Politike

Vota e emigrantëve, shoqata në diasporë kundër ‘zonës 13’: Dobëson peshën elektorale

Sipas shoqatës, ky propozim dobëson peshën e votës së diasporës dhe tenton të zvogëlojë dhe qendërzojë influencën e mbi 1.4 milion shqiptarëve të diasporës, të cilëve kushtetuta do t'u garantojë të drejtën e votës.

27 Maj 2022, 17:17 Nga DOSJA

Vota e emigrantëve, shoqata në diasporë kundër

Foto ilustruese

TIRANË- Një lëvizje e quajtur "Diaspora për Shqipërinë e Lirë" në faqen e saj zyrtare ka publikuar një deklaratë, në të cilën kundërshton propozimin e Komisionit Qendror Zgjedhor dhe disa përfaqësuesve të partive politike në vend për krijimin e një zone zgjedhore të 13-të. Nga ku do të dalin 5 deputetë të rezervuar për diasporën.

Shkresa

Deklaratë për shtyp – Vota e Shqiptarëve me vendbanim jashtë Shqipërisë.

Diaspora për Shqipërinë e Lirë (DPSHL) përshëndet KQZ-në dhe OSBE-në për konferencën e organizuar me temë “Votimi nga jashtë, koha është tani” të datës 24 Maj 2022, ku lëvizja u përfaqësua nga tre prej anëtarëve të saj. Në këtë konferencë, Bledar Milaqi, bashkëthemelues dhe sekretar i përgjithshëm i DPSHL- së, ritheksoi domosdoshmërinë e mosmohimit dhe të mostjetërsimit të votës së shqiptarëve jashtë Shqipërisë. Ndërsa detajet teknike dhe modalitetet në lidhje me këtë temë jetike për të ardhmen e demokracisë shqiptare mbeten për t’u diskutuar, DPSHL-ja ka ndjekur me shqetësim propozimin e disa përfaqësuesve te partive politike për krijimin e një zone zgjedhore të 13- të, me 5 deputetë të rezervuar për diasporën.

Lëvizja deklarohet kategorikisht kundër këtij propozimi i cili dobëson peshën e votës së diasporës dhe tenton të zvogëlojë dhe qendërzojë influencën e mbi 1.4 milion shqiptarëve të diasporës të cilëve kushtetuta u garanton të drejtën e votes. Ka një dhe vetëm një votë, të barabartë për të gjithë. Çdo propozim që synon të shpërfytyrojë qëllimin dhe të drejtën e votimit nga jashtë te shtetasve shqiptar, do të përballet me rezistencë nga Lëvizja jonë dhe do të luftohet me të gjitha mjetet ligjore dhe politike në dispozicion të shoqërisë civile! Vota jonë ka peshë!

Pas këtij kundërshtimi, ka reaguar edhe ish kryeministri, Sali Berisha, i cili tha se me këtë deklaratë, Diaspora për Shqipërinë e Lirë kishte kundërshtuar propozimin e bërë nga Balla dhe Alibeaj, duke e konsideruar si anti-kombëtar.

(k.m/dosja.al)