Rajoni

FOTO/ Dëshmia tronditëse, si përdhunohet e reja kosovare nga 3 ushtarë serbë para familjes

Deputetja Flora Brovina, ka publikuar një dëshmi tronditës të dhunës seksuale të serbëve në Kosovë. Ajo ka treguar një foto ku shihen disa ushtarë serbë që përdhunojnë një të re shqiptare para syve të familjes.
Featured image of article: FOTO/ Dëshmia tronditëse, si përdhunohet e reja kosovare nga 3 ushtarë serbë para familjes Dëshmia tronditëse, serbët dhunojnë të renë shqiptare para syve të familjes
Përditësuar:

KOSOVË- Në ditën kur Kuvendi i Kosovës po mbanë seancën plenare për votimin e rezolutës për genocidin serb, deputetja Flora Brovina ka paraqitur para mediave një dëshmi tronditëse.

Deputetja e PDK-së ka treguar një dëshmi ku shihet se si ushtarët serbë dhunojnë një femër në Kosovë, ndërsa sipas saj dhunimi është kryer në sy të familjarëve.

Brovina ka treguar për këtë një fotografi, e marrë nga aparati i humbur i një ushtari serb.

“Rasti në fjalë është një fotografi që është gjetur në aparatin e një ushtari serb që dëshmon aktin, mënyrën se si i kanë dhunuar gratë. Kjo është vetëm njëra nga mënyrat kur i kanë detyruar familjarët që ta shohin aktin e dhunës seksuale. Shumë raste kemi kur ato janë mbledhur shumë në numër dhe sistematikisht janë dhunuar nga ushtarët serb”, tha ajo.

Brovina nuk tregoi detaje rreth vendit ku është shënuar rasti në fjalë, për shkak të privatësisë, por tha: “Gruaja është 50 vjeçare kur ka ndodhur ka qenë 35 vjeçare. Tani është zgjuar vetëdijësimi institucional që për këto viktima të ngriten aktakuza. Serbia është fajtorja”.

(B.B/ Dosja.al)

  • 19:30

    U fotografua teksa përdhunonte kosovaren në sy të familjes, ky është një nga serbët (Foto)

    Personi që shikoni në foto është Dejan Stankovicc. Ai dyshohet se është një nga serbët të cilët janë fotografuar teksa përdhunojnë të renë kosovare, në prani të familjes gjatë luftës në Kosovë.

    Serbi Dejan Stankovic

    Akti kriminal mund të jetë kryer në zonën e komunës së Rahovecit, dhe gruaja që shfaqet në foto teksa dhunohet nga tre serbë është gjallë.

  • 19:30

    RrGK: U shkel dinjiteti njerëzor, nuk ndihmon në arritjen e drejtësisë

    KOSOVË– Rrjeti i Grave të Kosovës ka dënuar publikimin e disa fotve ku shihej përdhunimi i një vajze kosovare nga tre serbë. Në një deklaratë për mediat RRGK-ja thekson se ky gjest i bërë nga deputetja Brevina ka shkelur dinjitetin njerëzor.

    Sipas Rrjetit të Grave të Kosovës zbulimi i identitetit të të përdhunuarës nuk ndihmon në vendosjen e drejtësisë.

    Organizata u kërkon deputetëve të Kuvendit të Republikës së Kosovës që në përmbushje të obligimeve në kuadër të mandatit të tyre të kërkojnë llogari nga Gjykatat, si ato vendore po ashtu edhe ato ndërkombëtare për mungesën e reagimit institucional dhe trajtimin dinjitoz të rasteve të dhunimeve seksuale të kryera gjatë luftës së fundit në Kosovë.

    Deklarata e RRGK-së

    Rrjeti i Grave të Kosovës (RrGK) ka përcjellur me shqetësim publikimin e sotëm, nga Deputetja Flora Brovina, të një fotografie që dëshmon dhunimin e një gruaje nga forcat ushtarake serbe gjatë luftës në Kosovë.

    Konsiderojmë se zonja Brovina me këtë veprim ka shkelur parimin e dinjitetit të të mbijetuarave, duke kujtuar se përmes kësaj fotografie është zbuluar edhe trupi i të mbijetuarës së dhunës seksuale gjatë luftës në Kosovë. Poashtu, zonja Brovina ka shkelur Nenin 23 të Kushtetutës së Republikës së Kosovës, i cili përcakton se dinjiteti i njeriut është i pacenueshëm dhe është bazë e të gjitha të drejtave dhe lirive themelore të njeriut.

    Kjo fotografi ku gruaja dhunohet para familjarëve të saj, përveç që është shumë e rëndë dhe shqetësuese, mund të ndikojë edhe në përkeqësim të gjendjes emocionale dhe psiqike të të mbijetuarës. Për më tepër mund të shërbejë si dekurajim për raportim nga të mbijetuarat tjera të dhunës seksuale, dhe të shërbejë si precedent i rrezikshëm se çka i pret të gjitha gratë dhe vajzat që raportojnë dhunën seksuale.

    RrGK u bën thirrje mediave që të largojnë dhe të mos e shpërndajnë këtë fotografi e cila shkel dinjitetin e viktimës të mbrojtur me Kushtetutën e Republikës së Kosovës dhe mund të shërbejë vetëm si dëshmi para organeve të drejtësisë, mirëpo asnjëherë të qarkullojë në këtë mënyrë në publik.

    RrGK ju bën thirrje të gjithëve që të jenë të kujdesshëm, të ofrojnë mbështetjen e tyre ndaj të mbijetuarave, dhe të punojnë në ruajtjen e dinjitetit të tyre duke mos i ritraumatizuar ato dhe familjarët e tyre. RrGK kërkon nga institucionet e Kosovës që nismat që ata ndërmarrin të jenë gjithpërfshirëse, duke mos përjashtuar askënd, siç ishte Rezoluta e votuar në Kuvendin e Kosovës. Për 20 vite kanë qenë organizatat e grave ato që kanë ofruar mbështetje për këto gra e burra, derisa institucionet për 17 vite me rradhë kanë qëndruar në heshtje.

    Në prononcim para mediave, zonja Brovina pohon se këto dëshmi janë paraqitur para organeve të drejtësisë, mirëpo sipas saj, as Prokuroria Speciale e as EULEX-i asnjëherë nuk kanë intervistuar këto viktima. Nëse kjo qëndron, RrGK mbështet fuqishëm dhe pa asnjë rezervë çdo rrugë institucionale në kërkim të drejtësisë për të mbijetuarat e dhunës seksuale gjatë luftës në Kosovë, mirëpo ky veprim i zonjës Brovina nuk ka kontribuuar  në arritjen e drejtësisë, gjetjen e kryesve të këtyre krimeve apo trajtimin e dinjitetshëm të  mbijetuarave të dhunës seksuale gjatë luftës në Kosovë.

    RrGK përmes kësaj kumtese kërkon nga deputetët e Kuvendit të Republikës së Kosovës që në përmbushje të obligimeve në kuadër të mandatit të tyre të kërkojnë llogari nga Gjykatat, si ato vendore po ashtu edhe ato ndërkombëtare për mungesën e reagimit institucional dhe trajtimin dinjitoz të rasteve të dhunimeve seksuale të kryera gjatë luftës së fundit në Kosovë.

  • 18:09

    Publikimi i fotos tronditëse nga deputetja e PDK-së/ Reagon Veton Surroi: Brovina bëri një pornografi politike

    Publicisti Veton Surroi

    Publicisti Veton Surroi ka reaguar, pas publikimit të një fotoje tronditëse, ku një grua shqiptare nga Kosova dhunohet seksualisht nga tre serbë.

    Fotoja u publikua sot nga deputetja e PDK-së Flora Brovina. Surroi shprehet se Brovina ka bërë sot pornografi politike.

    Postimi i Veton Surroit:

    Publikimi i një akti seksual për përfitim parash quhet pornografi.

    Publikimi i një akti seksual për përfitim politik quhet pornografi politike.

    Publikimi i një dhunimi quhet perverzion. Në këso rasti, politik.

  • 17:53

    Ish-presidentja-deputetes: Gjest i neveritshëm, po ritraumatizon dinjitetin e viktimës

    Ish-Presidentja e Kosovës Atifete Jahjaga i është përgjigjur gjestit të deputetetes së Flora Brevinas, teksa kjo e fundit në senacën e Kuvendit bëri publike një foto ku dokumentohej përdhunimi i një shqiptareje nga serbët, gjatë luftës në Kosovë.

    Jahjaga shkruan se një veprim i tillë duhet dënuar, pasi është e jashtëligjshme të zbulohet identiteti i një viktime dhune. Ish-presidentja i drejtohet deputetes teksa thekson se dikur ajo ngrinte dorën kundër të drejtave të grave e burrave të dhunuar seksualisht gjatë luftës në Kosovë, ndërsa sot bëri një gjest të neveritshëm.

    Ish-presidentja Atifete Jahjaga dhe deputetja Flora Brevina

    “Një goditje e rëndë u është bërë sot mijëra të mbijetuarve të dhunës seksuale gjatë luftës në Kosovë me publikimin e pamjeve që tregojnë dhunimin e një gruaje nga forcat ushtarake serbe gjatë luftës! Është e gërditshme, e neveritshme, dhe e turpshme se si një deputete e Kuvendit të Kosovës, e cila dikur ngriste dorën kundër të drejtave të grave e burrave të dhunuar seksualisht gjatë luftës në Kosovë, sot shfrytëzoi pikërisht godinën e Kuvendit për të publikuar para mediave një fotografi që thuhet se dokumenton aktin e dhunimit të një gruaje shqiptare nga tre ushtarë serbë.

    Veprimi i deputetes është joetik, joligjor, e jonjerëzor! Publikimi fotografisë cenon rëndë privatësinë e viktimës dhe mund të çojë në zbulimin e identitetit të një dëshmitareje potenciale të krimit që Serbia ka kryer ndaj popullit tonë. Publikimi i asaj fotoje ri-traumatizon viktimën dhe të gjithë të mbijetuarit e dhunës seksuale gjatë luftës në Kosovë dhe dekurajon të mbijetuarit që të dalin përpara me të vërtetën mbi krimin që është kryer mbi trupat e tyre.

    Publikimi i fotografisë është një goditje e rëndë për dinjitetin e gruas që shihet në fotografi dhe është një goditje e rëndë për luftën tonë për drejtësi për mijëra gra e burra që u bënë cak i një fushate të egër të dhunimit seksual që Serbia kreu në Kosovë gjatë luftës së 1998-1999 për ta spastruar Kosovën etnikisht nga shqiptarët!

    U bëjë thirrje mediave që të largojnë fotografinë nga platformat e tyre për të mos e dëmtuar viktimën edhe më shumë! U bëjë thirrje autoriteteve të drejtësisë që të hetojnë këtë veprim dhe të veprojnë në përputhje me ligjin!

    Të mbijetuarit e dhunës seksuale gjatë luftës në Kosovë nuk janë vegla që mund t’i përdorni për spektaklet e juaja politike!”, deklaroi Jahjaga.

Shto Koment