Bota

Kurti: Nuk mund të ketë shtyrje të vendimit për targat

Po ashtu, Kurti ka theksuar se me Shtetet e Bashkuara të Amerikës dhe ambasadën amerikane po ashtu edhe me ambasadorin amerikan në Kosovë e me Departamentin amerikan janë vazhdimisht në kontakt.

3 Nëntor 2022, 16:29 Nga I.A
Kurti: Nuk mund të ketë shtyrje të vendimit për targat
Albin Kurti

BERLIN- Kryeministri i Kosovës, Albin Kurti, pas Samitit në Berlin, është deklaruar për media, ku ka folur për çështjen e targave. Kurti ka deklaruar se nuk mund të ketë shtyrje të vendimit për çështjen e targave, ashtu siç është kërkuar nga ndërkombëtarët.

“Shtyrja 10 mujore nuk mund të jetë shtyrje, mund të jetë 3 jave 1 muaj, nuk kemi bërë shtyrje sepse jemi në të drejtën tonë, kemi shprehur mirëkuptimin për brengat amerikane. Dëshirojmë që të mos bëjmë kompromis sa i përket zbatimit të ligjit të drejtë dhe cenojmë paqen dhe sigurinë dhe këtë e kemi bërë me vendimin e marrë”, tha Kurti.

Sipas tij, është bërë një qasje e diferencuar dhe sekuencim në zbatim, për të cilën beson se është rruga më e mirë. Po ashtu, Kurti ka theksuar se me Shtetet e Bashkuara të Amerikës dhe ambasadën amerikane po ashtu edhe me ambasadorin amerikan në Kosovë e me Departamentin amerikan janë vazhdimisht në kontakt.

“Nuk ka vendim që shkakton preokupim të paqes dhe sigurisë për të cilin paraprakisht i njoftojmë partnerët tanë, ata e dinë paraprakisht vendimin tonë. Nuk mund të thuhet se ka pasur kurrfarë shpërfillje të qeverisë sonë ndaj brengave evropiane”, shtoi Kurti.

Po ashtu, Kurti ka folur edhe për vendimin e fundit të Qeverisë lidhur me çështjen e targave. Ai ka theksuar se deri më 21 nëntor nuk do të ketë gjoba, është një periudhë tre javore që do të ketë vetëm vërejtje dhe qortime. Ai ka potencuar se nuk është i interesuar për shpërndarje të gjobave, por për konvertim të targave nga ato ilegale në ato RKS.

“Nuk jam i interesuar që askush te gjobitet e të konfiskohen automjetet, jam i interesuar që ato te konvertohen. Këtu pengesa nuk është informimi por është terrori nga Beogradi që u bëhet qytetarëve”, përfundoi ai.

albin kurti procesi i berlinit

Sondazh

Poll

MË SHUMË