Punimet në Berat në kohë fushate/ Kandidati i “Bashkë Fitojmë” bllokoi punimet, Bashkia: Rruga po ndërtohet nga Fondi Shqiptar i Zhvillimit

Asfalti elektoral mbrem

BERAT- Bashkia Berat ka komentuar incidentin që ka ndodhur mbrëmjen e kaluar, ku në fshatin Velabisht po hidhej asfalt elektoral. Bashkia me anë të një njoftimi bën se dije se ky projekt po ndërtohet tërësisht nga Fondi Shqiptar i Zhvillimit. Po ashtu theksohet se momentalisht janë 4 projekte të mbështetura nga FSHZH dhe janë duke u implementuar.

Deklarata e Bashkisë së Beratit:

Kandidati i Sali Berishës dhe Ilir Metës i ndjekur nga grupi që e rrethon në padije të theksuar ndaj projekteve për Beratin është përpjekur mbrëmë të ndalojë punën për zhvillimin e një zone dhe vazhdimin e projektit për rehabilitimin e rrugës së njësisë Velabisht, një rrugë jetike për banorët e kësaj zone.

Ismaili dhe disa ndjekës te tij bllokuan dje me arrogancë dhe në mënyrë të paligjshme punën për shtrimin e rrugës së Velabishtit. Kjo rrugë po ndërtohet tërësisht nga Fondi Shqiptar i Zhvillimit dhe nënkontraktuesit e tij. Prej vitesh bashkia e Beratit i ka kërkuar mbështetjen e qeverisë për këtë rrugë të shumëpritur për banorët e Velabishtit për shkak të kushteve të vështira të saj.

Çdo punim që po bëhet në këtë rrugë, bëhet nëpërmjet marrëveshjes përkatëse së Bashkisë Berat dhe FSHZH si dhe lejes së dhënë. Në Berat momentalisht janë 4 projekte të mbështetura nga FSHZH duke u implemetuar dhe një prej tyre është edhe rruga e Velabishtit.

Bashkia e Beratit është 24 orë në punë në çdo ditë në këto 4 vite dhe do të vazhdojë të jetë 24 orë, ditën dhe natën, për të përfituar dhe implementuar projekte të tilla për përmirësimin e infrastrukturës së Beratit, ndryshe nga ata që dalin natën për të bllokuar zhvillimin e tij.

Bashkia është dhe do të jetë çdo ditë në shërbim te qytetarëve para, gjatë dhe pas zgjedhjeve.  Ky eshte modeli qe ka ndryshuar rrënjësisht Beratin këto 4 vitet e fundit dhe një gjë është e sigurt, nuk ka më kthim mbrapa. Banorët e njësisë Velabisht i shohin me neveri këto veprime primitive dhe e kanë të qartë se cilin prej dy modeleve do të zgjedhin në 14 maj.

Mbrëmjen e kaluar kandidati i koalicionit 'Bashkë Fitojmë' Zija Ismaili për kryebashkiak në Berat ka denoncuar hedhjen e asfaltit elektoral në rrugën e fshatit Velabisht. Ngjarja ka ndodhur gjatë mesnatës së kaluar, ku mjetet punonjëse ishin pa targa dhe pa tabelë njoftuese për punën e bërë.

Tensionet ne Berat

BERAT- Një “incident” ka ndodhur mesnatën e kaluar në Berat, ku disa persona po tentonin që të hidhnin asfalt elektoral në Velabisht. Banorët teksa kanë vënë re ngjarjen kanë njoftuar kandidatin e koalicionit 'Bashkë Fitojmë' për bashkinë e Beratit Zija Ismaili. Ai ka shkuar në vend dhe ka konstatuar se një mjet pa targa po shtronte rrugën, ndërkohë që nuk ka pasur asnjë tabelë informuese për punimet.

“Në njësinë administrative të Velabishtit, një nga njësitë më të mëdha në Berat. Po kthehesha nga një takim elektoral dhe më thonë që ka një denoncim nga qytetarët se në Velabisht ka ardhur një mjet pa targa që po hedh bitum. Është hera e dytë që e bëjmë këtë denoncim. Vijmë këtu bashkë me dy deputetët e qarkut të Berat. Nuk ka asnjë tabelë informuese për punimet në këtë rrugë, sipas ligjeve në fuqi.Tabela duhet të tregonte datën e fillimit të punimeve, përfundimin e punimeve, kush është firma që bën punimet. Banorët janë shumë të irrituar pasi nuk ka transparencë për punimet që po bëhen. Ne erdhëm menjëherë, ndaluam shoferin dhe i kërkuam të na thotë pse në këtë orë punime dhe në emër të kujt. Më pas erdhën makina të shumta policie, oficerë të operacionales, civilë dhe të policisë së Shtetit”, tha Ismaili.

Ismaili më tej shtoi se qytetarët duan investime dhe jo që të vidhen natën.

"Qytetarët duan investimet, transparencën se kanë paguar taksat. Këta duan t'u grabisin votat natën, në errësirë. Ne jemi në krah të qytetarëve dhe do t'i mbështesim ata", tha ai. 

I pranishëm ishte dhe deputeti Tomor Alizoti ku tha se për punimet nuk ka asnjë tabelë informuese dhe se nuk dihet as shuma që është investuar. 

"Si mund të bëhet një rrugë pa kanalizime. Nuk ka transparencë, nuk ka tabelë informuese, nuk dihet vlera e investimit. Vetëm tre ditë para zgjedhjeve. Policia këtu është për të intimiduar njerëzit, njerëzit nuk e pranojnë këtë", theksoi Alizoti.

'Ne kemi të gjithë shtetin kundër, kemi të mafian kundër'- shton më tej Alizoti.

'S'kemi besim te policia e Çuçit ne'- thotë një qytetar në video.

Ata kanë debatuar edhe me forcat e rendit që mbërritën aty për të mos lejuar bllokimin e punimeve nga qytetarët dhe përfaqësuesit e opozitës. 

Ky është incidenti i disatë që ndodh gjatë fushatës elektorale./Dosja.al

Pamje nga Berati

BERAT- Partia Demokratike ka ndaluar një mjet që po shtron asfalt në një rrugë të Beratit. Pamjet nga vendi ku ka ndodhur "ndalimi" i ka shpërndarë vetë kandidati i koalicionit "Bashkë fitojmë", Zija Ismaili. Në pamje duket mjeti që ka ndalur, ndërsa në vendin e ngjarjes kanë mbërritur dhe forcat e Policisë së Shtetit.

"Vetëm sekti hajdut i Rilindjes mund t'i bëjë këto krime zgjedhore në mesnatë! Berati do i ndëshkojë në mënyrën më të merituar në 14 Maj! Asgjë nuk e ndal Ndryshimin dhe Fitoren e Dr.Zija Ismailit,"-është bërë me dije në reagimin zyrtar nga Partia e Lirisë lidhur me rastin.

Megjithatë kjo nuk është hera e parë që ndodh fenomeni i të ashtuquajturit "asfalt elektoral".