"Ligjet"/ "Burgjet nga koha e komunizmit do të mbyllen", Manja: Kemi njoftuar KLGJ-në që gjykatat të aplikojnë gjysmë lirinë për të dënuarit

Bardhi

TIRANË- Mbledhja e Komisionit për Çështjet Ligjore, Administratën Publike dhe të Drejtat e Njeriut ka vijuar me debate të forta dhe akuza. Një nga çështjet që ngjalli debate ishte edhe ajo e Prokurorisë së Përgjithshme ndërsa opozita fillimisht kërkoi llogari pse Prokurori i përgjithshëm nuk ishte prezent të mbronte buxhetin e tij. Kreu i Grupit të PD-së, Gazment Bardhi akuzoi kreun e akuzës Olsian Çela se nuk iu ka kthyer asnjë përgjigje kërkesave të PD që kur ka nisur detyrën. 

Bardhi shtoi se Çela nuk ka kapur dot as standardin e Arta Markut që kur ka ardhur në detyrë. Edhe deputeti Oerd Bylykbashi theksoi se është heshtje e qëllimshme ndërsa tha se po shtohen rastet e ushtarëve dhe se ata me dënime caktojnë kush janë deputetët. Përfaqësuesi i Prokurorisë u përgjigj se Sektori i Dekriminalizimit kishte shumë ngarkesë dhe se vërejtjet e transmetuara në Komision do ia përcillte kreut të PP.

Pjesë nga diskutimet:

Bardhi: Grupi parlamentar i PD ka paraqitur disa kërkesa për verifikim në Prokurorinë e Përgjithshme për të pastruar jetën publike nga individë me rekorde kriminale. Nuk ka ndodhur kurrë që në 4-5 vite nuk kemi marrë asnjë përgjigje nga Prokuroria e Përgjithshme. Kemi kërkuar verifikim për Mark Babanin, i mbaroi detyra, ku sektori që është gjallë apo t’i themi rahmet pastë, nuk ka sjellë gjë. Kemi çuar për gjyqtarë e prokurorë dhe ne nuk kemi marrë përgjigje. Kjo është heqje dorë me vetëdije nga Prokurori i Përgjithshëm.

Ka afate, meqë qenka i zënë me këto aktivitete e huaja. Janë shkelur të gjitha afatet. Iku mandati, ka shkuar në shpi burri huaj, ndoshta partia e verifikoi para Prokurorisë së Përgjithshme dhe zyrtarisht nuk kemi përgjigje. Çfarë pune bën ky sektori i dekriminalizimit në Prokurorinë e Përgjithshme. Kur do kemi përgjigje, e keni funksion kushtetues dhe Kuvendi ju jep lekë të përmbushni funksionin.

Pse keni hequr dorë nga detyrimi kushtetues? Nuk kemi përgjigje nga Prokuroria e Përgjithshme që kur ka ardhur Olsian Çela, nuk ka kapur as standardin e Arta Markut! Sa ç’është në atë detyrë nuk ka sjellë asnjë përgjigje për çfarë i merrni lekët. Hajdeni këtu, na thoni jemi të paaftë dhe na e merrni këtë funksion.

Bylykbashi: Është heshtje e qëllimshme. Po na shtohen rastet e ushtarëve, ata me dënime caktojnë kush janë deputetët. Të heshtet deri në vrasje nuk është harresë dhe prokurori i Përgjithshëm është përgjegjës.

Përfaqësuesi i Prokurorisë: Sektori i dekriminalizimit është me ngarkesë jo të vogël, për të bërë një verifikim të një subjekti duhen adresuar në disa institucione. Është cikël i mbyllur. Drejtori i koordinimit në PP është ai që bën shpërndarjen dhe jep përgjigjet e verifikimit të subjekteve. I mbajta shënim, do ta bëj problem dhe do njoftoj Prokurorin e Përgjithshëm dhe do tu kthej një përgjigje.

TIRANË- Kreu i Grupit të PD-së, Gazment Bardhi ka marrë pjesë ditën e sotme në seancën e Komisionit për Çështjet Ligjore, Administratën Publike dhe të Drejtat e Njeriut. Gjatë fjalës së tij Bardhi ka ironuzuar Partinë Socialiste për kallëzimin në SPAK ndaj deputetes së PD, Elda Hoti për hedhjen e parfumit në Kuvend.

Ai pyeti gjatë mbledhjes se sa lekë u shpenzua nga SPAK për ekspertizën. Bardhi vazhdoi edhe më tej ironinë duke u shprehur se sa para shpenzoi SPAK për të bërë analizat e gjësë që i kishte tmerruar teksa shtoi se Hoti desh i vrau ministrat me erë të keqe.

Ndërkohë kryetarja e Komisionit të Ligjeve, Klodilda Bushka, i kërkoi ti lërë ironitë ndërsa kreu i Grupit të PD-së iu përgjigj se nuk ironi, por janë para nga buxheti dhe janë të shkruara në fatura të ekspertizës.

Pjesë nga diskutimi:

Bardhi: Sa lekë bëri ekspertiza e aromatizuesit të Elda Hotit se janë shumë kurioz? Sa lekë shpenzuat si SPAK për t’i bërë analizat një gjëje që kishte tmerruar, Pandi ti rri se nuk e nuhate, e nuhati Ulsi që ishte ulur aty para, Igli Hasani, desh i vrau Elda me erë të keqe.

Jam shumë kurioz, prokurorja kur e kishte pyetur i ka thënë: E ke blerë jashtë apo brenda, se po ta kishte blerë jashtë do e çonte për ekspertizë jashtë. Shiten në çdo market, nuk kanë rrezik për vetëflijim e Eldës e para se s’do të kisha lejuar të vetëflijohej një koleg, e aq më tepër të më ishte vrarë Klodi Bushka, do të ishte gjë e rëndë.

Bushka: Lëri ironitë

Bardhi: Nuk janë ironi, janë para buxheti, harxhohen! E dini sa ka shkuar fatura e ekspertizës

Prokurori Shehu: Ju bëtë një pyetje për një çështje konkrete dhe ne nuk jemi të autorizuar të japim komente, s’mund të japim komente.

Manja

TIRANË- Ministri i Drejtësisë, Ulsi Manja gjatë fjalës së tij në mbledhjen e Komisionit për Çështjet Ligjore, Administratën Publike dhe të Drejtat e Njeriut është shprehur se burgjet e trashëguara nga komunizmi do të mbyllen. Ministri më tej theksoi se në perspektivë kanë një masterplan ndërsa shtoi se do të mbyllet Tepelena, Burreli, edhe 302 tek Mine Peza.

Ai shtoi se këto burgje kanë struktura të amortizuara që kushtojnë për mirëmbajtje prandaj do t’i mbyllin. Ministri shtoi se nuk po hapin institucione të reja. Manja tha se Kukësi zëvendëson atë të trashëguar nga sistemi që kishim dhe se po e transformojnë në një institucion të ri modern për t’i shërbyer zonës, sistemit por edhe Kosovës.

“Kemi mbyllur institucione të vuajtjes së dënimit dhe do t’i vazhdojmë t’i mbyllim të gjitha institucionet e vuajtjes së dënimit që kemi trashëguar nga koha e komunizmit. Në perspektivë, sepse kanë një masterplan, do të mbyllet Tepelena, Burreli, edhe 302 tek Mine Peza. Janë institucione të vuajtjes së dënimit të trashëguara nga koha e komunizmit. Janë struktura të amortizuara që neve na kushtojnë mirëmbajtje, do t’i mbyllim ata. Nuk po hapim institucione të reja. Kukësi zëvendëson atë të trashëguar nga sistemi që kishim, por e transformojmë në një institucion të ri modern, për t’i shërbyer zonës, sistemit, por edhe Kosovës.

E dyta, ndërtimi i institutit të ri të të miturve, do të jetë modern. Sigurisht që do të hapet kur të mbyllet institucioni i vuajtjes së dënimit për të miturit në Kavajë. Mbyllje e strukturave të vjetra dhe ofrimi i shërbimit të struktura të reja. Për punësimin në burgje, nuk kemi pasur probleme, kemi zbatuar kuadrin ligjor, kemi bërë tentativa për t’i punësuar në sektorin privat, kërkesa kemi patur, por ende s’kemi bërë të mundur bashkëpunimin mes sistemit të burgjeve dhe atyre privat," tha Manja.

Manja

TIRANË- Ministri i Drejtësisë, Ulsi Manja gjatë fjalës së tij në mbledhjen e Komisionit për Çështjet Ligjore, Administratën Publike dhe të Drejtat e Njeriut është shprehur se institucioni i vuajtjes së dënimit në Ali Dem, do të kthehet në burg të hapur. Manja theksoi se ka njoftuar Këshillin e Lartë Gjyqësor që gjykatat të aplikojnë gjysmë lirinë për të dënuarit.

Ai theksoi se kur gjykata jep dënimin me gjysmë liri, të burgosurit do të dërgohen në Ali Dem, ku gjatë ditës do të shkojnë në punë dhe natën do të kthehen në qeli. Ai theksoi se ata nuk kanë hapur burgje por kanë mbyllur.

"Nuk është lajm i mirë të hapësh një institucion të vuajtjes së dënimit, por ne kemi mbyllur në Shqipëri, unë sa jam ministër Drejtësie kam mbyllur 4. Dhe burgu i Ali Demit, është kthyer në burg të hapur. Gratë e dënuara janë zhvendosur në një institucion modern në Pojskë dhe ai në Ali Dem shumë shpejt do të jetë burg i hapur.

Kemi njoftuar KLGJ që gjykata më në fund të aplikojnë edhe gjysmë liri, është në kodin Penal. Kur gjykata jep dënim me gjysmëliri do të vuhet në Ali Dem. Ditën në punë, natën në burg, shqip. Kur ka një kontratë pune, që sigurisht që institucioni i vuajtjes së dënimit do t’ia sigurojë, ditën do të shkojë në punë, natën do të kthehet në burg, Por këtë e jep gjykata si dënim. Nuk kemi hapur burgje, kemi mbyllur," tha Manja.

Manja

TIRANË- Seanca e sotme e Komisionit të Ligjeve ka nisur me replika. Deputeti i PD-së, Saimir Korreshi gjatë fjalës së tij i tha ministrit të Drejtësisë, Ulsi Manja se shumë qytetarë po vuajnë dënime me burg sepse janë përdorues të drogës dhe janë kapur me doza të vogla ndërsa dënohen njësoj si trafikuesit dhe shpërndarësit e drogës.

Ndërkohë ministri Manja u përgjigj duke thënë se do të miratohet së shpejti Kodi i Ri Penal, sipas standardeve europiane. Ai shtoi se duhet që të shmanget sa më tepër masa e “arrestit me burg”, kur veprat penale nuk janë të rënda.

Saimir Korreshi: Di që janë në burgje njerëz vetëm pse janë përdorues të drogës dhe jo shpërndarës. A po bëhet gjë në lidhje me këtë problem, që ai përdoruesi që kapet me 0.75 gram mos dënohet njësoj si ai që kapet me 1 kg drogë?

Ulsi Manja: Zëri më i madh i të ardhurave të Ministrisë së Drejtësisë shkojnë për burgjet.  Ne na kërkohet të përafrojmë legjislacionin penal me atë të BE dhe kërkohet të vihet në miratim Kodi i ri Penal. Politika e dënimit duhet të jetë brenda standardeve të BE-së. Burgu duhet të jetë si masë ekstreme. I qëndroj asaj që kam thënë, në projektin e ri të Kodit Penal, duhet të kemi politikë dënimi që të përpiqet ta ndalojë sa më tepër dënimin me burg, për vepra jo të rënda.

Kur të vijë Kodi i Ri Penal, do të jetë për disa dekada në fuqi. Kodi i Ri Penal duhet të konsultohet publikisht dhe duhet të koordinohet me Brukselin. Kemi 20 zyra të ndihmës juridike në gjithë Shqipërinë, për t’ju ardhur në ndihmë shtresave në nevojë.

Manja

TIRANË- Ministri i Drejtësisë, Ulsi Manja ka mbajtur fjalën e tij në mbledhjen e Komisionit për Çështjet Ligjore, Administratën Publike dhe të Drejtat e Njeriut. Manja u shpreh se IVP do të ndërtojë një paraburgim në Kukës dhe do të jetë në të mirë të shqiptarëve të Kosovës. Ministri u shpreh se ata janë të shumtë në numër dhe ndërtimi i këtij paraburgimi sjellë që ata të vuajnë dënimin pranë shtëpive të tyre.

“Shqipëria është tashmë një vend i hapur. Me Kosovën nuk kemi më asgjë të ndarë. Në institucionet tona të paraburgimit dhe dënimit ka një numër të konsiderueshëm shtetas të Kosovës. Shtetasit e Kosovës me ndërtimin e paraburgimit të Kukësit do të vuajnë dënimin pranë shtëpive të tyre. Momentalisht janë të shpërndarë në të gjithë IVP në vend, por tani do t’u mundësohet vuajtja e dënimit pranë familjeve”, tha ai.

Ministri shtoi se investimi i dytë madhor është sistemi anti-dron. Sipas tij ministria e Financave e quajti një kërkesë të domosdoshme dhe financimin e këtij sistemi, për burgjet e sigurisë së lartë. Manja theksoi se e kanë konsideruar një ndërhyrje të domosdoshme këtë sistem. 

“Investimi i dytë madhor është sistemi anti-dron. Ministria e Financave e quajti një kërkesë të domosdoshme dhe financimin e këtij sistemi, për burgjet e sigurisë së lartë. E kemi konsideruar një ndërhyrje të domosdoshme këtë sistem. Sepse edhe dinamikat e ngjarjeve ndryshojnë çdo ditë. Situata që drejtori i përgjithshëm i burgjeve i ka sqaruar”, tha ai.

Ministri dha disa detaje edhe në lidhje me Institutin e të miturve që do të ndërtohet në Tiranë. Ai tha se procedurat tashmë kanë mbaruar, dhe shumë shpejt pritet të nisë ndërtimi i këtij institucioni në Mëzez.