Politike

VD-Rama nga Kombinati: Këtu do të ndërtojmë projektin më të madh të rindërtimit

10 Dhjetor 2021, 09:36 Nga DOSJA

VD-Rama nga Kombinati: Këtu do të ndërtojmë projektin

TIRANË – Kryeministri Rama ishte i pranishëm ditën e sotme në përurimin e shkollës dhe kopshtit ‘Lasgush Poradeci’ në Kombinat të Tiranës, ku në fjalën e tij ai ka falënderuar fillimisht Katarin për mbështetjen e madhe që ata kanë dhënë për procesin e rindërtimit pas tërmetit shkatërrimtar të dy viteve më parë që goditi vendin tonë. Sipas Ramës, kjo ishte një mbështetje e madhe për shumë familje që humbën banesat e tyre, por edhe shumë nxënësve, të cilët nuk kishin më shkolla ku të mësonin, shumë prej të cilëve udhëtonin disa kilometra për të ndjekur mësimin.

“Falënderoj miqtë tanë nga Katari, sidomos për mbështetjen e tyre të pakursyer për procesin e rindërtimit nga tërmeti shkatërrimtar i nëntorit të dy viteve më parë, duke u ardhur në ndihmë shumë familjeve që humbën strehën e tyre, por edhe të shumë fëmijëve, të cilët bënin kilometra të tëra për të ndjekur mësimin, duke qenë se shkollat e tyre u shkatërruan. Kombinati është një nga zonat më të goditura dhe më të prekura nga tërmeti, dhe numri i familjeve të prekura ishte tepër i madh, ndaj edhe kjo është zona ku do të ndërtohet një nga projektet më të mëdha të rindërtimit”, deklaroi ndër të tjera në fjalën e tij Kryeministri Rama.