Aktualitet

Ndeshja/ Çuçi: Të mërkurën bëjeni pushim të gjithë, në Tiranë mos hajdeni

Çuçi shtoi se dy ekipe policie nga Roterdami dhe Roma i janë bashkuar ekipeve të policisë së Shtetit për të bërë të mundur parandalimin çdo situate apo akti dhune.

23 Maj 2022, 15:06 Nga DOSJA
Ndeshja/ Çuçi: Të mërkurën bëjeni pushim
Bledi Çuçi

TIRANË- Ministri i Brendshëm Bledi Çuçi ka kërkuar që 25 maji, dita kur do të luhet ndeshja Roma-Feynord në Tiranë të bëhet pushim në çdo institucion e biznes në vend. Në një prononcim për mediat, Çuçi tha se askush nuk duhet të vijë në Tiranë nga rrethet atë ditë, pasi nuk do të ketë mundësi të futet.

Për të dalë nga kryeqyteti, ministri tha se do të lejohet, por që sugjeron që asnjë shërbim të mos ofrohet nga asnjë lloj zyre atë ditë, përveç restoranteve e kafeneve. Ai tha se atë ditë Tirana do të jetë në dispozicion të tifozerive, miqve dhe atyre që kanë një biletë. Çuçi shtoi se dy ekipe policie nga Roterdami dhe Roma i janë bashkuar ekipeve të policisë së Shtetit për të bërë të mundur parandalimin çdo situate apo akti dhune.

“Po parashikojmë çdo gjë në detaje në mënyrë që të mos cenohet askush në këtë festë të madh. Çdo gjë është në kontroll, iu bëj thirrje shqiptarëve jashtë Tiranës që nuk kanë biletë mos të tentojnë të vijnë në Tiranë se do jetë në dispozicion të atyre që kanë biletë dhe tifozëve të Romës e Feynoord. Bizneseve që s’kanë lidhje me finalen restorantet baret dhe gjithë shërbimet, bankave apo zyrave private, ashtu siç kemi bërë me institucionet publike dhe shkollat ta shpallin ditë pushimi të mërkurën pasi Tirana do jetë e paralizuar sa i takon qarkullimit të mjeteve. Kemi kohë që punojnë në bashkëpunim me policinë e Roterdamit dhe Romës, na janë bashkuar ekipet e policisë në mënyrë që të koordinojmë të gjithë veprimet për të parandaluar çdo situatë të pakëndshme, do marrim masa që të parandalojmë çdo akt dhune. Kemi hapësira të dedikuara për parkimin e autobusëve, mjetet e vogla, për çdo sportdashës që do vijë ta shijojë. Ata që do jenë në punë nuk diskutohet që do lejohet sikundër edhe kush do që të dalë do ketë kanalet e daljes. Atë ditë mos ejani në Tiranë. Asnjë nga rrethet të mos niset,”- tha Çuçi ndër të tjera.

(F.m/dosja.al)

Sondazh

Poll

MË SHUMË