Aktualitet

EMRI/ U arrestua për trafikim droge, përjashtohet nga radhët e Policisë Shefi i Kufirit në Korçë 

Dyshohet se droga ishte futur në një bombol gazi dhe ndodhej në garazhin e makinës.

1 Dhjetor 2023, 19:45 Nga I.A
EMRI/ U arrestua për trafikim droge, përjashtohet nga radhët e
Stiljan Pasho

KORÇË- Shefi i Kufirit në Korçë Stiljan Pasho është përjashtuar ditën e sotme nga radhët e policisë. Përjashtimi ka ardhur pasi Pasho akuzohet për trafikim të lëndëve narkotike. Pasho hipi në makinën e Lorenco Likës për të transportuar 26 kg drogë në kufi. 

Dyshohet se droga ishte futur në një bombol gazi dhe ndodhej në garazhin e makinës. Pasho hipi në makinën “Passat” dhe ka kaluar kufirin bashkë me të për tu siguruar që makina të mos kontrollohej. Sapo është siguruar për kalimin e drogës është kthyer sërish mbrapsht në kufirin shqiptar.

Njoftimi i Policisë:

Përjashtohet nga Policia e Shtetit Kryekomisar Stiljan Pasho. Drejtoria e Standardeve Profesionale në Policinë e Shtetit, pas hetimeve paraprake të kryera, i ka propozuar Drejtorit të Përgjithshëm të Policisë së Shtetit, i cili e ka miratuar menjëherë, përjashtimin e punonjësit të Policisë, Kryekomisar Stiljan Pasho, me detyrë Shef i Sektorit të Kufirit, në Drejtorinë Vendore për Kufirin dhe Migracionin Korçë. Përjashtimi i menjëhershëm i tij u bë për shkelje të rëndë disiplinore të rregullores së Policisë së Shtetit, parashikuar nga neni 208 “Rastet e veprimeve korruptive”, pika 3 “Përdor pozitën e tij si punonjës i Policisë, për interesa private për vete ose për të tjerët’”, dhe nga neni 209 “Shkelja e rëndë e atributeve/kompetencave të Policisë”, pika 1 “Pa ndonjë arsye bindëse, nuk i përmbush apo dështon në përmbushjen e detyrave dhe përgjegjësive të caktuara, të cilat kanë shkaktuar pasoja të rënda në kryerjen e detyrave”.

Më datë 30.11.2023, Drejtoria Rajonale e AMP-së Elbasan–Korçë ndaloi punonjësin e Policisë Kryekomisar Stiljan Pasho, në kuadër të një procedimi penal të referuar nga Sektori i AMP-së, Korçë, për veprën “Trafikim i narkotikëve”. Konkretisht, nga hetimet rezulton se Kryekomisar Stiljan Pasho, me veprime konkrete dhe të drejtperdrejta, si dhe duke përdorur detyrën e tij ne DVKM Korçë, në intervale të ndryshme, ka ndihmuar shtetasin L. L., të kalojë kufirin në PKK Kapshticë, pa iu nënshtruar kontrollit kufitar në automjetin e tij, dhe ka urdhëruar dhe vartësit e tij që të mos ushtrojnë kontroll. Policia e Shteti mbetet e vendosur që në bashkëpunim me agjencitë ligjzbatuese dhe me qytetarët, të largojë nga rradhët e saj, cilindo punonjës policie që abuzon me detyrën apo përfshihet në veprimtari kriminale.

stiljan pasho

Sondazh

Poll

MË SHUMË