17-vjetori i Pavarësisë së Kosovës/ Liderët botërorë letër urimi Osmanit, Trump: E rëndësishme që Kosova të integrohet më tej në komunitetin euroatlantik

osmani, steinmeier

KOSOVË- Presidenti i Gjermanisë, Frank-Walter Steinmeier, ka uruar presidenten Vjosa Osmani për 17-vjetorin e Pavarësisë së Kosovës. Në urimin e tij, Steinmeier ka riafirmuar mbështetjen e Gjermanisë për pavarësinë dhe rrugën evropiane të Kosovës, duke rikujtuar se shteti i tij në shkurt 2008, ishte ndër vendet e para që njohu shtetin e Kosovës.

"Gjatë këtyre viteve, kemi thelluar vazhdimisht bashkëpunimin tonë, qoftë në politikat e sigurisë, në reformat për përafrimin me BE-në apo në fushën e politikave të klimës dhe energjisë", thuhet në urimin e Presidentit Steinmeier.

Më tej, ai ka theksuar se në çështjet e politikës së jashtme, Kosova është pozicionuar qartësisht në përputhje me politikën e jashtme dhe të sigurisë së Bashkimit Evropian, veçanërisht në mbështetjen e Ukrainës kundër agresionit të Rusisë, në shkelje të të drejtës ndërkombëtare. Në fund të urimit të tij, Presidenti gjerman ka theksuar se Gjermania mbetet një mbështetëse e fuqishme e Kosovës, duke përkrahur stabilitetin, zhvillimin dhe integrimin evropian.

macron, osmani

FRANCË- Presidenti i Francës, Emmanuel Macron ka uruar presidenten Vjosa Osmani për 17-vjetorin e Pavarësisë së Kosovës, përmes një letre urimi. Macron ka rikonfirmuar mbështetjen e Francës për pavarësinë dhe integrimin evropian të Kosovës, ndërsa ka siguruar se ata do jetë jenë një nga aleatët më të përkushtuar.

"Përballë çrregullimeve dhe fragmentimit të botës, perspektiva evropiane e Kosovës, si e të gjitha vendeve të Ballkanit Perëndimor, duhet të rikonfirmohet. Ju siguroj për përkrahjen e Francës për të mbështetur vendin tuaj në këtë rrugë", thuhet në urimin e Presidentit Macron.

Ky i fundit shpreh gjithashtu shpresën që të dy shtetet të mund të vazhdojnë të bashkëpunojnë, veçanërisht lidhur me organizimin e Lojërave Mesdhetare në vitin 2030 në Kosovë. Macron ka falënderuar Osmanin për pjesëmarrjen në ceremoninë e rihapjes së Katedrales Notre-Dame. 

LETRA E PLOTË: 

Zonja Presidente, e dashur Vjosa

Me rastin e festës kombëtare të Republikës së Kosovës, dëshiroj t’ju shpreh urimet e mia dhe t’ju ritheksoj gjithë përkushtimin që Franca ka për pavarësinë e Kosovës.

Përballë çrregullimeve dhe fragmentimit të botës, perspektiva evropiane e Kosovës, si e të gjitha vendeve të Ballkanit Perëndimor, duhet të rikonfirmohet. Ju siguroj për përkrahjen e Francës për të mbështetur vendin tuaj në këtë rrugë.

Në këtë drejtim, normalizimi i marrëdhënieve me Serbinë është një hap thelbësor. Emërimi i një Përfaqësuesi të ri special të Bashkimit evropian duhet të jetë një mundësi për të bërë përparim në zbatimin e Marrëveshjes së Brukselit-Ohrit, duke përfshirë themelimin e Asociacionit të komunave me shumicë serbe.

Shpresoj gjithashtu që dy vendet tona, të lidhura me vlerat e Olimpizmit, të mund të vazhdojnë të bashkëpunojnë, veçanërisht lidhur me organizimin e Lojërave Mesdhetare në vitin 2030 në Kosovë. Franca është e gatshme t’ju ndihmojë që kjo ngjarje madhore të ketë një sukses të plotë.

Së fundi, dëshiroj t’ju falënderoj për pjesëmarrjen tuaj në ceremoninë e rihapjes së Notre-Dame de Paris, për të cilën ju jam mirënjohës.

Ju lutem pranoni, zonja Presidente, konsideratën time më të lartë.

Përzemërsisht,

Emmanuel MACRON

osmani, trump

SHBA- Presidenti i SHBA-së, Donald Trump ka uruar 17-vjetorin e Pavarësisë së Kosovës. Përmes një letre urimi dërguar presidentes së Kosovës, Vjosa Osmanit, ka përgëzuar popullin e Kosovës për rrugëtimin drejt pavarësisë, duke teksuar qëndrueshmërinë dhe vendosmërinë që e kanë shoqëruar këtë proces.

Trump shkruan se teksa SHBA punon me Kosovën dhe fqinjët e saj për të ndërtuar një rajon më të sigurt, është e rëndësishme që Kosova të integrohet më tej në komunitetin euroatlantik. Presidenti amerikan ka vlerësuar gjithashtu mbështetjen e palëkundur të Kosovës ndaj Ukrainës përballë agresionit rus.

Ai ka theksuar se Dita e Pavarësisë së Kosovës është një moment për të reflektuar mbi arritjet e deritanishme dhe për të parë drejt një të ardhmeje edhe më të ndritur.

LETRA E URIMIT E PLOTË:  

E nderuara Zonja Presidente,

Në emër të popullit të Shteteve të Bashkuara, ju lutem pranoni urimet e mia më të përzemërta për Ju dhe popullin e Kosovës me rastin e Ditës së Pavarësisë. Rrugëtimi i Kosovës si një komb sovran është shënuar nga qëndrueshmëria dhe vendosmëria.

Shtetet e Bashkuara mbështesin plotësisht Kosovën dhe angazhimin e saj për ta ndërtuar një shoqëri demokratike, ku të gjithë qytetarët e saj mund të jetojnë dhe të lulëzojnë së bashku. Lidhjet mes popujve tanë janë të forta dhe presim me kënaqësi t’i zgjerojmë më tej këto marrëdhënie, veçanërisht përmes rritjes së mundësive për investime, me qëllim që të sjellim më shumë prosperitet për të dyja vendet tona. Shtetet e Bashkuara do të vazhdojnë të punojnë me Kosovën në forcimin e institucioneve demokratike dhe promovimin e rritjes ekonomike përmes një mjedisi të qëndrueshëm dhe të drejtë biznesi.

Shtetet e Bashkuara presin të ndërtojnë një marrëdhënie më produktive me qeverinë e Kosovës në vitin e ardhshëm. Ndërsa punojmë me Kosovën dhe fqinjët e saj për të ndërtuar një rajon më të begatë dhe më të sigurt, është e rëndësishme që Kosova të integrohet më tej me komunitetin euroatlantik. Mbështetja e palëkundur e Kosovës për Ukrainën përballë agresionit rus vlerësohet shumë.

Përvjetori i pavarësisë së Kosovës është një moment për të nderuar arritjet e së kaluarës si dhe për të parë drejt një të ardhmeje më të ndritur dhe marrëdhënieve më të thella mes kombeve tona. Ju dërgoj urimet e mia më të mira popullit të Kosovës në këtë ditë feste.

mbreti charles, vjosa osmani

BRITANI- Mbreti i Mbretërisë së Bashkuar, Charles III ka uruar 17-vjetorin e Pavarësisë Kosovës dhe popullit të saj, përmes një letre dërguar presidentes, Vjosa Osmani. 

Ambasada e Mbretërisë së Bashkuar në Kosovë, ndau në rrjetet sociale letrën e mbretit. Ky i fundit shprehej i lumtur që dy vendet ndaj lidhje kaq të forta dhe pret që miqësia mes tyre të forcohet më shumë.

Mbreti tha se shpreson që të dy kombet të mund të bashkëpunojnë për të dhënë një ndikim pozitiv në ndryshimet klimatike dhe çështjet mjedisore, të cilat na prekin të gjithë globin.

“E nderuara zonja Presidente,

Unë dhe bashkëshortja ime kemi kënaqësinë t’i dërgojmë Shkëlqesisë Juaj dhe popullit të Republikës së Kosovës urimet tona më të ngrohta me rastin e festës suaj kombëtare. Jam shumë i kënaqur që vendet tona ndajnë lidhje kaq të forta dhe pres të forcojmë më tej miqësinë tonë.

Është shpresa ime dhe ambicia ime e fortë që kombet tona të mund të bashkëpunojnë për të dhënë një ndikim pozitiv në ndryshimet klimatike dhe çështjet mjedisore, të cilat na prekin të gjithëve globalisht. Unë dhe gruaja ime kemi kënaqësi të madhe t’ju përcjellim urimet tona më të mira për ju dhe për të gjithë kosovarët në vitin e ardhshëm.

Charles R”, thuhet në letrën e mbretit.