Sport

Drejtësi spanjolle për finalen e madhe mes Manchester City dhe Chelsea

12 Maj 2021, 16:16 Nga DOSJA

ZVICER – UEFA ka zyrtarizuar emrin e gjyqtarit që do të japë drejtësinë në finalen e Champions League, që zhvillohet mes Manchester Cityt dhe Chelseat. Finalja e madhe është planifikuar të luhet më 29 maj në Stamboll, edhe pse vendi është ende në diskutim, për shkak të Covid-19.

Edhe pse duhen më tepër se dy javë, deri në datën e përcaktuar, është mësuar se spanjolli Antonio Miguel Mateu Lahoz, një emër i njohur në futbollin iberik dhe atë ndërkombëtar, do të jetë gjyqtari që do të drejtojë takimin final të garës më të madhe për klube në Europë për edicionin 2020/21.

Fillimisht, Manchester City eliminoi Paris Saint-Germainin në gjysmëfinale me shumë spektakël dhe konsiderohet si favorit në letër. Në anën tjetër, Chelsea kishte barazuar në takimin e parë me Real Madridin, derisa të dytin e fitoi 2-0 në “Stamford Bridge”, për të kaluar kështu në finale.

Trajnerët respektivë, Pep Guardiola dhe Thomas Tuchel, njihen tashmë si dy strategë mjaft të zgjuar dhe që kërkojnë maksimumin nga lojtarët e tyre, duke krijuar përfytyrimin që tifozët të presin një takim të zjarrtë, pavarësisht nëse do të luhet në Stamboll apo Wembly, ku përflitet si mundësi.