Moti i keq në vend/ Dëbora mbulon disa zona në veri të vendit, flota e peshkimit në Durrës pezullohet për tre ditë, reshjet intensive të shiut shkaktojnë probleme në autostradën Milot - Qafë-Kashar

Dëbora

TIRANA- Autoriteti Rrugor Shqiptar ka bërë apel ndaj drejtuesve të mjeteve që të kenë kujdes të shtuar gjatë drejtimit të mjetit për shkak të lagështisë në rrugë.

Lidhur me situatën e shkaktuar nga moti i keq në vend, ARRSH shkruan në një postim në rrjetet sociale se reshje shiu me intensitet mesatar kanë përshkuar vendin duke sjellë rënie gurësh e inertesh të cilat janë pastruar menjëherë pa sjellë probleme në qarkullim.

ARRSH shton se në akset Ura e Zapodit-Shishtavec, në Bogë-Theth dhe në Tamarë-Vermosh ka pasur reshje dëbore, por grupet e punës me mjetet borëpastruese janë në terren dhe kanë bërë pastrimin e rrugës.

POSTIMI:

Reshje shiu me intensitet mesatar kanë përshkuar vendin duke sjellë rënie gurësh e inertesh të cilat janë pastruar menjëherë pa sjellë probleme në qarkullimin e mjeteve:

Në Ura e Zapodit-Shishtavec, në Bogë-Theth dhe në Tamarë-Vermosh ka pasur reshje dëbore,

Grupet e punës me mjetet borëpastruese janë në terren dhe kanë bërë pastrimin e rrugës,

Drejtuesit e mjeteve të kenë kujdes të shtuar gjatë drejtimit të mjetit për shkak të lagështisë në rrugë.

Foto nga vendi i ngjarjes

KUKËS- Zona e Kukësit është përfshirë nga reshje shiu me intensitet mesatar, shoqëruar me erë ditën e sotme. Bëhet me dije se si pasojë e këtyre kushteve të motit të gjitha akset nacionale rrugore vazhdojnë të jenë nën trysninë e rënies së gurëve dhe inerteve duke krijuar vështirësi të përkohshme në qarkullimin normal të mjeteve në disa segmente rrugore.

Gjithashtu mësohet se nuk furnizohen me energji elektrike njësitë administrative Margegaj, Bytyq në Bashkinë Tropojë. Po ashtu proleme ka në njësitë administrative Golaj, Qendër Krumë në Bashkinë Has. Nga ana tjetër raportohet për probleme në njësitë administrative Shishtavec, Topojan, Zapod, Bashkia Kukës.

Dëbora

VERMOSH- Moti i keq ka përfshirë sërish një pjesë të vendit ditën e sotme. Mësohet se reshjet e dendura të dëborës kanë përfshirë zonën e Vermoshit.

Nga kjo situatë bëhet me dije se autoritetet kanë angazhuar borëpastrueset për të lehtësuar kalimin e automjeteve në rrugët e prekura. Gjithashtu raportohet se situata nuk paraqitet e vështirë momentalisht.

Foto ilustruese

DURRËS- Prej ditësh vendi ynë është nën ndikimin e temperaturave të ulëta ndërsa në zona të ndryshme ka patur edhe reshje shiu. Ndërkohë sot raportohet se për shkak të motit të keq dhe stuhive detare janë anuluar lundrimet në det në gjirin e Durrësit. Flota e peshkimit në Durrës ka njoftuar se për tre ditët në vazhdim të mos dalin me det.

Kapiteneria e përgjithshme detare u ka bërë thirrje edhe anijeve që janë në det të tërhiqen në port, pasi pritet të ketë stuhi të fuqishme detare. Edhe anijet e tonazhit të ulet nuk do të dalin në det deri në një urdhër të dytë. Ndërsa tragetet dhe anijet tregtare të tonazhit të rendë vazhdojnë aktivitetin e tyre. Në portin më të madh të vendit është pezulluar puna në sektorin e ngarkim-shkarkimit rifuxhio.

Pamje nga vendi i ngjarjes

TIRANË- Ministria e Mbrojtjes ka dalë ditën e sotme me një njoftim përmes një postimi në "Facebook". Në njoftim bëhet me dije se Forcat e Armatosura dhe AKMC u kanë ardhur në ndihmë banorëve të bllokuar në zonat e thella të vendit. Gjithashtu janë ndarë edhe pamje teksa ministria thekson se bora arrin deri 40 cm.

Më tej theksohet se gjatë gjithë ditës së enjte, pjesëtarë të Forcave të Armatosura u ngjitën në Malin e Korabit për të shpëtuar tre banorë, bashkë me 30 krerë kuaj të bllokuar. Në operacion morën pjesë 19 forca dhe 3 mjete nga Batalioni i tretë i Regjimentit të Këmbësorisë së Veriut, të cilët finalizuan me sukses misionin në rreth 2100 metra lartësi.

Postimi i Ministrisë së Mbrojtjes:

Ndërkohë që Shqipëria feston, Forcat e Armatosura dhe AKMC janë në krye të detyrës për t’u ardhur në ndihmë njerëzve të bllokuar në zonat e thella të vendit.

Gjatë gjithë ditës së enjte, pjesëtarë të Forcave të Armatosura u ngjitën në Malin e Korabit në kushte shumë të vështira atmosferike për të shpëtuar tre banorë, bashkë me 30 krerë kuaj të bllokuar.

Koordinimi mes strukturave të Mbrojtjes Civile në nivel vendor, të mbështetura nga Forcat e Armatosura, rezultoi i suksesshëm duke iu ardhur në ndihmë banorëve në kushte shumë të vështira për shkak të temperaturave të ulëta dhe borës që arrinte deri në 40 cm.

Në operacion morën pjesë 19 forca dhe 3 mjete nga Batalioni i tretë i Regjimentit të Këmbësorisë së Veriut, të cilët finalizuan me sukses misionin në rreth 2100 metra lartësi. Falënderim i veçantë për heronjtë tanë të Forcave të Armatosura.

Foto nga vendi i ngjarjes

KURBIN- Një pjesë e territorit të vendit është përfshirë nga reshje shiu që në orët e para të mëngjesit. Mësohet se si pasojë e reshjeve është bllokuar nënkalimi në Fushë-Mamurras.

Gjithashtu bëhet me dije se reshjet kanë krijuar probleme në autostradën Milot - Qafë-Kashar pranë nënkalimit në Fushë-Mamurras.

Si pasojë është penguar edhe lëvizja e automjeteve të vogla teksa niveli i uji arrin në 40 cm nga bllokimi i zgarave të kullimit nga mbetjet.