Aktualitet

Keqtrajtonin të miturit në shtëpinë e fëmijës në Sarandë, policia merr masa, procedohen 3 persona

Drejtoresha Stela Dako dhe Raviola Beqiraj, e cila ishte psikolge në shtëpinë e fëmijës 'Vangjel Pula' janë proceduar nga policia. 

19 Tetor 2022, 12:25 Nga A.B
Keqtrajtonin të miturit në shtëpinë e fëmijës
Filmimi i emisionit STOP

SARANDË- Tre persona janë proceduar pasi emisioni 'Stop' zbuloi keqtrajtimin e fëmijëve në shtëpinë e fëmijës. Drejtoresha Stela Dako dhe Raviola Beqiraj, e cila ishte psikolge në shtëpinë e fëmijës 'Vangjel Pula' janë proceduar nga policia. Po ashtu, masa janë marrë dhe për oficerin e patrullës së përgjithshme i cili ka keqtrajtuar fëmijët.

NJOFTIMI I POLICISË:

Në lidhje me rastin e transmetuar mbrëmjen e djeshme, në emisionin investigativ “Stop”, që bënte fjalë për një shtetas të mitur që ankohej se fëmijët e shtëpisë së fëmijëve “Vangjel Pula”, ishin keqtrajtuar nga stafi i këtij institucioni dhe nga një efektiv i Komisariatit të Policisë Sarandë, ju informojmë se:

Specialistët për Hetimin e Krimeve të Komisariatit të Policisë Sarandë, në prani të psikologes së Njësisë së Mbrojtjes së Fëmijëve, kanë intervistuar shtetasin e mitur që shfaqet në pamjet filmike, i cili ka deklaruar se pamjet janë filmuar rreth 1 vit më parë. Për këtë rast janë kryer të gjitha veprimet procedurale, për shoqërimin dhe intervistimin e palëve të përfshira. Në vijim të këtyre veprimeve u referuan materialet në prokurori dhe nisi procedimi penal për shtetaset S. D., 58 vjeçe, me detyrë drejtoreshë e shtëpisë së fëmijës “Vangjel Pula” dhe R. B., 29 vjeçe, me detyrë psikologe në këtë institucion, për veprat “Shpërdorimi i detyrës” dhe “Keqtrajtimi i të miturit”.

Gjithashtu, Drejtori i Drejtorisë Vendore të Policisë Vlorë ka bërë pezullimin e menjëhershëm nga detyra të punonjësit të Policisë, shtetasit A. Sh., me detyrë oficer i Patrullës së Përgjithshme, trupë shërbimi në Komisariatin e Policisë Delvinë, pas deklaratës nga shtetasi i mitur se ky punonjës policie e kishte keqtrajtuar.

Ndërkohë, Drejtori i Përgjithshëm i Policisë së Shtetit ka urdhëruar Drejtorinë e Standardeve Profesionale në Policinë e Shtetit, për nisjen e hetimit disiplinor për punonjësin e Policisë.

Drejtoria Vendore e Policisë Vlorë falënderon mediat për bashkëpunimin dhe për denoncimin e rasteve të tilla dhe i fton sërish që të denoncojnë çdo rast të abuzimit me detyrën, sjellje të pahijshme apo tejkalim të kompetencave të punonjësve të Policisë, duke iu garantuar reagim të menjëhershëm e të paanshëm.

keqtrajtimi i femijeve ne sarande sarande stela dako

Sondazh

Poll

MË SHUMË