Bota

Kuvendi i Kosovës mban seancën e radhës, qeveria Kurti shpall gjendjen emergjente

29 Dhjetor 2021, 08:16 Nga DOSJA

Kuvendi i Kosovës mban seancën e radhës, qeveria Kurti shpall

KOSOVË – Deputetët e Kuvendit të Kosovës u mblodhën sot sërish në orën 11:00 për të vazhduar diskutimin lidhur me pikat e mbetura nga seanca plenare e së premtes.

Në rend dite ishin një sërë projektligjesh që do të shqyrtoheshin për herë të parë dhe të dytë, bashkë me disa marrëveshje ndërkombëtare për të cilat nuk ka pasur kuorum. Deputetët kanë votuar ditën e sotme masat emergjente të qeverisë, për situatën me furnizim me energji elektrike. Vendimi i Qeverisë u votua në Kuvend me 57 vota pro, asnjë kundër dhe 17 abstenime.

Në mbledhjen e 24 dhjetorit, Qeveria e Kosovës vendosi se masat emergjente në furnizim me energji elektrike do të vlejnë maksimalisht 60 ditë. Spas vendimit të qeverisë, masat emergjente në furnizim me energji përfshijnë: Vendosjen e kufizimeve në furnizim me energji për konsumatorët, dhe vendosjen e obligimeve të veçanta për ndërmarrjet e energjisë.

Në vendim thuhet se Qeveria mund të fillojë me zbatimin e masave menjëherë por se vendimi duhet të shqyrtohet për miratim edhe nga Kuvendi i Kosovës në një afat prej shtatë ditësh. Kuvendi ka të drejtën e refuzimit të masave dhe në këtë rast qeveria është e detyruar t’i ndërpresë ato. Në arsyetimin e qeverisë së Kosovës thuhet se sistemi elektro-energjetik i Kosovës aktualisht është duke u përballur me vështirësi të theksuara si reflektim i rritjes së theksuar të konsumit të energjisë elektrike në vend, pamjaftueshmërisë së gjenerimit të brendshëm për të mbuluar konsumin, dhe krizës globale energjetike që ka rezultuar me rritjen enorme të çmimit të energjisë elektrike në bursat ndërkombëtare. Qeveria me tej thotë se masat lidhen me faktin se problemet me furnizim me energji elektrike janë paraqitur sidomos gjatë muajit dhjetor të këtij viti për shkak të avarive të shkaktuara në gjeneratorët e termocentralit “Kosova A” dhe “Kosova B”. Arsye tjetër sipas qeverisë është edhe rritja e theksuar e konsumit të energjisë elektrike. Përmes këtij vendimi, qeveria ka formuar një Komitet Teknik Emergjent në kuadër të Ministrisë së Ekonomisë që ka për qëllim identifikimin dhe paraqitjen e rekomandimeve për Ministrinë e Ekonomisë së Kosovës.

Kryeministri i kosovës Albin Kurti ka falenderuar publikisht kryeministrin Edi Rama për mbështetjen me energji për dy ditët e ndërrimit të vitit. Kurti tha në deklaratën për mediat pas përfundimit të seancës parlamentare se kërkesën për ndihmë e ka bërë Kosova nëpërmjet ministres së Ekonomisë, Artane Rizvanolli dhe ka thënë se dy vendet plotësojnë njëri-tjetrin pasi Shqipëria ka ujë kurse Kosova ka qymyr. Kurti theksoi se bëhet fjalë për dy ditë dhe se Kosova do të mund t’ia kthejë këtë ndihmë Shqipërisë në verë. Ai theksoi se kjo ndihmë është e veçantë, sepse është ndihmë në kushtet kur edhe Shqipëria vetë nuk i ka punët mirë me krizën energjike. Në konferencën e jashtëzakonshme për shtyp, ministrja e Infrastrukturës dhe Energjisë në Shqipëri, Belinda Balluku ka bërë me dije edhe kushtin e “zemërgjerësisë” së kryeministrit Edi Rama, duke shtuar se kjo depozitë energjetike do të mund të rikthehet gjatë stinës së verës, kohë kur Shqipëria has vështirësi sezonale për sigurimin e energjisë.

Kuvendi i Kosovës ditën e djeshme nuk arriti të miratojë shpalljen e gjendjes së emergjencës energjitike në vend pas gati 8 orësh diskutime dhe ndërprerje në seancën e jashtëzakonshme të ditës së djeshme. Mbledhja u karakterizua nga tensioni dhe sulmet e opozitës në adresë të qeverisë në lidhje me menaxhimin e krizës së energjisë elektrike në vend, ku në qendër të akuzave ishte kryeministri Albin Kurti, i cili nuk ishte prezent në këtë seancë. Kosova aktualisht është duke u përballur me një krizë energjetike, e paprovuar në 15 vitet e fundit. Qeveria e kryeministrit Albin Kurti shpalli 60 ditë gjendje emergjente në lidhje me krizën energjitike. Kurti u ka bërë apel qytetarëve që të kursejnë sa më shumë energjinë elektrike si dhe ka fajësuar qeveritë e kaluara për situatën në fjalë. Opozita akuzon qeverinë se ka abuzuar me situatën. Në Kosovë ka pasur dhe protestë të paralajmëruar ku me pankarta në duar qytetarët kanë kërkuar furnizim 24 orë me energji elektrike, shkarkimin e ministres së Ekonomisë, Artane Rizvanolli, dhe shtetëzim të KEDS-it.

(m.k/dosja.al)

Ndihmës-Sekretarja e Shtetit takoi Alibeajn, ndërsa Paloka deklaroi se ka firmosur peticionin kundër ambasadores Kim. Çfarë do të thotë kjo për PD?

View Results

diaspora diaspora kosove kriza energjitike ne kosove kuvendi i kosoves kosove kriza energjitike ne kosove kuvendi i kosoves