Bota

Studentët në Nigeri rrëmbehen nga persona të armatosur

Policia në shtetin Kaduna nuk ka komentuar mbi rrëmbimet që dyshohet se ndodhën menjëherë pas mbledhjes së mëngjesit të nxënësve në një shkollë në qytetin Kuriga. Numri i pengjeve mbetet i paqartë.

7 Mars 2024, 21:20 Nga S.N
Studentët në Nigeri rrëmbehen nga persona të armatosur
Foto Ilustrim

NIGERI- Dhjetra studentë u rrëmbyen sot nga persona të armatosur nga një shkollë në Nigerinë veriore , thanë banorët dhe prindërit e fëmijëve të zhdukur, në atë që është rrëmbimi më i madh nga një shkollë që nga viti 2021.

Policia në shtetin Kaduna nuk ka komentuar mbi rrëmbimet që dyshohet se ndodhën menjëherë pas mbledhjes së mëngjesit të nxënësve në një shkollë në qytetin Kuriga. Numri i pengjeve mbetet i paqartë.

“Ndërsa flasim, njerëzit po shkruajnë emrat e fëmijëve të tyre që shkuan sot në shkollë dhe nuk u kthyen. Atëherë do të dimë numrin e saktë të të zhdukurve”, tha Salisu Ahmed Kuriga, tre vëllezërit e motrat më të vegjël të të cilit mungojnë.

Disa prindër thanë se kur personat e armatosur arritën në shkollë, ata filluan të qëllonin në mënyrë sporadike. Më pas morën me vete dhjetëra studentë dhe u zhdukën në xhungël. Në këtë shkollë vijojnë nxënësit e shkollave fillore dhe të mesme .

“Nuk dimë çfarë të bëjmë, presim të shohim se çfarë do të bëjë Zoti. Ata janë fëmijët e vetëm që kam në tokë”, tha Fatima Usman, dy fëmijët e së cilës janë rrëmbyer.

Një prind tjetër, Hassan Abdullahi, tha se rojet lokale të sigurisë u përpoqën të largonin personat e armatosur, por u mposhtën. “Shtatëmbëdhjetë nga studentët e rrëmbyer janë fëmijët e mi. Më vjen keq që qeveria na ka braktisur plotësisht në këtë fushë”, ka shtuar Abdullahi.

Rrëmbimet për shpërblim nga persona të armatosur janë bërë endemike në Nigerinë veriore. Për shkak të kësaj situate, mijëra fëmijë nuk ndjekin shkollën. Rrëmbimi i fundit i madh i studentëve ndodhi në qershor 2021, kur persona të armatosur rrëmbyen 80 fëmijë nga një shkollë në shtetin Kebbi të Nigerisë veriperëndimore.

nigeri rrembim

Sondazh

Poll

MË SHUMË