Komisioni për TIMS/ Thirrja e Berishës si dëshmitar ndez debate, PS tërhiqet: Nuk do hetojmë ministra e kryeministra. Salianji: Vetë e kërkuat!

ervin salianji, blerina gjylameti

TIRANË- Një tjetër debat ka ndodhur te mbledhja e Komisionit Hetimor për TIMS-in, kësaj here mes kryetarit Ervin Salianji dhe deputetes socialiste Blerina Gjylameti. 

Kjo e fundit tha se ky komision nuk është ngritur për të hetuar ministra e kryeministra, por sipas saj për të hetuar çfarë ka ndodhur më 2 gusht të 2023. Për thirrjen e Berishës si dëshmitar, ajo tha se fillimisht duhet t'i lëmë këta njerëz të mbarojnë punë me drejtësinë. Ndërsa ironizoi mbledhjet poshtë ballkonit të Berishës duke thënë se i këndojnë "Romeos" çdo natë.

PJESË NGA DEBATI:

Gjylameti: Komisioni hetimor është ngritur për të hetuar çfarë ka ndodhur në 2 gusht 2023. Nuk është ngritur për tëhetuar kryeministra e ministra. Keni nenin 15, ku planin hetimor e propozojnë ekspertët që duhet t’i votojmë së bashku dhe më paskalojmë në thirrjen e dëshmitarëve që duhet të kenë lidhje me çështjen. Gjatë hetimit të thërritet edhe Berisha. Institucionin do hetojmë, jo individin. Duhet të vijë vetëm pasi del e nevojshme nga hetimi. Ironinë mos e kthe në të vërtetë. Mos e shit si shpëtimtar dhe kalorës i drejtësisë dhe pafajësisë. Si thirren dëshmitarët? Kush e mori vendimin që ke vendosur emrat atje? Do i lësh këta njerëzit të mbarojnë punë me drejtësinë pastaj t’i thërrasim këtu. Sado ta duash “Romeon”, shkojmë dhe i këndojmë atje poshtë ju apo kushdo tjetër… ne nuk kemi dëshirë të vazhdojmë këngën tuaj të vjetër, të lodhur dhe të stonuar.

Ndërsa Salianji tha se Berisha u thirr si dëshmitar sepse vetë PS e kishte kërkuar. Më tej iu drejtua Gjylametit duke i thënë se "unë besoj se zoti Berisha është “Romeo” po aq sa jeni ju “Zhuljeta”."

Salianji: Komisionit i jap seriozitetin e duhur. Dua të mos gjeni asnjë sebep për të ikur se gati jeni. Shpresoj të jeni në të njëjtën anë me ne për të luftuar çdo keqbërës. Nuk di të lexoj ëndrra, as elementët e çdo metafore apo figure letrare që përdoret. Ju thoni se unë unë mendoj se duhet thirrur edhe zotin Sali Berisha ish-kryeministër e Lulzim Bashën si ish-ministër i Brendshëm dhe funksionarët e Policisë së Shtetit… Nuk i shpëtojmë këtij hetimi çfarë do që të bëni. Nëse ju doni ta nxirrni zotin Berisha, nuk është as ëndërr as qëllimi im. Dhe t’ju them të vërtetën zonja Gjylameti, unë besoj se zoti Berisha është “Romeo” po aq sa jeni ju “Zhuljeta”. Po ta besoja këtë s’do isha këtu.

komisioni hetimor i tims

TIRANË- Është shoqëruar me debate seanca e sotme e Komisionit Hetimor për ndërhyrjet në sistemin TIMS. Kreu i Komisionit, Ervin Salianji u bëri thirrje institucioneve të mos falsifikojnë procesverbale apo protokolle që janë objekt i këtij Komisioni Hetimor. Ai tha se kanë informacione të verifikuara për ato që thonë Komision, ndërsa shtoi se "do të jemi të gjithë bashkë për të provuar ose jo ato që themi”.

“Mos hajdeni një ditë me mendjen tuaj, një ditë me mendjen e dikujt tjetër se e paralajmërova, të mbetemi në objektin që ka ky Komision Hetimor. Ka një thirrje për institucionet, sidomos për Policinë që të mos ketë guxim askush të falsifikojë proces-verbale, protokolle apo akte të tjera që do jenë objekt i veprimtarisë së këtij Komisioni Hetimor. Ne kemi informacione të verifikuara për ato që themi, do të jemi të gjithë bashkë për të provuar ose jo ato që themi. Unë besoj se një kontribut do ketë edhe nga PS, se dihet se kanë shumë xhan reformën në drejtësi dhe zbatimin e ligjit”, tha ai.

Nga ana tjetër nënkryetari i Komisionit, Toni Gogu iu drejtua duke thënë se planin e hetimit do e propozojnë ekspertët, ndërsa i kërkoi të “qëndrojë në shinat e ligjit”.

“Është në nderin e këtij komisioni dhe të integritetit tuaj që ne të qëndrojmë në shinat e ligjit. Planin e hetimit në zbatim të ligjit e propozojnë ekspertët. Natyrisht që edhe ne kemi të drejtë të propozojmë thirrje dëshmitarësh. Unë e kuptoj që juve në ëndrrën tuaj doni të bëheni gjyqtar i Berishës, mbase doni të t’i jepni edhe pafajësi, por ky komision nuk e ka në veprimtari këtë gjë. Nuk është misioni ynë të nxjerrim nga mjedise kolegët tanë ku vuajnë masa që cakton drejtësia. Mos ta kthejmë këtë komision në qesharak”, deklaroi Toni Gogu.

komisioni hetimor per tims

TIRANË- Në Kuvend po zhvillohet mbledhja e radhës e Komisionit Hetimor për ndërhyrjet në sistemin TIMS. Mbledhja ka nisur me debate mes kreut të Komionionit, Ervin Salianjit dhe nënkryetarit Tonin Gogu për thirrjen e Sali Berishës si dëshmitar për tu marrë në pyetje lidhur me hetimet. 

Gogu thotë se është një përpjekje për t’i dhënë pafajësinë Berishës. Nga ana tjetër, Salianji i tha se ishin vetë anëtarët socialistë që kërkuan dëshminë e Berishës, Bardhit dhe Bashës.

Gogu: Kam vërejtje për planin paraprak të hetimit. Është plan i deformuar. Planin e hetimit e propozojnë ekspertet qe ne do t’i miratojmë sot. Doni të bëheni gjyqtari i Berishës, ndoshta dhe t’i jepni pafajësinë, por ky komision as nuk e ka në objekt pune të bëjë këtë gjë. Ky komision merret me hetimin e veprimtarisë së autoriteteve që mbrojnë TIMS. Nuk është misioni ynë të nxjerrim nga mjedise ku kolegë tanë, vuajnë masat e sigurimit që cakton drejtësia. Nuk marrim kompetenca të drejtësisë. Çdo përpjekje e juaj për tu bërë gjyqtari i Berishës të mos e ktheje këtë komision në një komision qesharak, pro të bëjmë atë që na ka ngarkuar ligji.

Salianji: Janë deklarata politike që s’kanë të bëjnë më punën e komisionit, ëndrrat që ju folët nuk janë objekt i këtij komisioni, mund të jenë objekt i fallxhoreve. Nëse ju keni sherr me njëri tjetrin nuk është problem i imi. Një kolege e komisionit, por edhe ju si nënkryetar i komisionit, keni propozuar. Duke pasur parasysh që kishit tre emra si propozime, unë për të pasur konsensus të gjerë, që në këtë komision jemi për të qenë përballë atyre që kanë ndërhyrë në komision për llogari të krimit dhe politikës. Plani është siç e kam deklaruar, me propozimet tuaj për thirrjen dëshmitar të Berishës, Bardhit e Bashës, apo cilindo që duhet të vijë japë llogari. Nëse ju merrni një akt dhe thoni përse se keni korrigjuar se na tërheqin veshin të partia, ca të bëj unë këtu. Nuk është faji im që u tërheq veshin vëllai i madh Edi.