Politike

Zgjedhja e Begajt si President, Alibeaj: Proces farsë, nuk do bëheshim pjesë

Me anë të një postimi në Facebook, Alibeaj shkruan se ata nuk mund të bëheshin pjesë e një procesi farsë të Ramës.

4 Qershor 2022, 19:51 Nga I.A

Zgjedhja e Begajt si President, Alibeaj: Proces farsë, nuk do bëheshim

Enkelejd Alibeaj

TIRANË- Enkelejd Alibeaj ka reaguar për zgjedhjen e Bajram Begajt si President. Me anë të një postimi në Facebook, Alibeaj shkruan se ata nuk mund të bëheshin pjesë e një procesi farsë të Ramës. Ai gjithashtu ka shkruar se vendi ka nevojë për një President të të gjithve dhe për një proces gjithëpërfshirës dhe transparent.

Postimi i Plotë:

Seanca për zgjedhjen e Presidentit të Republikës ishtë farsa e radhës për të cilën opozita i duhej Ramës vetëm për fasadë. Për shqiptarët e mësuar me lojërat e politikës së vjetër, shfaqja e sotme, që nga propozimi i emrit, procedurat e përshpejtuara dhe përfshirja e non gratave të Parlamentit, dëshmuan dhe njëherë se nuk ka asnjë të re nga fronti i atyre që mbajnë njëri-tjetrin në skenën e politikës. Grupi parlamentar i PD vendosi të mos marrë pjesë në këtë seancë fasadë votimi, sikundër në mënyrë tejet transparente, përgjatë disa takimeve mediatike ne syt të publikut u tregoi shqiptarëve që nuk bëhet pjesë e bojkotit të institucioneve apo negociatave, kulisave apo pazareve. Por kurrsesi nuk mund të shndërrohej në garniturë të pjatës së servirur nga Edi Rama.

Shqipëria kishte nevojë jo vetëm për një President të të gjithëve, por mbi të gjitha për një proces gjithëpërfshirës, transparent e real, i cili t’i jepte atij besimin e të gjithë shqiptarëve. Produkti i këtij procesi do mund të shihej kështu si bartës i unitetit të popullit, si njeriu mbi palët, si zbutës e moderator i klimës politike dhe si rregullator i ngërceve insititucionale. Presidenti i Republikës forcën e vet e merr nga besimi dhe legjitimiteti që populli i jep. Ishte ky detyrimi që secila palë politike, e cila pretendon të përfaqësoje sinqerisht shqiptarët, duhej të angazhohej e të përmbushte kështu detyrimin e saj kushtetues, politik dhe institucional. Këtë besuam e besojmë, dhe kësaj i shërbyem. E sotmja po, por edhe e ardhmja do na gjykojë e japë të drejtë!