Edi Rama
FINIQ- Ultimatumi i kryeministrit Edi Rama ka nisur që të zbatohet në të gjitha Bashkitë e vendit, por ndryshe nga gjithë të tjerët kryebashkiaku i Finiqit, Romeo Çakuli duket se ka gjetur kohën për të bërë batuta.
Kur Rama kërkoi dorëheqjen kolektive të të gjithë drejtorëve vendorë Çakuli, ia ktheu me humor duke i thënë që do i shkarkoj dhe do i rikthej pas një jave.
"Do i shkarkoj dhe do i rikthej pas një jave!" tha Çakuli.
Përveç Çakulit edhe kryetari i Bashkisë së Konispolit, Ergest Dule, ka refuzuar të shkarkojë drejtorët në varësi të tij, pas urdhërit të Ramës. Sipas Report TV, Dule ka patur dhe debat me kryeministrin Rama gjatë takimit me kryebashkiakët në Durrës.
Dule është shprehur se drejtorët janë të rinj dhe të aftë në punë. Nga ana tjetër, kryeministri i është përgjigjur duke thënë që të japë vetë Dule dorëheqjen nëse nuk i shkarkon.
Këto largime vijnë pas ultimatumeve dhe kërkesave të kryeministrit Edi Rama, i cili disa ditë më parë në takimin me kryebashkiakët në Durrës, tha se duhet të shkarkohen të gjithë kryetarët e Njësive Administrative në të gjithë Republikën e Shqipërisë.