Aktualitet

Zbardhet vjedhja në shkollën “Besëlidhja’ në Lezhë/ Arrestohet 22-vjeçari, procedohen penalisht pesë të mitur

19 Mars 2026, 14:54 Nga D.S

LEZHË- Policia e Lezhës ka zbardhur vjedhjen e ndodhur katër ditë më parë në shkollën “Besëlidhja”, duke vënë në pranga 22-vjeçarin Arsel Brunga dhe duke nisur procedimin penal për pesë të mitur të moshave 15-17 vjeç.

Sipas njoftimit të policisë, Brunga dyshohet se ka nxitur të rinjtë, tre prej të cilëve nxënës të kësaj shkolle, për të vjedhur 16 laptopë, dy videoprojektorë dhe serverin qendror të kamerave të sigurisë. Pajisjet e vjedhura u transportuan me një automjet tip “Volkswagen” dhe u fshehën në banesën e 22-vjeçarit, si dhe në bodrumin e një pallati në ndërtim.

Gjatë operacionit, policia arriti të sekuestronte mjetin dhe të gjente 16 prej pajisjeve teknologjike, ndërsa të gjitha materialet hetimore i kanë kaluar Prokurorisë së Lezhës për veprime të mëtejshme ligjore.

Njoftimi i policisë:

"Lezhë/Finalizohet operacioni i koduar “Pajisjet”. Zbardhen autorësia dhe rrethanat e vjedhjes së konstatuar 4 ditë më parë, në shkollën “Besëlidhja”. Identifikohen 6 shtetasit që hynë pas mesnate, në ambientet e shkollës, vodhën 19 pajisje dhe dëmtuan dyert e shkollës. 5 prej tyre, shtetas të mitur, u proceduan penalisht, ndërsa bashkautori, 22 vjeç, u vu në pranga. Gjenden 16 prej pajisjeve të vjedhura (laptopë, videoprojektorë dhe server), të fshehura në një objekt në ndërtim dhe në banesën e të arrestuarit. Si rezultat i veprimeve hetimore profesionale të kryera menjëherë pas njoftimit, pasditen e datës 15.03.2026, se në shkollën 9-vjeçare “Besëlidhja”, Lezhë, ishin vjedhur 16 laptopë, 2 videoprojektorë dhe serveri qendror i kamerave të sigurisë, si dhe ishin dëmtuar dyer të objektit, shërbimet e Komisariatit të Policisë Lezhë mundësuan kapjen e autorëve dhe sqarimin e rrethanave të rastit.

Në vijim, në kuadër të operacionit të koduar “Pajisjet”, u vu në pranga shtetasi A. B., 22 vjeç, si dhe u proceduan penalisht 5 të mitur të moshave 15-17 vjeç (3 prej tyre, nxënës në këtë shkollë), të cilët dyshohet se janë nxitur nga 22-vjeçari, për kryerjen e këtij krimi. 6 shtetasit dyshohet se rreth orës 01:00 të datës 14.03.2026, kanë hyrë në ambientet e shkollës “Besëlidhja”, kanë dëmtuar dyer e objektit, si dhe kanë vjedhur 16 laptopë, 2 videoprojektorë dhe serverin qendror të kamerave të sigurisë.
Më pas, 6 shtetasit kanë transportuar pajisjet, me automjetin e të arrestuarit, dhe i kanë fshehur ato, në bodrumin e një pallati aktualisht në ndërtim dhe në banesën e 22-vjeçarit. 16 prej pajisjeve të vjedhura u gjetën dhe u sekuestruan me cilësinë e provës materiale, së bashku me automjetin tip “Volkswagen”, me të cilin u transportuan.
Materialet procedurale iu referuan Prokurorisë Lezhë, për veprime të mëtejshme.", shkruhet në njoftimin e policisë./Dosja.al