Sport

Kampionati Evropian Universitar i Futbollit në Tiranë, presidenti Duka përshëndet nisjen: “Sporti krijon ura bashkëpunimi”...

Është zhvilluar ceremonia hapëse e Kampionatit Europian Universitar të Futbollit, që do të zhvillohet në Tiranë e ku marrin pjesë 28 skuadra djem e vajza nga e gjithë Europa, teksa do të marrë pjesë edhe një ekip nga Universiteti “Fan S. Noli” i Korçës.

26 Qershor 2023, 11:20 Nga DOSJA

TIRANE - Federata Shqiptare e Futbollit është partnere në mikpritjen e Kampionatit Europian Universitar të Futbollit, që organizohet nga Federata Evropiane e Sporteve Universitare (EUSA) dhe Federata Shqiptare e Sportit Universitar.

Në ceremoninë hapëse të kampionatit, ishte i pranishëm edhe presidenti i FSHF-së, Armand Duka, ministrja e Arsimit, Sportit dhe Rinisë, Evis Kushi, presidenti i Federatës Evropiane të Sporteve Universitare (EUSA), Adam Rozcek, si edhe personalitete të tjera.

Në fjalën përshëndetëse të mbajtur me këtë rast, presidenti Duka u shpreh i kënaqur që një aktivitet i këtyre përmasave zhvillohet në vendin tonë si edhe vlerësoi mbështetjen e vazhdueshme që Ministria e Arsimit, Rinisë dhe Sportit i jep sportit në përgjithësi dhe futbollit në veçanti.

“Jam vërtetë i emocionuar si rrallëherë tjetër. Kam shumë vite në drejtim të Federatës së Futbollit, kam përjetuar shumë aktivitete. Kur pashë gjithë këta studentë që parakaluan këtu, kur mendova që vijnë nga shumë anë të Europës, më shkuan shumë gjëra nëpër mendje. Dhe për këtë jam shumë i kënaqur që kam mundësinë t’i përshëndes dhe t’i falënderoj të gjithë studentët futbollistë që janë në Tiranë, në Shqipëri, për këtë aktivitet shumë të rëndësishëm.

Përshëndes ministren e Arsimit që është në këtë event dhe që nuk mungon në të gjitha eventet sportive. E falënderoj jo vetëm për pjesëmarrjen, por edhe për mbështetjen e vazhdueshme që i jep sportit në Shqipëri dhe në veçanti atij që është sporti më i bukur, futbolli”, - tha kreu i qeverisë së futbollit, duke ftuar pjesëmarrësit që ta shijojnë sa më shumë këtë eksperiencë, por edhe të kalojnë kohë sa më të bukur në Shqipëri.

Gjatë ceremonisë folën edhe ministrja e Arsimit, Sportit dhe Rinisë, Evis Kushi presidenti i Federatës Evropiane të Sporteve Universitare (EUSA), Adam Rozcek si edhe presidenti i Federatës Shqiptare të Sportit Universitar, Besnik Veliu, të cilët gjithashtu vlerësuan përkrahjen që kanë marrë nga FSHF në organizimin e këtij kampionati dhe eksperiencën e vyer të qeverisë së futbollit shqiptar.

FSHF si partnere e këtij kampionati do të vërë në dispozicion fushat në Shtëpinë e Futbollit dhe në Qendrën e Ekipeve Kombëtare në Kamzës, ku do të zhvillohen ndeshjet si edhe bazë materiale.

Gjithashtu, Federata Shqiptare e Futbollit do të sigurojë arbitra për ndeshjet dhe do të asistojë në organizimin e kampionatit, duke pasur parasysh eksperiencën e madhe ndërkombëtare që stafi FSHF-së ka në zhvillimin e aktiviteteve me pjesëmarrje kaq të madhe.

B.T (Dosja.al)