Politike

Shtyhet seanca paraprake ndaj Erion Veliajt, e radhës pritet të mbahet më 19 janar

Mësohet se seanca e parashikuar të mbahej këtë të hënë është shtyrë për në datën 19 janar. 

5 Janar 2026, 09:48 Nga I.A
Shtyhet seanca paraprake ndaj Erion Veliajt, e radhës pritet të mbahet
Erion Veliaj

TIRANË- Seanca paraprake ndaj kryebashkiakut të arrestuar Erion Veliaj është shtyrë sërish në GJKKO. Mësohet se seanca e parashikuar të mbahej këtë të hënë është shtyrë për në datën 19 janar. 

Bëhet me dije se shkak për shtyrjen e seancës u bë mungesa e dy avokatëve mbrojtës. Përmes një emaili, avokatja e Veliajt ka kërkuar shtyrjen e seancës, duke argumentuar se ndodhej jashtë vendit.

Një tjetër shkak është bërë furgoni i Drejtorisë së Burgjeve, i cili është paraqitur në paraburgimin e Durrësit në orën 08:55 ndërkohë që seanca fillonte në orën 09:00. Veliaj ka komunikuar me avokatin Maks Haxhia për ta vënë në dijeni, ndërkohë që edhe nga ana e prokurorëve është cilësuar jo serioze vonesa për ta shoqëruar Veliajn për në seancë.

Për çfarë akuzohet Veliaj?

SPAK ka përfunduar hetimet dhe ka dërguar për gjykim në Gjykatën e Posaçme të Shkallës së Parë dosjen e kryebashkiakut Erion Veliaj. Në dosjen e kopsitur nga SPAK 13 akuza që rëndojnë mbi Veliajn dhe 12 akuza që rëndojnë mbi bashkëshorten e tij, Ajola Xoxa. Në përfundim të hetimeve paraprake, ka rezultuar se Veliaj dhe Xoxa, në bashkëpunim mes tyre, në 9 raste të veçanta, kanë marrë përfitime të parregullta në formën e shumave monetare dhe pasurive të paluajtshme, nga subjekte tregtarë dhe organizata jofitimprurëse, të cilët nga ana e tyre kanë marrë leje ndërtimi dhe përfituar fonde publike nga Bashkia Tiranë.

Nga hetimi penal janë grumbulluar të dhëna konkrete, të cilat provojnë se Veliaj, në cilësinë e Kryetarit të Bashkisë Tiranë, me nënshkrimin e tij ka miratuar në çdo rast shpërndarjen e këtyre fondeve, të cilat më pas kanë përfunduar tek OJF-të e kontrolluara nga bashkëshortja e tij dhe individë të afërt me të. Gjithashtu, këta të pandehur, për shkak të funksionit që kryen Veliaj, kanë përfituar në mënyrë të parregullt edhe pasuri të paluajtshme në vlerë të konsiderueshme nga subjekte tregtarë që kanë marrë fonde publike dhe leje ndërtimi nga Bashkia Tiranë.

Në të gjitha këto episode të pandehurit, në bashkëpunim me njëri tjetrin, kanë konsumuar elementët e veprës penale të parashikuar nga neni 260 i Kodit Penal. Shoqëritë me përgjegjësi të kufizuar si edhe organizatat jofitimprurëse të lartpërmendura, duke dhënë përfitime të parregullta për shkak të detyrës që kryen i pandehuri Erion Veliaj, kanë konsumuar elementët e parashikuar nga neni 245 i Kodit Penal./Dosja.al

erion veliaj

Sondazh

Poll

MË SHUMË