Sport

VIDEO/ Rrëzimi i frikshëm i atletit spanjol në Europianin e Stambollit, përfundon në spital, viktimë e një traume në kraharor...

I rrëzuar rëndë, pasi ka ngecur në pengesën e fundit të garës së 60 m/p në Kampionatit Europian të sallave të mbyllura, spanjoli Enrique Llopis humbi ndjenjat. Ai vuan nga një traumë në gjoks dhe një tronditje.

6 Mars 2023, 23:45 Nga DOSJA

VIDEO/ Rrëzimi i frikshëm i atletit spanjol në Europianin e

TURQI - Imazhet janë të frikshme! Teksa garonte në finalen e 60 metrave me pengesa të Kampionatit Europian të sallave të mbyllura, të dielën në Stamboll, ku ishte një nga favoritët, atleti spanjol Enrique Llopis u rrëzua keq në tokë, pasi u pengua në pengesën e pestë dhe të fundit.

Ndërsa fituesi, zvicerani Jason Joseph ishte i gëzuar pa masë, i riu spanjol (22 vjeç) qëndroi për minuta të gjata në tokë, i palëvizur, pa ndjenja. Një skenë që futi stadiumin në një heshtje shqetësuese. Atleti iu nënshtrua shpejt ndihmës së parë nga mjekët e garës dhe pëlhurat e gomuara u tërhoqën rreth tij për ta fshehur nga sytë kureshtarë. Më pas ai u transportua në spital ku e kaloi natën nën vëzhgim.

Mjeku Juan Manuel Alonso, i afërt me Federatën Spanjole, bëri të ditur se Llopis vuajti nga dëmtimet në gjoks dhe kafkë, si dhe ka pësuar një tronditje të përgjithshme. “Ekzaminimet e para radiologjike nuk tregojnë dëmtime neurologjike, apo kockore. Ai do të qëndrojë nën vëzhgim gjatë natës si masë paraprake”,- shkroi doktori në Twitter. 

Fjalë qetësuese të konfirmuara më vonë nga José Peiró, trajneri spanjol. “Llopis duket se është mirë. Ai ka pësuar një tronditje, por ka rikthyer shpejt vetëdijen dhe ankohet për dhimbje muskulore, kjo është normale dhe tregon se ai është mirë. E rëndësishme është që ai nuk ka dëmtime serioze”.

Mëngjesin e kësaj të hëne, i riu spanjoll i qetësoi të gjithë duke dërguar një mesazh nga shtrati i tij në spital. “Të gjitha testet shkuan mirë, tani është koha për t'u rikuperuar”, tha në veçanti Enrique Llopis.

B.T (Dosja.al)

Sondazh

Poll

MË SHUMË