Aktualitet

Aksioni për konfiskimin e kullave, qeveria ‘e dorëzon’: S’ndërhyjmë tek drejtësia

Kryeministri Edi Rama, kur edhe paralajmëroi nisjen e aksionit të ri, tha se pronarët ose duhet të blinin ndërtimin e tyre me çmimin e tregut, ose duhet t'ja dhuronin shtetit; por asnjë marrëveshje nuk është bërë publike deri më tani. 

22 Shtator 2022, 15:43 Nga k.m.
Aksioni për konfiskimin e kullave, qeveria ‘e dorëzon’:
Foto ilustruese

TIRANË- Aksioni për konfiskimin e ndërtimeve pa leje ka ngecur vetëm me dy kulla të sekuestruara. Nga Qeveria, përditësimi i fundit për vijimin e tij është dalja publike e ministrit të Brendshëm, Bledi Çuçi dhe ai i zv.kryeministres, Belinda Balluku, rreth dy javë më parë.

Sot, gazetarja Eksiola Shehu pyeti përfaqësuesit e Qeverisë, më konkretisht ministren e Shëndetësisë, Ogerta Manastirliu se në çfarë faze është operacioni, por "topi" iu pasua drejtësisë.

Aksioni për konfiskimin e kullave, qeveria ‘e dorëzon’:
Ogerta Manastirliu sot

“Duhet që të kuptojmë diçka që është me rëndësi; ne nuk kemi ndërhyrë dhe nuk do të ndërhyjmë në vendimet e organeve ligjzbatuese kompetente. Vendim i Qeverisë ka për synim thelbësor dekurajimin e ndërtimeve pa leje në Shqipëri,”- u shpreh ministrja, kur u pyet nëse ka një marrëveshje mes shtetit dhe ndërtuesëve. 

Por kryeministri Edi Rama, kur edhe paralajmëroi nisjen e aksionit të ri, tha se pronarët ose duhet të blinin ndërtimin e tyre me çmimin e tregut, ose duhet t'ja dhuronin shtetit; por asnjë marrëveshje nuk është bërë publike deri më tani. 

Inspektoriati Kombëtar i Mbrojtjes së Territorit dhe Komisariati nr. 1 i policisë kanë kallëzuar penalisht në Prokurorinë e Tiranës biznesmenin Pëllumb Salillari për ndërtim pa leje. Kallëzimi penal për biznesmenin e fuqishëm ka mbërritur në tryezën e shefit të përkohshëm të prokurorisë së kryeqytetit, Arenc Cela.

Pëllumb Salillari u bë kështu biznesmeni i parë që kallëzohej penalisht pas aksionit të qeverisë ndaj ndërtimeve pa leje.

Pak ditë më parë qeveria, miratoi një vendim që tentonte të amnistonte ndërtimet pa leje të ndërtuesve të fuqishëm kundrejt konfiskimit ose duke iu ofruar të drejtën e blerjes me çmimin e tregut. Por vendimi anashkalon Kodin Penal, i cili i klasifikon ndërtimet e paligjshme si vepër penale, që dënohet deri në 8 vite burg. Me gjithë tentativën e qeverisë për amnisti, zyrtarët përgjegjës për mbrojtjen e territorit me sa duket kanë ngurruar të mbajnë përsipër riskun për të mos bërë kallëzim penal, pasi kjo i ngarkon me përgjegjësinë e moskallëzimit të krimit.

edi rama konfiskimi i kullave

Sondazh

Poll

MË SHUMË