Aktualitet

I riu u dhunua nga një grup djemsh, policia: Ishin tre të dehur, goditën njëri-tjetrin

Sipas policisë ishin të dehur dhe kanë goditur njëri-tjetrin.

1 Korrik 2022, 17:21 Nga F.M
I riu u dhunua nga një grup djemsh, policia: Ishin tre të dehur,
Policia e Tiranes

TIRANË- Policia e Tiranës ka publikuar njoftimin zyrtar në lidhje me një sherr të ndodhur në një resort në periferi të kryqytetit. Në njoftimin zyrtar bëhet me dije se në sherr janë përfshirë tre persona, që sipas policisë ishin të dehur dhe kanë goditur njëri-tjetrin.

Njoftimi i policisë Tiranë

Në lidhje me një video të postuar në portale, në të cilën shfaqen disa persona që konfliktohen fizikisht me njëri-tjetrin, ju informojmë se: Specialistët për Hetimin e Krimeve në Stacionin e Policisë Farkë kanë referuar materialet në Prokurori dhe ka nisur procedimi penal në gjendje të lirë për shtetasit:-D. D., 28 vjeç, E. H., 35 vjeç, dhe K. Xh., 35 vjeç, të tre banues në Tiranë, për veprën penale "Dëmtime të tjera me dashje". Këta shtetas, pas një konflikti për motive të dobëta, duke qenë në gjendje të dehur, kanë goditur njëri-tjetrin me grushte. Vijon puna për identifikimin dhe kapjen e personave të tjerë të përfshirë në konflikt. Materialet i kaluan Prokurorisë, për veprime të mëtejshme procedurale.

Ndërkohë është publikuar dhe videoja ku shihej momenti i dhunimit të të riut. Në video shihet se 10 të rinj i sulen një tjetri me grushte e shkelma. Ata e godasin të gjithë bashkë dhe më pas e shtrijnë buzë pishinës së resortit për të vijuar me sulmin.

Pse ka nisur sherri?

Gjithçka ka ndodhur për ngacmimin e një vajze që po pushonte në resort. E reja është ngacmuar sistematikisht nga djali që dhunohet në video. Edhe pse vajza, bija e një personi në fushën e drejtësisë e ka refuzuar djalin, i riu ka këmbëngulur e kjo gjë ka sjellë reagimin e të afërmve e miqve të të resë. Ata e kanë dhunuar të riun, por nuk dihet se si ka përfunduar sherri. Në njoftimin zyrtar të policisë shkruhet vetëm se në sherr janë përfshirë tre të dehur që janë zënë me njëri-tjetrin, por nuk shpjegohet nëse i dhunuari ka përfunduar në spital apo nëse ka pasur të proceduar për sherrin.

 

policia e tiranes

Sondazh

Poll

MË SHUMË