Ministri i Jashtëm britanik viziton Kosovën, Cameron: Do iu ndihmoj në përpjekjet për njohje ndërkombëtare. Kurti: Anglia, aleat i rëndësishëm

Cameron dhe Gërvalla

KOSOVË- Ministri i Punëve të Jashtme i Mbretërisë së Bashkuar, David Cameron pas takimit të zhvilluar ditën e sotme me homologen e tij, Donika Gërvalla ka shprehur mbështetje të madhe ndaj pavarësisë dhe sovranitetit të Kosovës. Cameron gjithashtu u shpreh se Britania do ta ndihmojë Kosovën në proceset në të cilat po kalon. Ai gjithashtu tha se Britania do të ndihmoj edhe në përpjekjet për njohje ndërkombëtare.

“Jemi mbështetës të mëdhenj të pavarësisë së Kosovës, sovranitetit, dhe të drejtës për tu njohur plotësisht nga të tjerët si shtet sovran... Sigurisht do t’ju ndihmojmë në betejën për t'u njohur në forume ndërkombëtare, që është e rëndësishme dhe e meritoni,” u shpreh ministri britanik.

Cameron në një konferencë të përbashkët tha se ndodhet këtu për të shprehur mbështetjen, ndihmën dhe promovimin nga Britania e Madhe për shtetin e Kosovës

"Ne folëm këtë mëngjes për sigurinë dhe rëndësinë e kontributin që mund të japim në këtë drejtim, duke pasur parasysh edhe rolin e madh që kemi në kuadër të KFOR-it," tha Cameron.

Në lidhje me këtë takim të zhvilluar ka folur edhe ministrja e Jashtme e Kosovës, Donika Gërvalla e cila u shpreh se mbi 90 për qind mbështesin Kosovën në integrimet brenda BE-së.

“Perëndimi ka qenë gjithnjë i suksesshëm atëherë kur ka pasur qëndrim të qartë dhe të vendosur. Ka qenë i suksesshëm kur ka vepruar me vendosmëri përballë një Moske agresive. Ekziston një konsensus gjithëshoqëror që Kosova është pjesë e Perëndimit. Mbi 90 për qind e mbështesin Kosovën në integrimet brenda BE-së”, shtoi Gërvalla.

Alicia Kearns

KOSOVË- Kryetarja e Komitetit për Punë të Jashtme në Parlamentin e Britanisë së Madhe, Alicia Kearns ka reaguar për mes një postimi në llogarinë e saj në "X" në lidhje me vizitën e ministrit të Jashtëm britanik, David Cameron në Kosovë.

Gjatë kësaj vizite Cameron është pritur nga kryeministri i Kosovës, Albin Kurti. Kearns ka shprehur kënaqësinë në lidhje me vizitën e Cameron në Kosovë. Ajo shtoi se Britania e Madhe ka një rol të rëndesishëm për të luajtur si një zë i pavarur dhe për të sfiduar mungesën e drejtësisë në Procesin e Berlinit. 

Postimi i plotë:

Më vjen mirë të shoh David Cameron sot në Kosovë. Britania e Madhe ka një rol të rëndësishëm për të luajtur si një zë i pavarur dhe për të sfiduar mungesën e drejtësisë në Procesin e Berlinit. Është koha që ne ta gjejmë forcën dhe zërin tonë për Kosovën dhe të qëndrojmë të palëkundur me ta kundër irredentizmit.

Kurti në takim me Cameron

KOSOVË- Kryeministri i Kosovës, Albin Kurti ka pritur ditën e sotme në takim ministrin e Punëve të Jashtme të Mbretërisë së Bashkuar, David Cameron. Cameron ka mbërritur mbrëmë në Prishtinë. Përveç takimit me Kurtin Cameron do të takohet edhe me ministren e Punëve të Jashtme e Kosovës, Donika Gërvalla-Schwarz. Pas takimit, Gërvalla dhe Cameron do të dalin në konferencë për mediat.

Po ashtu Camron do të pritet në takim edhe nga presidentja e Kosovës, Vjosa Osmani. Në lidhje me takimin e zhvilluar mes kryeministit të Kosovës dhe Canmron, Kurti ka ndarë disa momente në faqen e tij  "X" ku ka shprehur kënaqësinë për pritjen e ministrit britanik. 

Postimi i plotë:

Kënaqësi të pres ministrin e Jashtëm të Britanisë së Madhe, David Cameron në Prishtinë në udhëtimin e tij të parë ndërkombëtar të këtij viti. Mbretëria e Bashkuar ka qenë një aleat i vendosur dhe besnik i Republikës së Kosovës, që para krijimit të shtetit tonë. Ne jemi mirënjohës për mbështetjen e qëndrueshme dhe marrëdhëniet e shkëlqyera që gëzojmë.