i dyshuar për kryerjen e këtyre veprimeve është shtetasi me iniciale Zheni Loli. Personi nën hetim, rezulton i punësuar në Gjykatën e Shkallës së Parë të Juridiksionit të Përgjithshëm Korçë, me detyrë specialist në Zyrën e  Shërbimit Pogradec.

Gjykata e Shkallës së Parë e Juridiksionit të Përgjithshëm Tiranë, ka zhvilluar gjykimin lidhur me marrjen në pyetje për vlerësimin e kushteve dhe kritereve të caktimit të masës së sigurimit “arrest në burg”, për personin nën hetim, shtetasin me iniciale Zheni Loli, i dyshuar për kryerjen e veprave penale të “Falsifikimit të dokumenteve”, “Falsifikimit të letërnjoftimeve, pasaportave ose i vizave” dhe “Falsifikimit të formularëve”, parashikuar nga nenet 186, 189 dhe 190 të Kodit Penal.

Gjykata e Shkallës së Parë të Juridiksionit të Përgjithshëm Tiranë, me vendimin nr. 1310 Akti, datë 19.05.2024, ka vendosur:

-          Ndryshimin e masës se sigurimit "arrest ne burg", e parashikuar nga neni 238 i K.Pr. Penale dhënë ndaj personit nën hetim Zheni Loli, me vendimin nr. 1230 akti, datë 11.05.2024 Gjykatës së Shkallës së Parë të Juridiksionit të Përgjithshëm Tiranë.

-          Caktimin si masë së sigurimit personal ndaj personit nën hetim Zh. L atë të “arrest në shtëpi”, e parashikuar nga neni 237 i K.Pr. Penale.

-          Ngarkohet Policia Gjyqësore për ndjekjen dhe zbatimin e këtij vendimi.

Çështja në apel u shqyrtua mbi bazën e ankimit të bërë nga Prokuroria pranë Gjykata e Shkallës së Parë të Juridiksionit të Përgjithshëm Tiranë, e cila kërkoi prishjen e vendimit të Gjykatës së Rrethit Gjyqësor Tiranë në lidhje me ndryshimin e masës së sigurimit “arrest në burg” dhe caktimin e masës së sigurisë “arrest në shtëpi” ndaj personit nën hetim me iniciale Zh. L dhe pranimin e kërkesës së Prokurorisë për vazhdimin e masës se sigurisë “arrest në burg” ndaj këtyre personave nën hetim sipas kërkesës së Prokurorisë.

Në përfundim të gjykimit, sot më datë 03.06.2024, Gjykata e Apelit të Juridiksionit të Përgjithshëm, e përbërë nga trupi gjykues me Gjyqtare Znj. Edlira Petri vendosi:

-Miratimin e vendimit nr. 1310 akti, datë 19.05.2024 të Gjykatës së Shkallës së Parë të Juridiksionit të Përgjithshëm Tiranë

eksperti i it korce

Sondazh

Poll

MË SHUMË