Kremtimi i Krishtlindjes në vend, mbahen meshat e shenjta në kishat katolike dhe ortodokse, klerikët-besimtarëve: Reflektoni për periudhën që po kalon shoqëria shqiptare

Foto nga mesha

FUSHË-ARRËZ- Kisha Shën Jozefi në Fushë Arrëz mbajti meshën e shenjtë në vigjilje të Krishtlindjes. Famullitari Frat Andreas Valterman i ftoi besimtarët që të shikonin Krishtlindjen si dritë shprese dhe jo thjesht si festë e dekoreve dhe dritave në qytete.

Gjithashtu, shumë besimtarë pritën lindjen e Krishtit në dioqezën e Sapës. Në katedralen Nënë Tereza të Vaut të Dejës, Ipeshkvi Monsinjor Simon Kulli, teksa u lut për një botë më të mirë, ftoi besimtarët që të shikonin lindjen si shpresë për botën duke punuar për paqe dhe drejtësi.

Korce

KORÇË- Korça është përfshirë nga atmosfera magjike e Krishtlindjeve, teksa qindra besimtarë kanë kryer ritualet fetare në Katedralen "Ngjallja e Krishtit". 

Mesha e Shenjtë e Krishtlindjeve u drejtua nga Mitropoliti i Korçës, Imzot Joani, i cili përcolli mesazhe për harmoni, dashuri dhe tolerancë midis njerëzve. 

Pas meshës, shumë qytetarë janë kthyer në shtëpitë e tyre për të vazhduar festimet familjare.

Mësohet se përveç qytetarëve të Korçës, turistë të shumtë morën pjesë në festimet e organizuara në qytet. Gjatë orëve të fundit u vë re një fluks i lartë turistësh në Korçë. Mbrëmjen e Krishtlindjeve, qyteti ofroi një program artistik të veçantë, ndërsa restorantet dhe hotelet u kujdesën të sjellin një atmosferë të ngrohtë dhe festive përmes muzikës live dhe mikpritjes së tyre.

Ndërkohë, në doganën e Kapshticës është vënë re një rritje e madhe e hyrjeve, me 7,498 persona që kanë kaluar në atdhe për të kaluar Krishtlindjet me familjen.

Durres

DURRËS- Besimtarët e krishterë kanë kremtuar Krishtlindjen në Durrës. Ata u janë drejtuar objekteve të kultit për të marrë pjesë në shërbesat fetare të organizuara për Krishtlindje.

Besimtarë të shumtë janë mbledhur mbrëmjen e djeshme në meshën e shenjtë të vigjiljes. Besimtarët bënë lujtjet për të qenë sa më pranë Zotit të tyre në këtë datë të shënuar në kalendarin e besimit katolik. 

Ndërkohë, besimtarët ortodoksë morën pjesë sot në meshën e shenjtë të kremtimit të Krishtlindjes në Kishën Ortodokse “Apostull Pavli dhe Shën Asti”. Besimtarët e pranishëm u lutën për më shumë paqe dhe mirësi, teksa kanë uruar edhe njëri-tjetrin

LUSHNJE- Krishtlindjet janë kremtuar edhe në Lushnje, ku besimtarët ortodoksë morën pjesë në meshën e shenjtë të krishtlindjeve në kishën ortodokse të Shën Gjergjit në Lushnje.

Mesha e Shenjtë është mbatjur mëngjesin e sotëm nga at Josifi. Ati i shenjtë ka përshëndetur besimtarët dhe mbarë shqiptarët për festën e Krishtindjeve, duke thirrje për paqe.

Besimtarët e shumtë të pranishëm në meshë, janë lutur dhe kanë uruar njeri tjetrin për paqe e begati.

Shkoder

SHKODËR- Katedralja e Shkodrës mbajti mbrëmjen e djeshme meshën e vigjiljes së Krishtlindjes ku morën pjesë qindra besimtarë. Mesha e Shenjtë u udhëhoq nga Arqipeshkvi Angelo Massafra, i cili këtë vit celebron Krishtlindjen e fundit në detyrën e tij si udhëheqës i komunitetit katolik në kete dioqezë. 

Në fjalën e Arqipeshkvi Masafra përcolli mesazhin e paqes në vend dhe në botë. Në mesazhin e tij para besimtarëve, ai i ftoi të ndjekin shembullin e dashurisë dhe solidaritetit të Krishtit.

Më tej imzot Massafra u ndal te sfidat dhe problemet sociale që përballon vendi ynë, duke u bërë thirrje besimtarëve për më shumë angazhim në ndihmë të atyre që janë në nevojë.

Foto nga mesha

LEZHA- Mbrëmjen e Vigjiljes së Krishtlindjes, besimtarë të shumtë u drejtuan drejt Katedrales së Shën Nikollës në Lezhë për të marrë pjesë në Meshën e Shenjtë. Ipeshkvi i Lezhës përcolli një mesazh të fuqishëm për solidaritet dhe humanizëm. Ai bëri thirrje për t’u qëndruar pranë të varfërve, për t’i ndihmuar ata dhe për t’u dhënë shpresë në momentet më të vështira.

Në mesazhin e tij, Ipeshkvi u ndal edhe te roli i politikanëve shqiptarë, duke i ftuar ata të jenë më pranë qytetarëve dhe të angazhohen në përmirësimin e jetës së të varfërve.

“Krishtlindja është një thirrje për reflektim dhe veprim, për të ndërtuar një shoqëri më të drejtë dhe më humane,” u shpreh ai.

Foto nga mesha

TIRANA- Në Shqipëri, ndërsa besimtarët katolikë dhe ortodoksë janë përgatitur të festojnë lindjen e Jezu Krishtit, udhëheqësit e tyre shpirtëror u përcollën sot mesazhin tradicional të Krishtlindjes. Klerikët uruan besimtarët që shpresa të mos mungojë në zemrat e tyre dhe që gjithësecili të bëjë më të mirën, si në jetën kishtare, ashtu dhe atë shoqërore.

Kur mbeten edhe pak orë nga mesha tradicionale e Krishtlindjes, klerikët katolikë dhe ata ortodoksë i’u drejtuan besimtarëve me urimet për lindjen e Jezu Krishtit dhe me mesazhin e përvitshëm me rastin e kësaj feste. Arqipeshkvi Metropolit i Shkodër-Pultit, imzot Angelo Massafra, u kujtoi besimtarëve se viti 2024 shënoi një nga momentet më të rëndësishme për kishën, atë të lumnimit të dy martirëve të rinj, njëri nga Shqipëria dhe tjetri nga Kosova.

“Si Kishë në Shqipëri, më 16 nëntor të këtij viti, morëm një hir të madh me Lumnimin e Martirëve tanë Luigj Paliqi dhe Gjon Gazulli: dy shembuj të mrekullueshëm të bashkëpunimit aktiv me Hyjin për shpëtimin e botës. Sakrifica e jetës së tyre, në fakt, nuk ishte qëllim në vetvete, por kontribuoi në rivendosjen e drejtësisë dhe të paqes në popullin e tyre: në këtë mënyrë ata u bënë instrumente në duart e Hyjit për shpëtimin e vëllezërve dhe të motrave të tyre që ndodheshin në vështirësi të mëdha”, deklaroi ai.

Përmes mesazhit të tij, imzot Massafra, uroi besimtarët që shpresa të mos mungojë kurrë në zemrat e tyre dhe që secili të bëjë më të mirën dhe të angazhohet në jetën kishtare dhe shoqërore.

“Të gjitha familjeve të kësaj toke të dashur shqiptarë dhe në veçanti atyre të kësaj Arqipeshkvie, ju uroj që të kenë marrëdhënie të shëndosha sipas modelit të Familjes së Shenjtë. Të rinjve ju uroj që t’i hapen jetës, që të mos shkurajohen në ndërtimin e të ardhmes së tyre duke ndjekur rrugën e të mirës. Atyre që ende jetojnë në vështirësi sociale dhe ekonomike, ju uroj që të gjejnë mbështetjen e institucioneve përkatëse”, tha imzot Massafra.

Ndërsa Mitropoliti i Korçës, Hirësia e Tij Joani, thotë në mesazhin e tij se kremtimi i vërtetë i Krishtlindjeve duhet të jetë aktualizimi dhe përjetimi i kësaj ngjarje në vetë qënien e besimtarëve, sepse vetëm kështu krishti do të jetë i gjallë dhe i pranishëm në jetën e tyre.

“Bota po përballet me kriza të shumta ekonomike, luftëra dhe varfëri. Sot, më shumë se kurrë, është i nevojshëm rigjallërimi i një jete shpirtërore, sepse krizat ekonomike, luftërat dhe varfëria burojnë nga një krizë shpirtërore. Pa e shëruar krizën shpirtërore, nuk mund ta shërojmë atë ekonomike dhe nuk mund të kemi paqe dhe pa paqe do të kemi vazhdimisht luftëra, konflikte dhe varfëri”, deklaroi ai.

“Të mos mendojmë vetëm për veten tonë, por edhe për të gjithë të tjerët, sidomos për të varfërit dhe për njerëzit në nevojë”, u shpreh në mesazhin e tij Mitropoliti Joan.

“Duhet të jemi të pranishëm në jetën e përditshme të shoqërisë, për të përhapur, jo vetëm me fjalë, po me vepra dhe me shembull personal, frymën e ngrohtë të dashurisë dhe dhembshurisë ndërmjet njerëzve, për të mos lënë shoqërinë njerëzore të ngrijë nga era e akullt e egoizmit dhe arrogancës dhe të fragmentohet nga indiferenca dhe apatia”.

Në mesazhet e tyre për Krishtlindjen, klerikët po u bëjnë thirrje besimtarëve që të reflektojnë për periudhën që po kalon shoqëria shqiptare si dhe për promovim të dashurisë për njëri-tjetrin dhe për mjedisin./ VOA