Aktualitet

“Kafe ose në komisariat”/ Policia e Shtetit reagon pas denoncimit, përjashtohen dy efektivët (EMRAT)

Përjashtimi vjen menjëherë pas publikimit të videos së transmetuar në “Stop”, ku efektivët i bënin presion qytetarëve se do t’i çonin në Komisariat për “veprime të turpshme” pasi i kapnin në momente të sikletshme me të dashurat në makinë.

28 Shtator 2022, 22:06 Nga k.m.
“Kafe ose në komisariat”/ Policia e Shtetit reagon pas
Pamje nga videoja e denoncimit

TIRANË- Drejtori i Përgjithshëm i Policisë së Shtetit, Muhamet Rrumbullaku ka urdhëruar përjashtimin e menjëhershëm dhe përfundimtar të dy efektivëve të patrullës. Përjashtimi vjen menjëherë pas publikimit të videos së transmetuar në “Stop”, ku efektivët i bënin presion qytetarëve se do t’i çonin në Komisariat për “veprime të turpshme” pasi i kapnin në momente të sikletshme me të dashurat në makinë. Të përjashtuarit janë: inspektorët Shamet Kuqo dhe Elton Gjedia.

Reagim i Policisë së Shtetit

Menjëherë pas transmetimit të pamjeve filmike, në emisionin investigativ “STOP”, ku u shfaqën dy punonjës policie të Patrullës së Përgjithshme të Komisariatit të Policisë Nr. 6, në shpërdorim të plotë të detyrës dhe në shkelje të hapur të etikës dhe të komunikimit, duke i marrë një shumë parash, me anë të akteve korruptive, drejtuesit të një automjeti që kishte ndaluar në anë të rrugës, në Kashar, sqarojmë opinonin publik se: Drejtori i Përgjithshëm i Policisë së Shtetit ka urdhëruar menjëherë përjashtimin përfundimtar nga radhët e Policisë së Shtetit, të dy punonjësve të Patrullës së Përgjithshme, inspektorëve Shamet Kuqo dhe Elton Gjedia.

Ndërkohë, Drejtoria e Standardeve Profesionale në Policinë e Shtetit ka nisur menjëherë hetimin e thelluar disiplinor, për shkelje të rëndë disiplinore, ndaj specialistit të Seksionit të Patrullës së Përgjithshme, Nënkomisar A. K., si dhe ndaj shefit të Seksionit për Rendin dhe Sigurinë Publike në Komisariatin e Policisë Nr. 6, Komisar V. I.

Njëkohësisht, Agjencia e Mbikëqyrjes Policore ka nisur hetimin penal në lidhje me këtë rast. Drejtori i Përgjithshëm i Policisë së Shtetit falënderon drejtuesit e emisionit “STOP” dhe inkurajon median dhe qytetarët që të denoncojnë çdo rast të korrupsionit, të abuzimit me detyrën apo shkelje të kodit të etikës dhe sjelljes me qytetarët, duke iu garantuar se është shumë i vendosur për të reaguar me ashpërsinë e ligjit që të largojë nga radhët e Policisë së Shtetit, punonjës të tillë që njollosin emrin dhe uniformën e Policisë së Shtetit.

Efektivët u morën të rinjve 20 mijë lekë “për kafe”, në të kundërt do t’i shoqëronin në komisariat, të akuzuar për vepra të turpshme, derisa të vinte e t’i merrte familja.

shamet kuqo elton gjedia policia e shtetit polici merr ryshfet ne tirane

Sondazh

Poll

MË SHUMË