Përplasja Spiropali-Bardhi/ Kryeparlamentarja: Forca e dhuna fizike nuk imponohen si e drejtë demokratike! Kreu i Grupit të PD: Mosbindja civile nuk është ti bindesh Pëllumb Gjokës dhe krimit

gazment bardhi, elisa spiropali

TIRANË- Kreu i Grupit Parlamentar të Partisë Demokratike, Gazment Bardhi i është përgjigjur kryetares së Kuvendit, Elisa Spiropalit pas postimit të saj për "Mosbindjen Civile". Bardhi duke ironizuar shkruan në një postim në "X", se Pëllumb Gjoka ka dhënë leksione përmes zyrës së Kuvendit për konceptin e "Mosbindjes Civile". Ai më tej shprehet se realisht  mosbindja civile nuk është ti ulesh në gjunjë Pëllumb Gjokës dhe as krimit të organizuar.

"Na paska dhënë leksion nga burgu Pëllumb Gjoka përmes zyrës për shtyp të Kuvendit se cili është kuptimi filozofik i “mosbindjes civile”! Mosbindja civile në kuptimin e Pëllumbave në Kuvend është që krimi i organizuar të shpërfill ligjin dhe të mbretërojë në çdo institucion! Por realisht, mosbindja civile nuk është ti ulesh në gjunjë Pëllumb Gjokës! As krimit të organizuar! ", shkruan Bardhi.

Spiropali shprehej se koncepti i opozitës për mosbindje civile, që ajo thotë se përfshin dhunë dhe përplasje fizike, nuk mund t'i imponohen Kuvendit si e drejtë demokratike.

elisa spiropali

TIRANË- Kryetarja e Kuvendit, Elisa Spiropali ka reaguar pas kaosit brenda dhe jashtë Kuvendit dhe për protestën e deputetëve të opozitës. 

Në postimin e saj në Facebook, Spiropali ka rreshtuar disa shpjegime sipas saj lidhur me aktin e "Mosbindjes Civile".

Më poshtë, shprehet se koncepti i opozitës për mosbindje civile, që ajo thotë se përfshin dhunë dhe përplasje fizike, nuk mund t'i imponohen Kuvendit si e drejtë demokratike.

REAGIMI I SPIROPALIT: 

Mosbindja civile është një nga krijimet më të bukura të angazhimit qytetar e politik në historinë e njerëzimit.

Thelbi i saj i pandryshueshëm, qysh me Sokratin në Greqinë e Lashtë, i cili predikonte vënien në pikëpyetje të së drejtës morale të autoriteteve për një ligj të padrejtë, e deri tek Mahatma Gandi.

Ai e gjunjëzoi Perandorinë Britanike, duke u ulur i pari në gjunjë derisa me miliona vetë u ulën pas tij në rrugët e Indisë. Ballë për ballë grykëve të pushkëve të batalioneve të regjimit kolonial. I cili hapte zjarr në trupat e tyre dhe të mosbindurit civilë nuk lëviznin nga vendi, është refuzimi absolut, i dhunës si mjet për imponimin e një të drejte të mohuar.

Beteja të tëra epike të njerëzimit për heqjen e skllavërisë, të drejtën e votës për gratë, anullimin e ligjeve raciste, fundin e aparteidit në Afrikën e Jugut, u furnizuan me energjinë e pandalshme morale dhe rezistencën e hekurt shpirtërore të mosbindjes civile.

Mosbindja civile e përjashton kategorikisht ngritjen e dorës për të demonstruar forcë dhe synon krijimin e një kontrasti moral paralizues, mes trupave të protestuesve paqësorë dhe korpusit të një padrejtësie shtetërore të perceptuar si të tillë nga shoqëria.

Mosbindja civile mishërohet nga individë që i kundërvihen ligjërimit të një padrejtësie, duke marrë përsipër ta thyejnë paqësisht ligjin e padrejtë dhe duke pranuar paqësisht pasojën personale të shkeljes së atij ligji.

Mosbindja civile përmes guximit po edhe sakrificës vetjake, i kontribuon arritjes së zgjidhjes me drejtësi, jo përmes dhunës, po përmes masivizimit të ndjeshmërisë popullore që në fund ia del ta imponojë të drejtën e mohuar, si një lloj shah mati për autoritetet.

Kjo është, me fjalë të shkurtra, përmbajtja e konceptit të mosbindjes civile dhe kështu e ka çarë rrugën e historisë forca krijuese e mosbindjes civile, në një sërë ngjarjesh të jashtëzakonshme politike e shoqërore për liritë e të drejtat njerëzore.

Asgjë më e largët me përmbajtjen e thellë morale dhe formën cfilitëse të durimit të mosbindjes civile, nuk mund të imagjinohet dot, se sa përçudnimi i dhimbshëm i opozitarizmit politik e mediatik të kësaj vjeshte.

Keqardhje e madhe!

Por sidoqoftë, forca e dhuna fizike, përplasjet trupore, kërcënimet verbale, djegia e shkatërrimi, apo çfarëdo shprehje e përfshirë së fundmi nga opozitarët tanë në konceptin e “Mosbindjes Civile”, nuk mund t’i imponohen dot kurrë Kuvendit të Shqipërisë si të drejta demokratike të askujt.

gazment bardhi

TIRANË- Kreu i Grupit Parlamentar të Partisë Demokratike, Gazment Bardhi ka reaguar sërish për incidentin e ndodhur sot jashtë Kuvendit, ku opozita pretendon se një nga policët ka tentuar të nxjerrë armën ndaj deputetëve. 

Në një postim në Facebook, Bardhi shkruan se policia që tha sot se efektivi i Forcave Speciale nuk kishte armë brenda Kuvendit, e njëjta që sipas tij ka mashtuar me vdekjen e Klodian Rashës, Egli Progës dhe që ka thënë se në protestën e 7 tetorit nuk pati protestues të lënduar. 

Më tej ai shkruan se propaganda dhe dezinformimi nuk e mbulojnë dot të vërtetën. Bardhi thotë se "sot shteti personal i Edi Ramës degradoi në mashtrim, për shkak se doli zbuluar ashtu siç është -shtet arbitrar policor!"

POSTIMI I PLOTË: 

Është e njëjta Polici që tha sot se polici i Forcave Speciale nuk kishte armë brenda Kuvendit, ajo që më parë na ka thënë:

Që i ndjeri Klodian Rasha ishte i armatosur prandaj e vrau Policia e Shtetit - GËNJESHTËR,

Që i ndjeri Egli Proga vdiq se ishte i dehur dhe u rrëzua - GËNJESHTËR,

Që në Shqipëri ka zero sipërfaqe të mbjella me kanabis - GËNJESHTËR, apo

Që në protestën e 7 Tetorit nuk kishte asnjë protestues të lënduar dhe që ndodhej në spital - GËNJESHTËR, e plot e plot të tjera.

Gënjeshtrat i sajojnë aq trashë, sa edhe vetë propaganda e Qeverisë që Shqipëria është vend në lulëzim e sipër, ndërkohë që jemi të parët në Europë për numrin e qytetarëve në varfëri ekstreme.

Propaganda dhe dezinformimi nuk e mbulojnë dot të VËRTETËN! Sot shteti personal i Edi Ramës degradoi në mashtrim, për shkak se doli zbuluar ashtu siç është -shtet arbitrar policor!