Bota

“Shumë u traumatizuan, disa nuk u kthyen më”, zbulohen qendrat ruse ku stërviten të huajt që dërgohen në luftë kundër Ukrainës

Ndërsa viktimat ruse në fushën e betejës rriten, Moska ka njoftuar rekrutimin e të huajve në ushtrinë e saj për një pagë prej 2000 dollarësh dhe marrjen e shpejtë të shtetësisë ruse

12 Shkurt 2024, 09:23 Nga M.B
“Shumë u traumatizuan, disa nuk u kthyen më”, zbulohen
Vladimir Putin

RUSIA- Ushtria ruse rekrutoi 15,000 nepalezë për të luftuar kundër Ukrainës. Ndërsa viktimat ruse në fushën e betejës rriten, Moska ka njoftuar rekrutimin e të huajve në ushtrinë e saj për një pagë prej 2000 dollarësh dhe marrjen e shpejtë të shtetësisë ruse. Qeveria nepaleze pretendon se vetëm rreth 200 qytetarë të saj po luftojnë në Ukrainë nga ana ruse, me të paktën 13 të vrarë dhe katër të kapur si robër lufte. Por ligjvënësi nepalez i opozitës dhe ish-ministri i Jashtëm, Bimala Rai Paudyal, tha 14,000 deri në 15,000 nepalezë po luftojnë në Ukrainë, duke përmendur dëshminë e burrave që kthehen nga vija e frontit.

“Shumë u kthyen të traumatizuar. Disa nuk u kthyen më”, shkruan CNN, teksa kanë identifikuat 2 qendra trajnimi në Rusi, ku nepalezët dhe të huajt e tjerë po stërviten përpara se të vendoseshin në vijën e frontit në Ukrainë. Ndërkohë raportohet se Nepali i kërkoi qeverisë ruse të ndalojë rekrutimin e qytetarëve të saj në ushtri në dhjetor pasi të paktën 6 shtetas të saj u konfirmuan të vrarë. Autoritetet më pas zbuluan një rrjet të brendshëm kontrabandë që rekrutonte të rinj si luftëtarë të huaj për ushtrinë ruse. Ushtritë e vetme të huaja që ligji nepalez u lejon qytetarëve të saj të shërbejnë janë ushtritë indiane dhe britanike.

“Unë nuk u bashkova me ushtrinë ruse për kënaqësi. Nuk kisha asnjë mundësi pune në Nepal. Por në retrospektivë, nuk ishte vendimi i duhur. Nuk e kuptuam se do të dërgoheshim në vijën e frontit kaq shpejt dhe sa e tmerrshme do të ishte situata," tha Ramchandra Khadka, nga Nepali, raporton CNN.

Ai mbërriti në Moskë në shtator të vitit të kaluar. Pas vetëm dy javësh stërvitje, ai u dërgua në vijën e frontit në Bakhmut ,një qytet në Ukrainën lindore që pa disa nga luftimet më të rënda.

“Nuk ka asnjë centimetër tokë në Bakhmut që nuk është prekur nga bomba. Të gjitha pemët, shkurret dhe gjelbërimi janë zhdukur të gjitha. Shumica e shtëpive janë shkatërruar. Situata atje është aq e tmerrshme sa të bën të duash të qash,” kujton ai.

Khadka u vendos në Bakhmut dy herë dhe kaloi gjithsej një muaj atje. Gjatë vendosjes së tij të dytë, ai u godit nga një plumb në ijë. Pasi u shpëtua dhe u kthye disa qindra metra larg vijës së frontit, ai u godit nga copëzat e një bombe thërrmuese.

“Ende më dhemb koka kur mendoj për skenat e tmerrshme që pashë në zonën e luftës,” tha ai.

rusia nepal ukraina

Sondazh

Poll

MË SHUMË