AktualitetSociale

Koronavirusi vjen në Shqipëri, hyn në fuqi ‘plani’ i parandalimit, ja masat që po merren (ORË PAS ORE)

  • Urdhri i Manastirliut: Do dënohen ata që nuk vetëkarantinohen
  • Mbyllen shkollat, ministrja Shahini: Nxënësit do mësojnë me WhatsApp
  • Mbyllen përkohësisht çerdhet dhe kopshtet në Tiranë
  • 10 aeroportet e mbyllura në Itali, s'lejohet udhëtimi drejt tyre
  • Anulohen të gjitha udhëtimet me traget drejt Italisë së Veriut
  • Karantina tek Infektivi/ Çfarë ndodh nëse në Shqipëri sëmuren rëndë mbi 4 persona, Spitali s’ka ventilim e as shërbim dialize
  • Merren masat e para për parandalimin e përhapjes së koronvirusit. Janë anuluar fluturimet dhe udhëtimet me traget drejt Italisë, mbyllen shkollat dhe merren masa për të burgosurit. Basha anulon takimet me qytetarët, ndërsa Kuvendi do të vijojë punën normalisht.
    Featured image of article: Koronavirusi vjen në Shqipëri, hyn në fuqi ‘plani’ i parandalimit, ja masat që po merren (ORË PAS ORE) Foto ilustruese

    TIRANË– Qeveria Shqiptare ka akorduar sot një fond prej 400 milionësh lekë për të përballuar sitatën e koronavirusit. Kjo masë e qeverisë është bërë publike në një mbledhje të jashtëzakonshme pas konfirmimit të dy rasteve të para me koronavirus në Shqipëri.

    Autoriteti i Aviacionit Civil ka anuluar të gjitha fluturimet me Italinë dhe të gjitha zonat e tjera të kuqe, ndërsa po e njëjta gjë ka ndodhur edhe në portin e Vlorës, i cili ka anuluar të gjitha udhëtimet me traget.

    Shkollat do të mbyllen për dy javë  dhe çdo aktivitet me shumë njerëz do të anulohet deri në 3 prill për të minimizuar përhapjen. Pritet që të anulohen edhe takimet e të burgosurve me familjarët e tyre. Masat e marra nga qeveria i ka pranuar edhe kryedemokrati Lulzim Basha ka anuluar të gjitha takimet me qytetarët, ndërsa Kuvendi do të vijojë që të mblidhet normalisht. 

    Lidhur me pezullimin e shkollave, në një deklaratë për shtyp ka dalë ministrja e Arsimit, Besa Shahini mësimi do të bëhet nëpërmjet telefonit me ndihmën e mësuesve. Ndërkohë ka theksuar se provimet e Maturës Shtetërore nuk do të shtyhen.

    Për më shumë bëhu pjesë e grupit më viral në Facebook, Dosja.al

    Nga ana tjetër ministrja e Shëndetësisë, Ogerta Manastirliu është shprehur se të gjithë personat që vijnë nga vendet e prekura nga koronavirusi duhet të vetë karantinohen dhe të gjithë ata që nuk e zbatojnë këtë masë do përballen me ligjin. Po ashtu ajo bëri me dije se është ndaluar eksporti i të gjitha barnave, dhe një gjë e tillë do bëhet vetëm me urdhër të posaçëm nga ministri i Shëndetësisë.

    Manastirliu ka treguar sot dhe masën tjetër të qeverisë, që ndalon të gjitha vizitat e familjrarëve në spitale dhe u ka bërë thirrje të gjithë qytetarëve që kur dyshojnë se janë të infektuar të mos shkojnë në spital, por të telefonojnë numrin 127.

    Babë e bir, 54 dhe 28 vjeç, janë dy të prekurit e parë, që tanimë janë izoluar në ambientet e spitalit Infektiv. Sakaq, qeveria ka marrë vendim të anullojë të gjitha udhëtimet drejt Italisë së Veriut deri më 3 prill. Gjithashtu, kryeministri Edi Rama bëri thirrje që të rinjtë të evitojnë daljet në lokale dhe clube, si dhe kontaktin fizik me të moshuarit. Mbyllur deri më 23 mars janë edhe shkollat, kopështet dhe çerdhet, ndërkohë që ka nisur dezinfektimi i të gjitha spitaleve. Pjesë e planit të masave është edhe ndalimi i vizitave nëpër spitale.

    (k.m/dosja.al)

    • 19:41

      “Po e ndjek hap pas hapi situatën”/ Apeli i Metës për qytetarët: S’ka vend për panik, kërkohet përgjegjshmëri maksimale për koronavirusin

      Ilir Meta

      Presidenti i vendit Ilir Meta ka dalë sot para mediave për të apeluar dhe njëherë për përgjegjshmëri maksimale për të përballuar situatën nga koronavirusi pas konfirmimit të dy rasteve të para në Shqipëri. Kreu i shtetit tha para gazetarë se vlerëson angazhimin dhe masat e marra nga institucionet përgjegjëse dhe i ftoi qytetarët ta përballojnë me qetësi këtë situate, duke mos për hapur panik. Meta i bëri apel qytetarëve që të tregohen të përgjegjshëm, ndërsa shtoi se çdo neglizhencë do të ishte e rrezikshme për familjen dhe shoqërinë e gjithsecilit.

      Mbështes personelin mjekësor, mjekët dhe infermierët në mbarë vendin që do iu duhet të përballen me këtë rrezik serioz. Po e ndjek situatën hap pas hapi, do të bëjmë çdo gjë për kalimin sa më të lehtë të kësaj situate.Duhet një plan monitorimi shumë rigoroz, blerja e materialeve mbrojtëse për personelin për të përballuar këtë epidemik. Nuk ka vend për panik, por duhet përgjegjshmëri maksiamle. Plan të detajuar që qeveria duhet të marrë menjeherë në ekonomi. Apeloj për plane të detajuara për çdo strukturë dhe individ. Shoqëria është bashkë përballë këtij rreziku. Çdo qytetar rrezikon jo vetëm jëtën e tij, port ë gjithëve, Në këto momente duhet ët tregojmë përgjegjshmëri maksimale, ndaj nuk duhet ta lejojmë këtë situatë të rrezikojë jetën e qytetarëve tanë”, u shpreh Meta.

    • 17:58

      “Frikë aspak, kujdes shumë”, Rama publikon mesazhin e Trump me shifra, jetët e humbura nga gripi i zakonshëm dhe koronavirusi

      Kryeministri Edi Rama ka publikuar në rrjetet sociale prononcimin e Presidentit të SHBA-ve, Donald Trump. Në një status në profilin e tij në Facebook, Rama shkruan se prononcimi i Trump, i cili bën krahasimin mes jetëve të humbura nga gripi i zakonshëm dhe nga koronavirusi nuk është një thirrje ‘moskokëçarje’. Kryeministri shton se nuk duhet pasur frikë nga përhapja e koronavirusit por që duhet pasur shumë kujdes.

      FRIKË ASPAK, KUJDES SHUMË! Ky prononcim i Presidentit të Shteteve të Bashkuara nuk duhet lexuar kurrësesi si një ftesë për moskokëçarje, por thjesht si një fakt për të mos humbur qetësinë e kthjelltësinë: “Vitin e shkuar 37.000 amerikanë humbën jetën nga gripi i zakonshëm. Mesatarja vjetore e vdekjeve nga gripi (SHBA) është mes 27.000 dhe 70.000 në vit. Asgjë nuk ndalet, jeta&ekonomia vazhdojnë. Në këtë moment janë konfirmuar 546 raste të Coronavirus dhe kanë humbur jetën 22 persona. Mendojeni pak!”- shkruan Rama.

    • 17:47

      Karantina tek Infektivi/ Çfarë ndodh nëse në Shqipëri sëmuren rëndë mbi 4 persona, Spitali s’ka ventilim e as shërbim dialize

      Foto ilustruese

      Me ardhjen në Shqipëri të virusit Covid-19, është rritur frika tek qytetarët për infektimin dhe pasojat nëse preken. Ministria e Shëndetësisë por edhe qeveria shqiptare në bashkëpunim me organet e qeverisjes vendore kanë shpallur gatishmërinë për të përballuar koronavirusin.

      Por a jemi gati?

      Dy të prekurit e parë nga koronavirusi në Shqipëri janë dërguar në Spitalin Infektiv, për t’u trajtuar, ndërkohë që deri më tani s’ka asnjë dritë jeshile për karantinën që do të ngrihej tek “Kavalishenca” në Durrës.

      Ndërkohë që sipas protokollit të Organizatës Botërore të Shëndetësisë, karantinat duhet të kenë sistem ajrimi me cikël të mbyllur, që nëse hapen dritaret, ajri të mos dalë jashtë por të thithet brenda, dhe për më tepër, ajri i kontaminuar të ventilohet dhe filtrohet para se të dalë jashtë.

      Në realitet, të trija katet e spitalit Infektiv ajrosen me dritaren që qëndron hapur. Spitali nuk i është nënshtruar asnjë rikonstruksioni prej shumë vitesh, me kushte që lenë shumë për të dëshiruar.

      Konkretisht, në spitalin Infektiv, ka vetëm 76 shtretër dhe vetëm 4 aparatura të ventilimit mekanik të ajrit që shërbejnë për intubimin e pacientit të prekur. Këto aparatura kryejnë shkëmbimin e dioksidit me oksigjenin kur mushkëritë nuk arrijnë të kryejnë siç duhet punën e tyre.

      Eksperienca e Italisë na tregoi se 9% e pacientëve të prekur me koronavirus, kanë patur të domosdoshëm ventilim mekanik, që është aparatura jetike për frymëmarrjen për ta… atëherë, nëse në Shqipëri paraqiten më shumë se 4 të sëmurë rëndë me Covid-19, ku do t’i trajtojmë?

      Në ambientet e infektivit ndodhen vetëm 4 aparatura, dhe nëse pacienti transferohet në një spital tjetër, atëherë edhe ai spital do të vendoset në karantinë.

      Një tjetër problem për të prekurit nga Covid-19 është se për shkak të insuficencës respiratore akute (problemeve me frymëmarrjen), dhe më pas vendoset në intubim (ventilim mekanik), për mjekët pneumologë, ka gjasa që pacienti të ketë edhe probleme me veshkat. Por spitali Infektiv nuk ofron as shërbimin e Dializës, duke kërkuar kështu transferimin e pacientit, në një spital tjetër, që rrezikon infektimin.

    • 17:37

      Anulohen aktivitetet e Ditës së Verës dhe 100 vjetorit të Tiranës, koronavirusi shtyn për në muajin qershor koncertin e Malumës

      Erion Veliaj

      Kryebashkiaku Erion Veliaj ka lajmëruar anullimin e aktiviteteve të programuara për Ditën e Verës dhe festimit të 100-vjetorit të Tiranës.

      Në mbledhjen e shtabit të emergjencave, Veliaj shtoi se edhe koncerti i Malumës, që ishte programuar për t’u mbajtur në datë 14 mars do të shtyhet për në muajin qershor. Sipas kryebashkiakut janë anuluar të gjitha grumbullimet masive, kulturore, sportive, tubime, koncerte, aktivitete, apo dëgjesa publike deri në datën 3 prill.

      Nëse ka një shqetësim, si ato që vijnë tipikisht në Bashkinë e Tiranës, një lokal që bën zhurmë poshtë pallatit, nuk ka arsye të vish tek zyra e pritjes me qytetarët. Mjafton të na njoftosh, do ia referojmë policisë. Ne duam t’i reduktojmë këto shërbime, kryesisht online ose me telefon. Vijmë ne tek njerëzit, nuk ka nevojë që dikush të vijë dhe të ekspozohet me qindra të tjerë në sallën e Pritjes me qytetarët, ndaj dua t’i theksoj faktit që kemi nr tel 0800-0888, hapur për çdo thirrje,”- u shpreh Veliaj pasi lajmëroi anullimet e aktiviteteve.

    • 17:19

      Veliaj: Reduktojmë orët e punës për punonjësit e bashkisë që kanë fëmijë të vegjël, ja kategoritë që do të marrin leje

      Bashkia e Tiranës do të kufizojë numrin e punonjësve që do të jenë në shërbim me qëllim parandalimin e përhapjes së Coronavirusit. Në mbledhjen e shabit të emergjencave, kryebashkiaku Veliaj shpjegoi edhe kategoritë e punonjësve të Bashkisë që do të marrin leje.

      “Do të bëjmë një kufizim të punonjësve të Bashkisë së Tiranës, sidomos të stafeve që janë mbi 60 vjeç, të cilët fare mirë mund të marrin disa ditë pushim ose ndërprerje të ardhjes në zyrë sepse janë kryesisht moshat e mëdha ato që preken më shumë, ndërkohë që stafet e Bashkisë së Tiranës që janë në mënyrë të vazhdueshme të ekspozuara ndaj palëve të tjera. Do kërkoja t’u japim leje deri në datën 3 prill”, tha Veliaj.

      Si pasojë e ndërprerjes së çerdheve dhe kopshteve, do të ketë lehtësira edhe për ata prindër që kanë fëmijë të vegjël. “Një nga pyetjet që na ka ardhur sot nga qytetarët ka të bëjë me prindërit që kanë fëmijë në kopshte e çerdhe. Porosia ime për Burimet Njerëzore të Bashkisë së Tiranës është që secila drejtori të dakordësojë me stafin e vet; kush duhet të firmosë shkresa në protokoll, mund të vijë një orë në mënyrë që të mos pengojmë rrjedhën e punëve të qytetit, kurse të tjerët mund të bëjnë punë nga shtëpia nëpërmjet kompjuterit. Sigurisht, kam parasysh në mënyrë të posaçme nënat që kanë fëmijë në kopshte e shkolla, çerdhe, pra që janë më të prekura nga kjo situatë”, sqaroi kreu i Bashkisë, teksa i theksoi se shëndeti është mbi gjithçka. “Sot është koha për t’u kujdesur për shëndetin dhe sidomos për fëmijët që do qëndrojnë në shtëpi prej ndërprerjes së procesit mësimor do të doja që Bashkia e Tiranës të ishte e para që vendos këtë etalon, për të liruar sidomos nënat dhe stafin jo esencial që të jenë pranë fëmijëve, duke ardhur 1-2 orë në ditë, për ato që janë le të themi firma të nevojshme apo procedura që Bashkia e Tiranës i ka jetike për avancimin e punës”, sqaroi Veliaj.

    • 17:17

      Veliaj ‘kërcënon’ pronarët e marketeve: Do ketë gjoba të pamëshirshme për ata që abuzojnë me çmimet, nuk tolerojmë një qytet hienash

      Bashkia e Tiranës ka marrë një sërë masash për përballimin dhe ndalimin e përhapjes së Coronavirusit në kryeqytet. Në mbledhjen e Shtabit të Emergjencave të Bashkisë së Tiranës, ku u diskutua për masat e marra për situatën në Tiranë. Gjatë fjalës së tij kreu i Bashkisë së Tiranës tha se do ketë penalizime dhe gjoba për të gjithë pronarët e marketeve që rrisin çmimet e produketeve të tyrë gjatë ditëve të panikut.

      Do jeni të pamëshirshëm me gjoba dhe procedim penal për këdo pronar biznesesh, supermakete dyqane ushqimore që abuzojnë me çmimet. Nuk do tolerojmë më një qytet hienash, rrëzohemi bashkë, por bashkë do ngrihemi“, tha Veliaj.

    • 17:06

      Veliaj sqaron: Varrimet do të zhvillohen, në celebrime vetëm nusja, dhëndri dhe dëshmitarët, ja ç’të bëjnë ata që hipin në urbane

      Bashkia e Tiranës ka marrë një sërë masash për përballimin dhe ndalimin e përhapjes së Coronavirusit në kryeqytet. Në mbledhjen e Shtabit të Emergjencave të Bashkisë së Tiranës, ku u diskutua për masat e marra për situatën në Tiranë, Veliaj prezantoi një sërë vendimesh të rëndësishme, duke filluar nga shkollat, transporti publik etj.

      Kryebashkiaku u bëri thirrje qytetarëve që të tregohen të kujdesshëm me higjienën, ndërsa lajmëroi se krahas çerdheve dhe kopshteve, ka nisur edhe dezinfektimi i autobusëve urbanë. “Kemi filluar të marrim disa masa sa i takon edhe transportit publik. Po dezinfektojmë rrugët dhe autobusët, megjithatë më lejoni të sqaroj diçka: Njeriun nuk e infekton as rruga, as autobusi, por njeriu infekton njeriun. Këshilla që dha sot kryeministri për higjienë personale është ABC-ja e rezistencës ndaj kësaj sfide që na ka ardhur në Tiranë. Ne po bëjmë dezinfektimin e rrugëve, e autobusëve, po një këshillë që vlen për të gjithë është ose të ecim, ose të përdorim biçikletën”, tha ai.

      Duke u ndalur tek konviktet, Veliaj lajmëroi pezullimin e përkohshëm të konvikteve gjer në rifillimin e mësimit. “Ka lindur nevoja që të shpjegoj një rregull që vlen si për shkollat, kopshtet e çerdhet, po ashtu edhe për konviktet. U kërkoj drejtoreshave të konvikteve që të komunikojnë se konviktet nuk do të funksionojnë. Pra, do të aplikojnë udhëzimin e qeverisë dhe urdhërin e Bashkisë së Tiranës për t’i mbyllur deri në datën 3 prill”, deklaroi ai.

      Kreu i Bashkisë u shpreh se masa të forta do të merren edhe për celebrimet, ku përveç çiftit dhe dëshmitarëve të nevojshëm që kërkon ligji, nuk do të lejohen të tjerët. “Kam dhënë një porosi që në të 27 njësitë tona, përveç çifteve që detyrimisht duhet të celebrohen me dëshmitarët e tyre, çdo prani e tepërt familjarësh, kushërinj, dasmorësh, të ruhet për një moment tjetër. Nuk është ky momenti”, tha Veliaj, ndërsa bëri të ditur se në bashkëpunim dhe me komunitetet fetare do të ketë masa edhe për shërbesat. Lidhur me ceremonitë mortore, Veliaj kërkoi mirëkuptimin e qytetarëve për kufizime, veçanërisht të ritit të dhënies së dorës.

      Ka disa aktivitete që tipikisht menaxhohen nga Bashkia e Tiranës siç janë shërbimet funerale. Ka disa tradita shumë të mira shqiptare që ne shkojmë, bëjmë për njëri-tjetrin. Duke qenë se jemi në një situatë emergjente, duhet të shmangim zakonet e dhënies së dorës në tubime të mëdha, kur ngushëllojmë dikë, do të gjejmë mënyra të tjera për të shprehur keqardhjen. Do të duhet që në çdo shërbim funeral, si në Sharrë, edhe në Tufinë, të këshillojmë familjarët që ky nuk është momenti për të bërë ritualin e dhënies së dorës”, sqaroi më tej kreu i Bashkisë Tiranë.

    • 16:57

      Basha jep propozimin: Njërit prej prindërve duhet t’i kompensohet e plotë paga

      Lulzim Basha

      Kryedemokrati Lulzim Basha ka reaguar lidhur me vendimin e qeverisë për mbylljen e shkollave dhe çerdheve për 2 javë. Kreu i PD-së, Basha ka propozuar që njërit prej prindërve duhet t’u kompensohet paga me vlerë të plotë pasi do t’i duhet që të kujdesen për fëmijët.

      “Pas vendimit për mbylljen e shkollave, kopshteve dhe çerdheve, duhet që shteti të paguajë apo kompensojë me vlerë të plotë një nga prindërit në marrëdhënie pune që duhet të kujdeset për fëmijët e vegjël gjatë kohës që çerdhet, kopshtet dhe shkollat qëndrojnë të mbyllura,”-shkruan kryedemokrati.

    • 16:56

      Kosova merr masat, bën gati karantinën në QKUK, dy vajza bëjnë testin, dyshojnë se janë pozitive

      QKUK

      Kosova ka marrë masat urgjente për parandalimin e përhapjes së koronavirusit, pas identifikimit të dy rasteve pozitive në Shqipëri. Teksa mesnatën e djeshme janë konfirmuar 2 të infektuarit, sot në Qendrën Shëndetësore të Kosovës QKUK, dy vajza janë paraqitur për të bërë analizat, pasi dyshonin se mund të jenë prekur nga koronavirusi. Analizat për to pritet të dalin sot gjatë ditës, ndërkohë që në Klinikën Infektive është përgatitur një zonë e ilzoluar me 20 shtretër, e cila do të përdoret si karantinë. Ndërkohë që qeveria Kurti-Mustafa ka vendosur një fond paraprak prej 400 mijë eurosh për të marrë të gjitha masat.

    • 16:30

      Masa shtesë për COVID-19 në doganën e Bllatës në Dibër, hapet karantina në pikën kufitare

      Zyrtarizimi i dy rasteve në orët e para të mëngjesit të kësaj të hëne ka bërë që në pikat doganore të vendit tonë të intenisifikohen kontrollet e personave që hyjnë, nëse janë bartës të virusit COVID-19. Edhe në doganën e Bllatës janë rritur kontrollet, ku ato bëhen njëherësh për disa persona që hyjnë nga shteti fqinj i Maqedonisë së Veriut.

      Drejtori i Njësisë Vendore të Shërbimit Shëndetësor Dibër, Hasan Manja tha se tashmë puna e grupeve të mjekëve të dislokuar aty është më intensive pas shfaqjes së rasteve tashmë edhe në vendin tonë. Ai shtoi se kontrollove tani iu nënshtrohen të gjithë personat që hyjnë, ndryshe nga më parë që kontrolloheshin vetëm të huajt. Manja tha se deri tani nuk ka patur asnjë rast të dyshimtë të të prekurve me koronavirus, ndërsa janë hapur karantina në doganën e Bllatës dhe në Dibër.

    • 14:55

      Balluku: Kemi mbyllur të gjitha udhëtimet me zonat e kuqe, shkëmbimet e mallrave vijojnë normalisht

      Ministrja e Infrastrukturës, Belinda Balluku, ka treguar masat që ka marrë institucioni që ajo drejton për masat kundër koronavirusit. Në një deklaratë për mediat Balluku ka bërë me dije se qeveria ka vendosur që të ndërpresë të gjitha udhëtimet me zonat që janë në zonën e kuqe.

      PJESË NGA DEKLARATA

      Ky është një vendim drastik dhe është marrë në një situatë të jashtëzakonshme që ne për përballemi dhe të ulim sa më shumë rrezikun nga koronavirusi. Ju bëj thirrje që të ruani qetësinë dhe nuk ka asnjë arsye për panik dhe qeveria ka marrë të gjitha masat që të përballemi me këtë epidemi.

      Nuk do ketë pezullim të avionëve kargo, që nisen nga Shqipëria apo vijnë në Shqipëri. Do jetë i hapur linja me aeroportin e Romës, që do shpërbejë si një pikë për të vijuar komunikimin me Italinë. Për sa i përket lëvizjes detare, transportit detar. Kufizime do ketë vetëm për udhëtarët dhe jo për mallrat.

    • 13:42

      Mbyllen shkollat prej koronavirusit, ministrja Shahini: Nxënësit do mësojnë me telefon

      Ministrja e Arsimit, Besa Shahini në një deklaratë për shtyp tha se shkollat do të mbyllen për të frenuar përhapjen e koronavirusit në vend pas dy rasteve të para të konfirmuara. Shahini në fjalën e saj u shpreh se mësuesit do të orientojnë nxënësit për të mësuar nga shtëpia me anë të telefonave ose me video-chat.

      “I kemi orientuar të gjithë drejtuesit e shkollave që të orientojnë nxënësit për detyrat që duhet të bëjnë në javët e ardhshme. Arsyeja e mbylljes së shkollave është frenimi i përhapjes së koronavirusit. Nuk ka nevojë për panik. Kërkoj nga të gjithë që të vetëpërmbahen. Shqetësimi ynë është humbura e orëve të mësimit që do t’i bashkangjiten atyre të tërmetit. Jemi duke bërë një plan që mësuesit të japin instruksione nxënësve që të mësojnë nga shtëpia. Një formë punë është një të bëjmë video-live, po e shqyrtojmë që ta aplikojmë që nesër. Nxënësit të mësojnë në shtëpi pasi është përgjegjësi e juaja dhe e prindërve që në këtë fazë ata të mos mbesin prapa me mësimet. Matura Shtetërore nuk do të ketë nevojë për shtyrje. Të gjitha pyetjet ndër vite i kemi botuar në mënyrë që nxënësit të përgatiten. Duhet të marrim masa njësoj si me tërmetin, sot pasdite kemi marrë një vendim si të adresojmë nevojat e prindërve,”-tha në fjalën e saj Shanini.
    • 13:33

      Koronavirusi në Shqipëri, merret vendimi në lidhje me zhvillimin e dy ndeshjeve të Superiores

      Ardhja e coronavirusit në Shqipëri ka sjellë një sërë masash në vendin tonë për parandalimin e tij, duke parë rastet e shumta dhe përhapjen në gjithë botën. Këtu nuk mund të qëndronte pa prekur edhe futbolli, ndërsa vazhdojnë takimet mes krerëve të FSHF-së dhe qeverisë për të marrë vendimin zyrtar rreth ndeshjeve.

      Stadiumi “Loro Boriçi”

      Por në ditën e sotme ishin programuar për t’u zhvilluar dy ndeshje të rëndësishme në Superiore, Vllaznia-Partizani dhe Skënderbeu-Kukësi. Në minutat e fundit mësohet se këto përballje do të zhvillohen, por pa praninë e tifozëve.

    • 12:59

      Mjeku Tritan Kalo tregon gjendjen shëndetësore të dy pacientëve me koronavirus: Djali është shumë mirë, babai ka pak probleme

      Mjeku Tritan Kalo ka dhënë detaje për gjendjen shëndetësore të ty personave që rezultuan pozitivë me koronavirus. Në një konferencë për mediat, Kalo tha se djali ka nivel oksigjenimi shumë të mirë në mushkri dhe ka temperaturën në nivel mesatar 37.2. Po ashtu mjeku u shpreh se babai tij paraqitet me një nivel më të ulët të oksigjenimit, kjo për shkak se rezulton të jetë duhan pirës.

      Janë në gjendje shumë të mirë, unë vetë personalisht i kam vizituar vetë sot në mëngjes. Djali, ka nivel oksigjenimi shumë të mirë në mushkëri, me temperaturë maksimale 37.2, ka elementë pulmonar të përputhshëm me infeksionin e kësaj natyre.  Ndërsa personi i kontaktit të ngushtë, që është infektuar kishte një oksigjenim pak më të ulët në përputhje me duhanpirjen kronike, por pa temperaturë me elementë shumë të vakët pulmonarë, janë në gjendje shumë të mirë dhe ka nisur mjekimi sapo janë hospitalizuar”, u shpreh mjeku Tritan Kalo.

    • 12:57

      FOTO/ Vendoset perimetri i sigurisë tek Urgjenca e Infektivit në QSUT, brenda saj dy të infektuarit me koronavirus

      Vendoset perimetri i sigurisë tek Urgjenca e Infektivit në QSUT, pasi aty ndodhen  dy personat e prekur me koronavirus. Siç shihet edhe në foton e mëposhtme shirti është vendosur rreth godinës së efektivit të QSUT-të.

      Foto nga QSUT

      Po kështu, mëngjesin e sotëm, ministrja e Shëndetësisë, Ogerta Manastirliu deklaroi se në spitale nuk do të lejohen të futen familjarët apo të afërm të personave të sëmurë, masë kjo për koronavirusin.

    • 12:57

      Ambasadori shqiptar në Kinë jep MESAZHIN: Stop gallatës se jemi ‘racë e fortë’! Shkunduni para se…

      Selim Belortaja

      Ambasadori i Shqipërisë në Kinë, Selim Belortaja ka reaguar lidhur me konfirmimin e dy raste me koronavirus në Shqipëri. Me anë të një statusi në Facebook, Belortaja shkruan se ishte thjesht çështje kohë që edhe Shqipëria të shënonte raëstet e para për shkak të marrëdhënies së ngushtë me Italinë. Diplomati shqiptar bën thirrje për kujdes nga qytetarët pasi në të kundërt pasojat do të jenë të rënda.

      “Stopin e ..qyfyreve, kunjave e shakave tona bajate, të folklorizmave si ..“është si punë gripi, po ..një çikë me i fortë se gripi”! apo “jemi rracë e fortë”; te këshillave qesharake si ….”hani limona e pini raki”! “është kot kjo e kot ajo…”, etj.,”-shkruan në statusin e tij ambasadori.

      POSTIMI I PLOTË:

      Asgjë e re s’ka ndodhur. Ato 2-3 ishujt e vegjël s’mund të qëndronin për shumë kohë gri. Me Italinë ne ishim thuajse “njësh” me avionat dhe tragetet e përditëshme. Bashkimi me “hartën e kuqe” aty ishte, sot vetëm sa u zyrtarizua. Kjo eshte keq sigurisht, por ka dhe një të mirë: uljen tonë me këmbë në tokë! Mbylljen e stacionit të ..Gallatës! Stopin e ..qyfyreve, kunjave e shakave tona bajate, të folklorizmave si ..“është si punë gripi, po ..një çikë me i fortë se gripi”! apo “jemi rracë e fortë”; te këshillave qesharake si ….”hani limona e pini raki”! “është kot kjo e kot ajo…”, etj. Ngjeshjes e gajasjes sonë të papërgjegjëshme nëpër kafe, restorante, salla, stadiume dhe autobuza edhe ..për 1 stacion! Të gjithë duhet të shkundemi. Ndryshe doemos ..do të na shkundë

    • 12:12

      Ministrja Manastirliu flet me SHIFRA: Po presim analizat e 14 personave, kanë pasur kontakte me 2 të infektuarit

      Ministrja e Shëndetësisë, Ogerta Manastirliu ka dhënë shifrat e analizave të kryera për koronavirusin në vend. Në një deklaratë për mediat, Manastirliu u shpreh se deri më tani janë kryer 65 analiza dhe po priten rezultatet e 14 të tjerave, të cilët kanë pasur kontakte me dy personat që kanë rezultuar pozitivë.

      “Janë testuar deri më tani 65 raste. Dy prej të cilëve janë positivë, në proces testimi janë 14 raste që kanë pasur kontrate të afërta me dy rastet pozitive,”-u shpreh ministrja.

    • 12:36

      Me RËNDËSI/ Ky është ilaçi i vetëm që deri më tani lufton koronavirusin

      Foto ilustruese

      Koronavirusi ka përfshirë mbi 100 territore të tjera nëpër botë jashtë Kinës, duke përhapur panik për të gjithë banorët, sepse ende nuk ka një njoftim nga ekspertët për krijimin e vaksinës që lufton këtë virus vdekjeprurës.

      Ndërkohë nga shumë ekspertë të shëndetësisë është deklaruar se ilaçi kundër Ebolës është një ndër medikamentet më efektive për trajtimin e koronavirusit.

      Gjithashtu së fundmi ky lajm është konfirmuar edhe nga Organizata Botërore e Shëndetësisë, duke marrë shkas nga përmirësimi që pacientët e prekur ndjenë pas përdorimit të “Remdesivir”.

      Ky ilaç “Remdesivir”,  i prodhuar nga kompania amerikane “Gilead Science” ka dhënë më shumë efekt sesa kundër HIV-it. Në këtë mënyrë Remdesivir është ilaçi më efektiv. Ky është një ilaç eksperimental i zhvilluar për të luftuar virusin Ebola.

      “Tani ekziston vetëm një ilaç që ne mendojmë se mund të ketë efikasitet kundër koronavirusit dhe ne mendojmë se është Remdesiviri.”- deklaroi në Pekin ndihmësi i drejtorit të përgjithshëm të OBSH-së Bruce Aylward.

      Ndërkohë kompania prodhuese “Gilead” ka nisur bashkëpunimin me autoritetet shëndetësore kineze prej muajit janar, duke testuar pacientët me koronavirus. Edhe Instituti Amerikan i Shëndetit në SHBA (NIH) ka bërë me dije se Remdesivir mund të parandalonte koronavirusin edhe tek majmunët.

      Ky ilaç lehtëson sistemin e frymëmarrjes dhe funksionimin e mushkërive. Të paktën tek kafshët e infektuara, Remdesivir përmirësoi ndjeshëm gjendjen shëndetësore të tyre.

    • 12:02

      Mbyllen përkohësisht çerdhet dhe kopshtet në Tiranë, Veliaj: Po dezinfektojmë të gjitha institucionet, do ia dalim

      Foto ilustruese

      Kryebashkiaku i Tiranës ka njoftuar mbylljen e të gjithë çerdheve dhe kopshteve në kryeqytet, si shkak i dy rasteve të para të koronavirusit që u konfirmuan në Shqipëri.

      Në zbatim të planit të masave të marra për parandalimin e prekjes nga COVID 19, Veliaj ka theksuar të gjithë çerdhet dhe kopshtet në kryeqytet do të qëndrojnë të mbyllura përkohësisht. Në të njëjtën kohë Bashkia e Tiranës po vijon me ritëm te lartë dezinfektimet në këto institucione parashkollore që të jenë të gatshëm për rihapjen e tyre, deri në një njoftim të  dytë.

      “Vendimi për shkollat vlen edhe për kopshtet e çerdhet! Edhe pse fëmijët nuk paraqesin rrezikshmëri, mund të jenë bartës që prekin më pas gjyshërit e tyre që janë me të rrezikuar. Ndërkohë po vijojmë dezinfektimet që të jemi gati kurdo që vendoset rihapja #DoJaDalim.”- është shprehur Veliaj.

    • 11:43

      Koronavirusi në Shqipëri, AMA thirrje mediave: Informoni qytetarët me lajme të sakta, jeni të detyruara të transmetoni dhe spotet pa shpërblim

      Autoriteti i Mediave Audiovizive ka bërë sot një njoftim në lidhje me informacionet që kanë qarkulluar në orët e fundit, kur në Shqipëri janë konfirmuar dy rastet e para me koronavirus. Në një reagim AMA, shkruan se në përmbajtjet e transmetuara nga mediat audio dhe audiovizive, së fundmi, pjesa më e madhe e informimit dhe diskutimit lidhet dhe me përhapjen e Koronavirusit, masat parandaluese për publikun, kushtet dhe trajtimi për të prekurit nga ky virus. “Subjektet audio dhe audiovizive duhet të mbajnë parasysh dhe zbatimin e kërkesave të rregullores për transmetimin pa shpërblim të informacioneve, mesazheve dhe njoftimeve me interes të lartë për publikun e gjerë, miratuar me vendim të AMA”, shkruhet më tej në njoftim.

      NJOFTIMI I PLOTË

      Në përmbajtjet e transmetuara nga mediat audio dhe audiovizive, së fundmi, pjesa më e madhe e informimit dhe diskutimit lidhet dhe me përhapjen e Koronavirusit, masat parandaluese për publikun, kushtet dhe trajtimi për të prekurit nga ky virus, të dhëna nga institucionet e specializuara dhe ekspertët, shifra mbi viktimat në rang global etj. Duke e konsideruar median audio dhe audiovizive me një rol e ndikim të jashtëzakonshëm në informimin dhe edukimin e popullatës në kushtet e kërcënimit nga përhapja e epidemive në shkallë të gjerë, AMA ka besim se redaksitë e tyre do të vijojnë të jenë në nivelin e kërkuar profesional dhe etik për mbulimin e kësaj situate të pazakontë.

      Informacionet dhe të dhënat do të jenë të verifikuara, ndërkohë që trajtimet dhe udhëzimet me natyrë higjenike dhe shëndetësore do të bazohen tek ekspertët e fushës – elementë këto që evitojnë dhe refuzojnë lajmet e rreme dhe të pabazuara që shkaktojnë dhe stimulojnë panik dhe trazim të panevojshëm tek ndjekësit e transmetimeve audio dhe audiovizive. Subjektet audio dhe audiovizive duhet të mbajnë parasysh dhe zbatimin e kërkesave të rregullores për transmetimin pa shpërblim të informacioneve, mesazheve dhe njoftimeve me interes të lartë për publikun e gjerë, miratuar me vendim të AMA nr. 76 datë 04.04.2016. Në nenin 6, pika 4, përcaktohet se këto subjekte janë të detyruara të transmetojnë pa shpërblim edhe “informacione, mesazhe, thirrje të Ministrisë së Shëndetësisë, që lidhen me mbrojtjen e shëndetit të popullsisë në një situatë të jashtëzakonshme, për rastet e epidemive e sëmundjeve ngjitëse, që përhapen shpejt dhe përbëjnë rrezik për komunitetin, si dhe mesazhet që lidhen me dhurimin vullnetar e falas të gjakut. …”

    • 11:28

      Koronavirusi mbërrin në Shqipëri, anulohet koncerti i Malumës në Tiranë

      Këngëtari, Maluma.

      Të gjithë fansat e Malumës ishin në pritje të koncertit madhështor, që ishte planifikuar me detaje dhe pritej të zhvillohej në 14 mars. Por, mbërritja e virusit vdekjeprurës në Shqipëri ka bërë që të anulohet dhe koncerti, që pritej të ishte me standarde botërore. Ky njoftim ka mbërritur nga Drejtoria e Përgjithshme e Transportit Rrugor, e cila ka njoftuar anulimin e të gjithë aktiviteteve për Ditën e Verës.

      “Çdo gjë sipas udhëzimeve te qeverisë. Higjienë, kujdes në arka e sportele dhe anulim i aktiviteteve që kishim për Ditën e Verës dhe eliminimin e mbledhjeve e takime/trajnime masive si dhe kontroll më i përforcuar i ekipit për simptoma të ndryshme. Si një drejtori e madhe shërbimesh me shumë kontakte shkresore e fizike me qytetarët, do bëhet kujdes i shtuar me higjienën,”- është njoftimi i Drejtorisë së Përgjithshme të Shërbimit të Transportit Rrugor.

      Për më tepër, në njoftimin e tij, kryeministri i Shqipërisë, Edi Rama njoftoi ‘izolimin’ e vendit deri më 3 prill.

      “Masat e sotme janë pezullimi i fluturimeve direkte në të gjitha zonat e kuqe deri në 3 prill, do mbyllen shkollat për një periudhë dyjavore. Për këtë arsye ne besojnë se është momenti që të mbyllim të gjitha institucionet arsimore dhe të kërkojnë anullimin e  të gjitha grumbullimeve masive deri në datën 3 prill për ta parë dinamikën e këtij zhvillimi,”-thuhej në fjalën e kryeministrit.

    • 11:19

      Dy të infektuar me koronavirus në Shqipëri, Basha ndjek këshillat e Ramës, anulon të gjitha takimet

      Kryetari i Partisë Demokratike Lulzim Basha ka vendosur anulimin e dy aktiviteteve publike të parashikuara për pasditen e sotme për shkak se dy persona rezultuan pozitivë me koronavirus. Basha do të zhvillonte një aktivitet me gratë shqiptare në Kalanë e Tiranës për të vlerësuar kontributin e tyre në shoqëri, aktivitet në të cilin pritej që të merrnin pjesë 300 gra dhe vajza.  I njëjti vendim u mor edhe dëgjesën me mësuesit, takim ky i planifikuar për në orën 15.00. Mesa duket kryedemokrati Lulzim Basha po ndjek rregullat e vendosura nga qeveria Rama, me qëllim parandalimin e përhapjes së koronavirusit. Kryeministri Rama tha se do të ndalohej çdo aktivitet me shumë persona pjesëmarrjes deri më 3 prill.

    • 10:40

      Autoriteti i Aviacionit Civil njoftim të rëndësishëm: Ja 10 aeroportet e mbyllura në Itali, nuk lejohet udhëtimi drejt tyre

      Autoriteti i Aviacionit Civil ka bërë sot një njoftim me rëndësi për të gjithë qytetarët që dëshirjnë të udhëtojnë drejt Italisë. Në një reagim AAC  shkruan se në itali janë 10 aeroporte të cilat nuk lejojnë udhëtime hyrëse dhe të gjithë qytetarët duhet t’i shmangin ato pasi janë në zonën e kuqe. Aeroportet e mbyllura janë Malpensa; Bergamo; Bologna; Firenze; Genoa; Perugia; Pisa; Rimini; Venezia dhe Verona

      NJOFTIMI I PLOTË

      Në vijim të situatës së krijuar në Itali për shkak të përhapjes së COVID-19, masave të marra nga qeveria italiane për vendosjen e karantinës në veri të Italisë, si dhe masave parandaluese të përhapjes së virusit në vendin tonë, në zbatim të urdhrit të Ministrisë së Infrastrukturës dhe Energjisë, ndalohen të gjitha fluturimet për dhe nga Aeroporti Ndërkombëtar “Nënë Tereza” dhe: Aeroporti Milano Malpensa (MXP); Aeroporti Milano Bergamo (BGY); Aeroporti Bologna (BLQ); Aeroporti Firenze (FLR); Aeroporti Genoa (GOA); Aeroporti Perugia (PEG); Aeroporti Pisa (PSA); Aeroporti Rimini (RMI); Aeroporti Venezia (VCE) dhe Aeroporti Verona (VRN)

      Autoriteti Aviacionit Civil ka lëshuar menjëherë udhëzimin drejtuar Aeroportit Ndërkombëtar “Nënë Tereza” dhe ofruesit të shërbimit të lundrimit ajror “Albcontrol” për nxjerrjen e njoftimeve të nevojshme për zbatimin e këtij kufizimi të fluturimeve për/nga aeroportet e lartpërmendura, deri në një njoftim të dytë.

    • 10:37

      Mbyllen shkollat prej koronavirusit, Besa Shahini qetëson prindërit: Fëmijët s’janë grupmoshë e rrezikuar

      Ministrja e Arsimit, Besa Shahini ka përsëritur se të gjithë institucionet arsimore do të mbyllen për një periudhë dy javore, deri më 23 mars 2020. Sipas Shahinit, masa për mbylljen e shkollave është marrë për frenimin e përhapjes së virusit COVID-19, i cili është shfaqur në dy raste në Shqipëri.

      “Masa është parandaluese dhe frenuese – nuk ka asnjë nevojë e arsye për panik. Po tregohemi shumë të kujdesshëm që të zvogëlojmë maksimalisht mundësinë e përhapjes së këtij virusi. Mbani mend që fëmijët dhe të rinjtë nuk janë grupmoshë e rrezikuar nga virusi, por mund të jenë bartës,“-shkruan ndër të tjera Shanini. 

      POSTIMI I PLOTË: 

      “U vendos nga Task Forca për Koronavirusin që të mbyllen institucionet arsimore për periudhë dy javore, deri më 23 mars 2020. Kjo për arsye frenimi të përhapjes së virusit COVID-19, i cili është shfaqur në dy raste në Shqipëri. Masa është parandaluese dhe frenuese – nuk ka asnjë nevojë e arsye për panik. Po tregohemi shumë të kujdesshëm që të zvogëlojmë maksimalisht mundësinë e përhapjes së këtij virusi. Mbani mend që fëmijët dhe të rinjtë nuk janë grupmoshë e rrezikuar nga virusi, por mund të jenë bartës. Ndaj, do të pezullohet mësimi në institucionet arsimore. Masat që secili prej nesh duhet të ndërmarrë individualisht: • Të lajmë duart shpesh për 20 sekonda; • Të evitojmë takimin deri në 1 m largësi; • Të evitojmë grumbullimet e njerëzve. Për më shumë informacion, pak më vonë do të mbaj një konferencë për shtyp.”

    • 10:30

      Mbledhje urgjente Drejtoria e Burgjeve, pritet të anulohen takimet e të burgosurve me familjarët

      Foto ilustruese

      Drejtoria e Përgjithshme e Burgjeve do të zhvillojë një mbledhje të jashtëzakonshme lidhur me situatën e koronavirusit në vend. Pritet që të anulohen të gjitha takimet e të burgosurve me familjarët e tyre.

    Shto Koment