Atentati mafioz pranë aeroportit të Rinasit/ Blushi: Krimi në Shqipëri ka dalë jashtë kontrollit. Berisha: Ekzekutimi nuk mund të ndodhte veçse me një bashkëpunim të ngushtë të policisë me vrasësit

Sali Berisha

TIRANË- Kreu i Partisë Demokratike, Sali Berisha ka reaguar në lidhje me atentatin mafioz të ndodhur mesditën e sotme në Rinas, ku u ekzekutua Gilmando Dani, krahu i djathë i Emiljano Shullazit dhe u plagos, agjenti i AMP, Muçi Shaljani (Sheqeri).

Me anë të një postimi në rrjetin social, Facebook, Berisha shkruan se ekzekutimi ndodhi publikisht përpara Komisariatit të Rinasit dhe nuk mund të ndodhte në ate vend veçse me një bashkëpunim të ngushtë të policisë me vrasësit. Në postimin e tij, Berisha shtroi edhe pyetjen nëse ka gisht narko-policia në ekzekutimin e Gilmando Danit?

Postimi i Berishës: 

A ka gisht narko-policia në ekzekutimin e Gilmando Danit? Miq, njëri nga banditët më të fortë të Milit të Partisë apo Emiliano Shullazit u ekzektutua sot publikisht para Komisariatit të Rinasit. Dani po vinte nga Spanja dhe pasi zbriti nga avioni ishte në makinë i shoqëruar nga inspektori i shërbimit inteligjent të narko-policisë, shoferini drejtorit te ketij sherbimi Muçi Shaljani i cili mbeti i plagosur rëndë.

Ky ekzekutim publik ndodhi në vendin më të sigurt të Shqipërisë dhe nuk mund të ndodhte në ate vend veçse me një bashkëpunim të ngushtë të policisë me vrasësit. Vrasësit e dogjën makinën në Halil, por policia njofton se çuditërisht nuk mund të shkonte aty. Cili ishte roli i narko-policisë në këtë vrasje mbetet për tu hetuar./Dosja.al

Ervin Salianji

TIRANË- Ish-deputeti i PD-së, Ervin Salianji ka reaguar pas atentatit në Rinas, ku u ekzekutua Gilmando Dani dhe u plagos rëndë, Muçi Shaljani (Sheqeri), agjenti i AMP-së. Me anë të një postimi në Facebook, Salianji shkruan se bandat kriminale kanë marrë prej kohësh kontrollin e territorit. 

Salianji, ndër të tjera theksoi se ngjarja sot në Rinas është alarmante, pasi kjo zonë duhet të ishte me siguri maksimale. Ai theksoi se shteti duket si spektator i krimit e qeveria është faktuar shpesh si ndihmëse e krimit, policia njě dekor propagande dhe qytetari shpesh shënjestër e pafajshme. 

Reagimi i Salianjit: 

Bandat kriminale kanë marrë prej kohësh kontrollin e territorit dhe kanë informacion të saktë për lëvizjen e kujtdo, mjafton ta vendosin dhe eleminojnë kë të duan e ku të duan!

Vrasja e sotme, në pikën më të rëndësishme të vendit, në aeroportin e Rinasit, aty ku duhet të ishte siguria maksimale, tregon paaftësinë dhe dorëzimin e qeverisë përballë krimit. Në Shqipërinë e Ramës nuk mund të ecësh me monopatina, por me makina të blinduara e me armë po.

Frika dhe kërcënimi bandave që vendosin kush jeton e kush eliminohet, është vetëm njëra anë e medaljes kriminale. Ana tjeter ěshtë terrori që çdokush, qe kalon aty, është në punë të vet, apo percjell familjen a të afermit ne kete rast ne Rinas, mund te ishte goditur nga plumbat që kanë lënë shenjë nëpër godina. Shteti duket si spektator i krimit e qeveria është faktuar shpesh si ndihmëse e krimit, policia njě dekor propagande, dhe qytetari shpesh shënjestër e pafajshme. Fatkeqësisht, Shqipëria nuk ka rend dhe siguri. Askush nuk është i mbrojtur, institucionet janë të kapura, dhe mafia ka shtetin e vet!

Klevis Balliu

TIRANA- Demokrati Klevis Balliu reagoi menjëherë pas atentatit të ndodhur në Rinas, ku mbeti i vrarë 47-vjeçari Gilmando Dani dhe u plagos rëndë miku i tij, Muçi Shaljani. Përmes një postimi në Facebook, Balliu theksoi se atentati mafioz ndodhi vetëm 10 minuta pas mbylljes së seancës së Komisionit të Punëve të Brendshme dhe të Mbrojtjes, ku sipas tij opozita kërkoi llogari ministres së Brendshme dhe drejtuesve të Policisë së Shtetit për mungesën e sigurisë në vend.

Ai shtoi se ministrja, me përbuzje, kishte deklaruar më parë se Shqipëria është “vendi më i sigurt” dhe se siguria po rritet vazhdimisht. Balliu shprehu më tej akuzën e fortë se Albana Koçiu është bashkëpunëtore e drejtpërdrejtë me ata që kryejnë këto atentate.

"Vetëm 10 minuta pas mbylljes së Komisionit të Punëve të Brendshme dhe të Mbrojtjes, ku opozita i kërkonte llogari ministres së Brendshme dhe kupolës së Policisë së Shtetit për mungesën e sigurisë në vend, ministrja, me përbuzje, deklaroi se Shqipëria është vendi më i sigurt dhe me një rritje të vazhdueshme të sigurisë. Por menjëherë më pas ndodh një atentat mafioz në aeroportin e Rinasit, zonën që supozohet të jetë më e sigurta në Shqipëri. Ky fakt tregon qartë se qeveria ka në plan të fshehë të vërtetën, sepse është bashkëpunëtore e drejtpërdrejtë me ata që kryejnë këto atentate, duke rrezikuar jetën e të gjithë shqiptarëve. Kur aeroportet nuk janë të sigurta, kur shkollat nuk janë të sigurta, kur gjykatat nuk janë të sigurta — çfarë mbetet më?" tha Balliu./ Dosja.al

pamje nga vendngjarja

TIRANË- Deputeti i Partisë së Lirisë, Tedi Blushi ka reaguar, pas atentati pranë aeroportit të Rinasit, ku mbeti i vrarë Gilmando Dani dhe i plagosur Muçi Shaljani. Me anë të një postimi në Facebook, Blushi deklaron se në Shqipëri krimi ka dalë jashtë kontrollit dhe godet ku të dojë dhe kur të dojë. Blushi thotë ndër të tjera se ky është rezultat i drejpërdrejtë i filozofisë së qeverisë.

Postimi i Plotë: 

Atentati mafioz pranë aeroportit “Nënë Tereza” është një tjetër dëshmi tronditëse se krimi në Shqipëri ka dalë jashtë çdo kontrolli. Ai godet kur të dojë, ku të dojë dhe si të dojë, duke vënë në rrezik jetën e qytetarëve të pafajshëm. Kur armët e krimit flasin edhe pranë një institucioni të sigurisë së lartë kombëtare, aty ku masat parandaluese duhet të jenë më të larta, nuk bëhet më fjalë për një ngjarje të zakonshme kriminale, por për një alarm kombëtar.

Ky është rezultati i drejtpërdrejtë i filozofisë së Qeverisë "pa krim nuk ka zhvillim", që në vend që ta luftojë krimin, e ka bërë pjesë të pandarë të pushtetit, ku edhe drejtësia është bërë palë me 251 drejtues dhe anëtarë bandash që i kanë lënë të lirë. Sot, siguria e jetës nuk ekziston, sepse krimi nuk luftohet nga shteti, por e ka zëvendësuar atë./Dosja.al