Komisioni hetimor për Shëndetësinë, debate mes palëve, Vokshi: Do merret në pyetje kryeministri Rama

Albana Vokshi

TIRANË- Kryetarja Albana Vokshi në Komisionin Hetimor për Shëndetësinë ka renditur sot emrat që do të thirren për tu marrë në pyetje. Gjatë mbledhjes, Vokshi theksoi se do të merren në pyetje kryeministri Edi Rama, ish-ministri Ilir Beqaj si dhe Ministrja Albana Koçiun. Po ashtu Vokshi shtoi se të gjithë dëshmitarët duhet që të merren në pyetje para datës 10 qershor.

“Do të thirren që të merren në pyetje kryeministri Edi Rama, ish-ministri Ilir Beqaj etj. Dëshmitarët duhet të merren në pyetje përpara datës 10 qershor. Duhet të zgjedhim edhe ekspertët ligjorë, që të mbledhin të dhëna, i propozojnë deputetëve të Komisionit edhe pika të ndryshme për planin e hetimit. Këto do i lëmë për një ditë tjetër. Ligji parashikon që të merren edhe ekspertë të përkohshëm të shëndetësisë, të IT etj. Do të shqyrtohen kandidatura ekspertësh në ditët në vijim”, u shpreh Vokshi.

LISTA

1-Edi Rama
2-Ilir Beqaj
3-Ogerta Manastriliu
4-Shkëqlim Cani
5-Anila Denaj
6-Albana Kociu
7-Klodjan Rjepaj
8-Geraldina Prodani
9-Ortaket dhe administratorët e të dy koncesionarëve
10-Nisma Thurje; Endri Shabani, Pano Soko, Artan Koni
11-Drejtuesit e qendrave spitalore universitare që nga nisja e zbatimit të dy komisioneve
12- Drejtorët e Fondit të Sigurimit të detyrueshem që nga firmosja e kontratave deri në zbatimin
13-Kryetarët dhe anëtarët e komisioneve për dhënien e koncesioneve
14-Anëtarët e KPP që kanë trajtuar ankimimet
15-Drejtuesit e Agjencisë së Prokurimit Publik
16-Avokatura e Shtetit
17-Çdo person që ka dijeni rreth objektit të hetimit dhe që rezulton i përfshirë nga shqyrtimi i dokumentacionit zyrtar

Komisioni

TIRANË- Komisioni hetimor i Sterilizimit dhe Check-Up në Shëndetësi ka zgjedhur sot sekretarin e tij. Gjatë mbledhjes anëtarët e komisionit vendosën që sektretari i komisionit të zgjidhet Klevis Xhoxhi.

Mbledhja e Komisionit hetimor për sterilizimin dhe koncensionin në shëndetësi ka nisur paraditen e sotme. Në krye të këtij Komisioni është deputetja demokrate Albana Vokshi, e cila deklaroi dhe të hapur mbledhjen e komisionit. 

Komisioni

TIRANË- Debatet në komisionin e sterilizimit po vazhdojnë mes deputetes Ina Zhupa dhe deputetit Plarent Ndreca. Zhupa ka theksuar se Ndreca ndodhet në konflikt interesi pasi ka qenë avokat i një prej personave të përfshirë në aferë. Ndërkohë që Ndreca i është kthyer duke thënë se është profesionalisht më i aftë se ajo për të kuptuar situatën. Këtu ka ndërhyrë kryetarja Albana Vokshi, e cila e ka paralajmëruar për heqje të fjalës. 

Pjesë nga Debati:

Ina Zhupa: Çështjet e shëndetësisë janë sensitive. Ndreca ju pranuat që ishit avokat i një prej personave të përfshirë në aferë, pra jeni në konflikt interesi. Le t’i drejtohemi SPAK dhe të pyesim nëse Ndreca ka qenë ndonjeherë avokat. PS ka mjaftueshëm resurs për të qenë nënkryetar të komisionit nëse Ndreca është në konflikt interesi.

Plarent Ndreca: Nuk e kuptoj insistimin për emrin dhe prezencën time. Nuk di ku e keni merakun, por duhet ta marri mendja që profesionalisht jam më i aftë se ty për të kuptuar situatën. Vetëm nga ty nuk pres këshilla.

Vokshi: Nuk ju lejoj me këtë fjalë?

Ndreca: Si në çfarë mënyrë?

Vokshi: Do ju heq fjalën!

Ndreca: Ti nuk e kupton fare se çfarë është fjala etike.

Petro Koci

TIRANË- Deputeti socialist Petro Koçi ka deklaruar se komisioni për sterilizimin dhe koncensionet në shëndetësi ka arsye të qendrueshme për tu mbajtur. Gjatë fjalës së tij, Koçi ka deklaruar se komisionet janë njollë e zezë e parlamentarizmit. Po ashtu ka theksuar se ky komision duhet të jetë i mbarë  dhe jo të ketë kacafytje mes palëve.

“Është një nga komisionet hetimore me arsye të qëndrueshme. Fillimi i punimeve të këtij komisioni, nuk është i mbarë. Është përsëritje e një historie. Komisionet janë njollë e zezë e parlamentarizmit dhe këtu janë thirrur skifterët e palëve. Këtu duhet të gjykohet urtësia e gjykimit. Ndaj roli i moderatorit është i rëndësishëm. Në rastin që Kuvendi ju ka zgjedhur juve si kryetare, duhet të ishte diçka e mbarë. Ndaj mos të kemi të njëjtën histori. Kacafytje në gjithë procesin dhe procedurat e këtij komisioni. Etika dhe rregullsia në këtë komision, varet nga ai që drejton. Do ju ftoja që të ishit në përputhje me mandatin e këtij komisioni. Duhet të kërkojmë të vërtetën për çështje të rëndësishme. Paracaktimi sjell zhvillime të mbrapshta,” tha ai.

Saimir Korreshi

TIRANË- Deputeti demokrat Saimir Korreshi ka ironizuar debatin në nisjen e Komisionit për sterilizimin dhe koncensionet në shëndetësi. Korreshi ka theksuar se bëhet fjalë për një aferë prej 200 milion eurosh, ndërkohë që ka theksuar se kanë marrë eksperiencë nga aksionet e tyre opozitare. 

"Keni marrë pak eksperiencë nga aksionet tona. Na mallëngjyet. Po flasim për 200 mln euro. Për 1200 euro keni lënë mamografinë e Lushnjes. Ose do e kthejmë nga e mbara këtë punë ose të marrin tenxhere e kusi e të nisim t’i biem," tha Korreshi.

Albana Vokshi

TIRANË- Komisioni për shëndetësinë po vijon me debatet në lidhje me nisjen dhe mbarëvajtjen e këtij komisionit. Kryetjarja Albana Vokshi ka deklaruar se ky komision ka vetëm një kryetar dhe është vetëm ajo që e drejton atë. Ndërsa nënkryetari Plarent Ndreca i ka ndërprerë fjalën duke deklaruar se nuk kanë shkuar atje për të dëgjuar atë të flasi.  

Pjesë nga Debati:

Vokshi: Për sa kohë sa jam unë do e drejtoj unë këtë komision. Ka një kryetar. Nuk kemi dy bashkëkryetarë, përndryshe do të ishin dy. Do të ishit dhe ju këtu për të drejtuar. Drejtohet nga kryetari. Kur unë mos të jem, do të jeni ju zoti Ndreca. Kjo është nisur mbi bazën e raporteve dhe akuzave. Qetësohu se kemi katër muaj.

Ndreca: Nuk kemi ardhur për të të dëgjuar ty.

Vokshi: Jemi ne që e kemi denoncuar. Jemi bazuar në një sërë raportesh. Nëse ju kanë urdhëruar të vini të bëni zhurmuesin….Bëni detyrën e deputetit

Komisioni

TIRANË- Komisioni për shëndetësinë ka nisur me debate ditën e sotme. Gjatë mbledhjes kryetarja Albana Vokshi ka listuar arsyet se përse është krijuar komisioni. Ndërkohë që nënkryetari Plarent Ndreca i ka kërkuar që mos mbaj konferencë dhe të vazhdojnë mbledhjen. Teksa Vokshi po deklaronte se vlera e dy koncesioneve te shëndetësia i kalon 200 mln euro, Ndreca theksoi se kryetarja po paragjykonte veprimtarinë.

Pjesë nga debati:

Vokshi: Ky komision nuk është kërkuar për interesin e deputetëve të opozitës, por ky komision shihet si një mjet për të nxjerrë në pah situatën ku ndodhet sektori i shëndetësisë. Situata nga denoncimet që na vijnë është e rënduar, me mungesa në barna, kura, pa mundësi për të bërë analiza apo ndërhyrje. Shqiptarët nuk marrin shërbim falas, nuk marrin shërbimin publik. Koncesionet që në do shqyrtojmë në këtë koncesion arrijnë vlerën 200 mln euro, për sterilizimin dhe check up.

Ndreca: Konsultohemi pastaj parashtroni kërkesën. Mos mbani konference, të ikim ne dhe vazhdo konferencën

Vokshi: Nëse doni ta nisin kështu mbledhjen…Të lutem se nuk ua kam dhënë fjalën. Po shpjegoj për publikun cfarë është ky komision. Qetësohni

Ndreca: Nuk shqetësohem fare

Vokshi: Mos më ndërhy! Unë po informoj publikun, pastaj do kaloj te rendi i ditës. Vlera e dy koncesioneve kalon 200 mln euro. Si nga check up dhe sterilizimi, nga gjithë qytetarët, ekspertët është dëshmuar se kanë qenë të panevojshme dhe abuzuese. Është korrupsion në nivelet më të larta të qeverisë. Uroj të mos bëheni mburojë e këtij korrupsioni dhe të përdorini kartonët tuaj kundër interesit publik.

Ndreca: Referuar deklaratave del e qartë që ju keni paragjykuar veprimtarinë, nëse ju vijoni më tutje të konkludoni pa filluar puna e komisionit, keni fyer parim kushtetues mos paragjykimin e një çështje që është arsyeja përse ne jemi ngritur për te hetuar. Nëse vijojmë me deklarata partiake ndërkohë që ne jemi këtu për të kryer një proces të rregull ligjor, e kemi nisur me këmbë jo të ndarë. Ju lutem respektoni parimet kushtetuese.

Albana Vokshi

TIRANË- Mbledhja e Komisionit hetimor për sterilizimin dhe koncensionin në shëndetësi ka nisur paraditen e sotme. Në krye të këtij Komisioni është deputetja demokrate Albana Vokshi, e cila deklaroi dhe të hapur mbledhjen e komisionit. Vokshi në fjalën e saj theksoi se koncensioni në shëndetësi nuk është vetëm shpërdorim detyre por edhe korrupsion në të gjitha nivelet e qeverisë.  

“Nuk është vetëm shpërdorim detyre, por është korrupsion në të gjitha nivelet e qeverisë. Nuk duhet të bëhemi mburojë për këtë proces. Me 200 milionë euro mund të ishin bërë spitale të reja, qendra shëndetësore dhe të ishin rritur pagat e mjekëve dhe infermierëve. Si pikë e parë e rendit të ditës është konstituimi i këtij komisioni. E deklaroj hapjen e këtij komisioni, përbërja e tij komisioni është miratuar,” tha Vokshi.

Foto ilustruese

TIRANË-Deputetja Albana Vokshi që drejton komisionin e sterilizimit dhe atë të Check-Up, tha se mbledhja e parë e komisionit do të zhvillohet sot në orën 11:00 në Kryesinë e Kuvendit.

“Pas miratimit në Seancën Plenare të Kuvendit, datë 21.03.2021, bazuar në ligjin “Për Organizimi dhe Funksionimin e Komisioneve Hetimore të Kuvendit”, mbledhja e parë e “Komisionit Hetimor të Kuvendit për Shërbimin Publik të Sterilizimit dhe Shërbimit Publik të Check-Up në Shëndetësi” do të zhvillohet ditën e hënë, datë 25 mars 2024, ora 11.00 në Kryesinë e Kuvendit”, thuhet në njoftimi.

Pas marrëveshjes midis mazhorancës dhe opozitës për ngritjen e komisioneve parlamentare dhe që u miratuan me shumicë votash seancën e mbrëmjes së shkuar të Parlamentit, demokratët nuk kanë humbur kohë duke njoftuar mbledhjen e komisionit.