Sport

Cristiano Ronaldo tani shfaqet si “president” klubi, blen 25% të aksioneve të Almeiras…

Ylli portugez, Cristiano Ronaldo, ka blerë 25% të aksioneve të UD Almerías, skuadër që aktualisht renditet e treta në Segunda División (Liga Hypermotion).

26 Shkurt 2026, 13:30 Nga DOSJA

Cristiano Ronaldo tani shfaqet si “president” klubi, blen 25%

SPANJE - Operacioni është realizuar përmes filialit të ri “CR7 Sports Investments”, pjesë e kompanisë së tij CR7 SA, me të cilën sulmuesi 41-vjeçar menaxhon bizneset dhe investimet e tij.

Në komunikatën zyrtare nuk janë bërë publike detaje financiare mbi këtë “investim strategjik”, por është theksuar se bëhet fjalë për një angazhim afatgjatë në pronësinë e klubeve profesioniste.

“Prej kohësh kam pasur ambicien të kontribuoj në futboll përtej fushës së lojës. Almería është një klub spanjol me bazë të fortë dhe potencial të qartë rritjeje. Dua të punoj me ekipin drejtues për ta mbështetur klubin në këtë fazë të re zhvillimi”, është shprehur Ronaldo.

Presidenti i Almerías, Mohamed Al Khereiji, e vlerësoi hyrjen e portugezit si një hap të rëndësishëm për projektin e klubit. “Ai konsiderohet më i miri në fushë, njeh shumë mirë ligat spanjole dhe e kupton potencialin e asaj që po ndërtojmë këtu, si në ekipin e parë ashtu edhe në akademi”, deklaroi ai.

Ky investim shënon një moment të ri në karrierën e Ronaldos si sipërmarrës, duke zgjeruar ndikimin e tij në botën e futbollit edhe në nivel drejtues.

B.T (Dosja.al)

Sondazh

Poll

MË SHUMË