Politike

Presidenca përgënjeshtron deklaratat e LVV-së: Gënjeshtër, Osmanit nuk i janë ofruar nënshkrimet nga LVV për rizgjedhje

Shefja e stafit të Osmani, Learta Hollaj e quajti gënjeshtër deklaratën e shefes së Grupit Parlamentar të LVV-së, Arbërie Nagavci, se partia e saj ia kishte ofruar edhe Osmanit 30 nënshkrimet e nevojshme për të garuar për një mandat të dytë, por se ajo e kishte hedhur poshtë mundësinë.

4 Mars 2026, 20:08 Nga E. D
Presidenca përgënjeshtron deklaratat e LVV-së:
Vjosa Osmani

KOSOVË- Presidenca e Kosovës e ka mohuar se partia në pushtet Lëvizja Vetëvendosje i kishte ofruar mbështetje presidentes Vjosa Osmani për të garuar për një mandat të dytë në krye të shtetit, duke ia siguruar edhe asaj nënshkrimet e nevojshme për të hyrë në garë.

Shefja e stafit të Osmani, Learta Hollaj e quajti gënjeshtër deklaratën e shefes së Grupit Parlamentar të LVV-së, Arbërie Nagavci, se partia e saj ia kishte ofruar edhe Osmanit 30 nënshkrimet e nevojshme për të garuar për një mandat të dytë, por se ajo e kishte hedhur poshtë mundësinë.

"Presidentja Osmani demanton se i janë ofruar nënshkrimet dhe përkrahja nga Lëvizja Vetëvendosje për rizgjedhje si presidente e Kosovës", shkroi në Facebook Hollaj.

Nagavci tha se LVV-ja i ka numrat e mjaftueshëm të deputetëve për t’ua siguruar garimin dy kandidatëve, por, “duke dashur të ofrojë mundësi për bashkëpunim dhe për një garë që u jep mundësi garimi edhe kandidatëve të tjerë”, ajo është e gatshme t’ua ofrojë nënshkrimet partive të tjera për një kandidat tjetër.

Më herët LVV-ja e kryeministrit Albin Kurti e propozoi zëvendëskryeministrin dhe ministrin e Jashtëm, Glauk Konjufca, për president të Kosovës. Konjufca është kandidati i vetëm i propozuar deri më tani, teksa po afrohet afati kushtetues për zgjedhjen e presidentit.

Kryetarja e Kuvendit të Kosovës, Albulena Haxhiu, tha se për ta thirrur në seancë pr zgjedhjen e presidentit, nevojiten të paktën dy kandidatë në garë.

“Derisa nuk kemi së paku dy kandidatë që nuk kanë siguruar 30 nënshkrime për garën për president, unë nuk mund të thërrasë seancën për zgjedhjen e presidentit”, tha Haxhiu./Dosja.al

vjosa osmani

Sondazh

Poll

MË SHUMË