Bota

Stoltenberg: Ka ardhur koha që Turqia t’i thotë po anëtarësimit të Finlandës dhe Suedisë në NATO

Jens Stoltenberg tha se kryesore nuk është nëse vendimi do të merret për të dyja vendet në të njëjtën kohë, por që miratimi i protokolleve të bëhet "sa më shpejt të jetë e mundur".

16 Shkurt 2023, 19:29 Nga k.m.
Stoltenberg: Ka ardhur koha që Turqia t’i thotë po
Jens Stoltenberg dhe Mevlüt Çavuşoğlu

Sekretari i Përgjithshëm i NATO-s Jens Stoltenberg tha të enjten se është koha që të ratifikohen protokollet e pranimit të Finlandës dhe Suedisë, si anëtarë të rinj të aleancës ushtarake. Gjatë një konference të përbashkët për shtyp në Ankara, me në krah Ministrin e Jashtëm turk Mevlüt Çavuşoğlu, Stoltenberg tha se kryesore nuk është nëse vendimi do të merret për të dyja vendet në të njëjtën kohë, por që miratimi i protokolleve të bëhet "sa më shpejt të jetë e mundur".

Çavuşoğlu tha se Turqia mund t'i shqyrtojë kërkesat e dy vendeve për anëtarësim, veç e veç.

Turqia dhe Hungaria janë të vetmet anëtarë të NATO-s që nuk e kanë ratifikuar protokollet për pranimin në aleancë të Finlandës dhe Suedisë, një proces që duhet të jetë unanim. Finlanda dhe Suedia aplikuan për t'u bërë pjesë e NATO-s vitin e kaluar, pas sulmit rus në Ukrainë. Ngurrimi i Turqisë lidhet kryesisht me Suedinë, qeverinë e së cilës Ankaraja e akuzon se është shumë e butë me grupet që Turqia i konsideron si organizata terroriste.

Të enjten, Stoltenberg tha se Suedia dhe Finlanda kanë zbatuar politika që marrin parasysh shqetësimet e shprehura nga Turqia duke vënë në dukje se terrorizmi, do të jetë një temë kryesore në takimin e NATO-s që mbahet në korrik.

“Ky është një vendim i Turqisë. Është qeveria turke, parlamenti turk që vendos mbi çështjen e ratifikimit (të protokolleve të pranimit)”, tha ai./VOA

mevlut Çavusoglu jens stoltenberg

Sondazh

Poll

MË SHUMË