Politike

Berisha rimerr drejtimin e PD pas 9 vitesh, mesazhi: Mrekullia e shekullit, do shpëtojmë Shqipërinë

Berisha u rizgjodh me 40 mijë e 820 vota, 93.45% të tyre. 2532 vota kanë shkuar për kandidatin tjetër në garë, Ibsen Elezi, ose ndryshe 5.8% e tyre. Të pavlefshme kanë qenë vetëm 328 vota, ndërsa 43.680 demokratë në total morën pjesë në zgjedhjet e sotme.

22 Maj 2022, 22:12 Nga DOSJA
Berisha rimerr drejtimin e PD pas 9 vitesh, mesazhi: Mrekullia e shekullit, do
Sali Berisha

TIRANË- Ish-kryeministri Sali Berisha është shpallur zyrtarisht kryetari i ri i Partisë Demokratike. Pa asnjë surprizë, Berisha mundi sot rivalin Ibsen Elezi me një diferencë të madhe votash në të gjithë qarqet. Edhe pse i shpallur non-grata nga Departamenti Amerikan i Shtetit, ai u rizgjodh me 40 mijë e 820 vota, 93.45% të tyre. 2532 vota kanë shkuar për kandidatin tjetër në garë, Ibsen Elezi, ose ndryshe 5.8% e tyre. Të pavlefshme kanë qenë vetëm 328 vota, ndërsa 43.680 demokratë në total morën pjesë në zgjedhjet e sotme.

Dosja.al ka ndjekur hap pas hapi procesin e votimit dhe të numërimit të votave dhe gjithçka ka vijuar në qetësi. Që nga ora 08:00 deri në mbylljen e numërimit nuk është shënuar asnjë incident me kutitë e votimit apo gjatë procesit të numërimit.  Berisha ka arritur të sigurojë votat e 99% të demokratëve duke u rikthyer në karrigen e kryetarit pas 9 vitesh, post të cilin e la pas humbjes së thellë përballë kryeministrit aktual Edi Rama. Dhe mesazhi i parë që dha nga selia blu ishte shpëtimi i Shqipërisë nga qeveria aktuale. Berisha u betua dhe u shpreh se do ta bënte Shqipërinë një vend ku të rinjtë të realizojnë ëndrrat e tyre këtu dhe të mos e shohin emigrimin si zgjidhje. Ai është shprehur me bindje se do ta mundë Edi Rama në zgjedhjet lokale që pritet të zhvillohen vitin e ardhshëm dhe në ato parlamentare dhe se do të bëjë që pas tre mandatesh qeverisjeje nga PS-ja, Partia Demokratike të vijë në pushtet. 

“U krye ndodhi mrekullia e vërtetë shqiptare në shekullin e 21! Ne kemi për pasion lirinë, proceset që njohu PD, t’i njohë mbarë Shqipëria dhe të çlirojmë vendin nga një regjim që kurrë nuk e meriton. Betimi im para shqiptarëve është: Do bëj gjithçka që ëndrrat e tyre më të bukura të bëhen realitet në këtë vend. Ai që realizon ëndrrat e tij është i detyruar që të bëjë gjithçka për realizimin e nëdrrave të të tjerëve,"- tha Berisha ndër të tjera. 

Procesi i sotëm ka ‘zgjuar’ ish-kryetarin e Partisë Demokratike, Lulzim Basha, i cili nuk e ka injoruar dot votimin për pasardhësin e tij në krye të detyrës. Sot, ai ka kujtuar kryengritjen e burgut të Spaçit, duke u kërkuar ndjekësve që të mos jenë peng të të shkuarës, referuar vetë Berishës.

Nga kampi rozë nuk ka pasur reagime. Aktualisht me vendim gjykate Berisha gëzon të drejtën e drejtimit të PD-së bashkë me Komisionin e Rithemelimit që krijoi pasi Basha e përjashtoi nga grupi parlamentar i PD-së. Gjyqtari Agron Zhukri i dha vulën e selinë blu, duke nxjerrë jashtë loje deputetin Enkelejd Alibeaj që mori karrigen e Bashës dhe mbështetësit e tij. Por, gjyqtarja Blerina Muça mori nën shqyrtim ankimin e Alibeajt, e njohu atë si palë dhe çështja ka shkuar në Apel. Tashmë pritet edhe vendimi përfundimtar.

(F.m/dosja.al)

Sondazh

Poll

MË SHUMË