Sport

Pas agjërimit, derbi kryeqytetit në ditën e festës së Bajramit…

12 Maj 2021, 18:03 Nga DOSJA

TIRANE – Sot, në ditën e fundit e muajit të Ramazanit, skuadrat e Superiores po përgatiten për sprintin final, pasi kanë mbetur edhe 4 javë nga përfundimi i kampionatit. Ndërkohë, asnjëra prej tyre nuk ka arritur dhe as ka gjë të sigurtë sa i përket objektivave.

Ky muaj i shenjtë ka sjellë një qetësi, që pasqyrohet edhe me rezultate positive, veçanërisht te skuadrat e kryeqytetit, lojtarët e së cilave janë përballur edhe me sfidën e agjërimit, veç asaj sportive.

“Eshte një muaj shumë i shenjtë dhe ne besimtarët muslimanë mezi e presim. Me ndihmën e Zotit do ia dalim. Sigurisht një muaj si ky shfrytëzohet edhe më tepër se cdo ditë nga besimtarët për lutje dhe për shprehjen e dëshirave për arritjet e ndryshme në jetë, vedc shëndetit,”- shprehet mesfushori i të kuqve të Partizanit.

“Jo vetëm tani, por edhe në ditë jashtë Ramazanit, ne bëjmë dua edhe për arritjet sportive. Direkt pas stërvitjes ne shkojmë të gjithë bashkë çelim iftarin”- deklaron mbrojtësi i bardhebluve të Tiranës, Erjon Hoxhallari.

Në një sezon jo normal me ndeshje çdo tri ditë si e përballuan lojtarët këtë sprovë?

“Ndeshjet janë të gjitha pasdite dhe është shumë e vështirë që të agjërosh, kështu e kemi prishur ndonjë ditë për ta rikuperuar pas Ramazanit,”- thotë Broja i Partizanit.

“Unë jam besimtar, por jo praktikant. Megjithatë asnjëherë nuk ndërhyj te lojtarët e mi për t’i ndalur për të mbajtur agjërimin, pasi ata janë profesionist. Meritojnë respect ata që po agjërojnë dhe po luajnë futboll,”– shprehet Orges Shehi, tekniku i bardhebluve.

“Kemi qenë në formë shumë të mirë dhe këtë gjë e kanë treguar rezultatet, por gjithmonë kemi qenë të kujdesshëm për të mos cënuar objektivat e klubit dhe për këtë arsye ditën e ndeshjes e kemi ndërprerë agjërimin,”- flet portieri i bardhebluve, Ilior Lika, një besimtar dhe praktikant i hershëm i fesë islame.

Po si shihet një agjërues në një skuadër futbolli?

“Na respektojnë shumë, si lojtarët ashtu edhe trajneri, që në momente të caktura na ka thënë që po e keni të vështirë ta ndalim stërvitjen. Por ne e kemi vazhduar si të gjithë të tjerët, pasi jemi mësuar, tani u bë vite që agjërojmë,”- shprehet Ron Broja.

“Ky Ramazan është ndryshe nga të tjerët, se jam larg familjes. Nga ana shpirtërore, normal që ndihesh më mire, pasi e di që po bën diçka veç për Zotin. Po të ngriti jeta lart, ulu poshtë dhe falendero Zotin,”- thotë portieri prishtinas, Visar Bekaj i Tiranës.