Bota

“Na rrihnin me doreza boksi”, rrëfimi mes lotësh i ukrainasit: Në burg këndoja çdo ditë himnin rus

Pamjet nga kamera e tij u publikuan më vonë në Rusi dhe në internet nga një gazetar rus.

9 Korrik 2022, 23:35 Nga F.M
“Na rrihnin me doreza boksi”, rrëfimi mes lotësh i
Mykhailo Orlovskyi

UKRAINË- Momenti kur ukrainasi Mykhailo Orlovskyi u kap nga forcat ruse u regjistrua në kamerën e tij. Në filmime, ai shihet duke u përzënë nga ushtarët në një automjet të blinduar, me duart lart. Në këtë moment, një ushtar rus po drejtonte makinën e Mykhailo-s.

“Gjëja e parë që mendova ishte se si të mbijetoja. Gjëja e dytë ishte se do të vdisja”,  tha ai për Sky News.

Pamjet nga kamera e tij u publikuan më vonë në Rusi dhe në internet nga një gazetar rus.

“Na rrahën në pyll, filluan të na merrnin në pyetje, pastaj na lidhën dhe na hodhën në një gropë ku na mbajtën dy ditë,”- tha ai.

“Ishte 7 mars dhe shumë ftohtë. Më hodhën një xhaketë. Unë kisha veshur vetëm një xhaketë dhe pantallona sportive, kaq. Por falë Zotit xhaketa kishte të paktën një kapuç,”- tha ai.

Mykhailo punonte si shofer taksie, por kishte ndihmuar edhe ushtrinë ukrainase në mënyrë vullnetare. Pas dy ditësh, ai u dërgua me helikopter në një burg në Kursk të Rusisë.

“Ne vazhdimisht na është dashur të nënshkruajmë dokumente, jemi marrë në pyetje, jemi rrahur. Gjithçka zgjati rreth gjashtë orë, na çuan në një dhomë të veçantë, ku na rrahën me doreza boksi në veshka, mëlçi, brinjë, qafë dhe këmbë. Ata përdorën gjithashtu një armë trullosëse. Na goditën aq fort.”

Ai përshkruan sesi të burgosurve burra dhe gra u rruhej koka, u morën mostrat e gjakut, ADN-në dhe gjurmët e gishtërinjve.

“Më morën telefonin dhe madje edhe unazën e martesës”, thotë ai. “Më morën të gjitha dokumentet…pasaportën, patentën e shoferit. Gjithçka e kanë ende ata.”

Rreth 500 civilë ukrainas ndodhen aktualisht në burgjet ruse. Mykhailo ishte brenda për katër javë në total përpara se të shkëmbehej në prill. Gjatë kohës së tij të burgosur, ai u detyrua të këndonte himnin kombëtar rus në mënyrë të përsëritur.

“Kishte një radio, një altoparlant i varur në derë. Dhe kur luhej himni dhe luhej rreth 10-15 herë në ditë, ne duhej të rreshtoheshim dhe të këndonim himnin e Federatës Ruse.”

Ndërkohë në Ukrainë, familja e Mykhailos ishte shumë e shqetësuar për atë që i kishte ndodhur. Pas dy javësh, ata më në fund gjetën një fotografi që ishte shkrepur pas arrestimit të tij, e cila ishte publikuar në internet.

“I telefonova dhe i thashë se gjithçka është në rregull me mua, se jam gjallë dhe shëndoshë. Më kujtohen lotët e gëzimit. Nëna ishte e lumtur që Zoti do t’i bënte një dhuratë të tillë për ditëlindjen e saj.”

“Një moment shumë i vështirë ishte kur po flisja me vëllain tim dhe ai më tha se kishte një moment që mendonte se unë kisha vdekur tashmë, se nuk isha më atje. Është e vështirë edhe tani,”- shprehet ai.

Mykhailo, pasi u lirua u kthye në vendin ku u mbajt peng nga rusët. Gjërat e tij personale ishin ende në tokë, këllëfi i syzeve, kufjet AirPod, kartat e tij të biznesit.

Ai gjithashtu gjeti makinën e tij Mercedes, tashmë të djegur plotësisht, por numri serial ishte ende i dukshëm. Pa makinën e tij, ai ka humbur punën dhe tashmë po përballet me krizë financiare.

Por ai ka arritur të arratiset me një mesazh të rëndësishëm për botën mbi tmerret që përjetojnë civilët ukrainas në paraburgimin rus.

mykhailo orlovskyi lufta ukraine-rusi

Sondazh

Poll

MË SHUMË