Aktualitet

Hoxha: Personazhe të botës së krimit kanë pasaporta greke, më ofruan edhe mua në këmbim të heshtjes!

Hoxha tha se edhe atij personalisht i janë bërë oferta nga biznesmenë dhe individë të lidhur me qarqe politike dhe ultranacionaliste greke, me qëllim që të heshtë dhe të mos kritikojë Alfred Bejlerin apo politikat dhe fushatat greke në Shqipëri. Në këmbim, sipas tij, i është ofruar pajisja me pasaportë greke dhe përfitime të tjera.

12 Dhjetor 2025, 21:35 Nga E. D
Hoxha: Personazhe të botës së krimit kanë pasaporta greke,
Flamur Vezaj, Artan Hoxha

TIRANË- Gazetari investigativ Artan Hoxha ka bërë deklarata të forta gjatë intervistës në “Ma Shqip me Flamur Vezaj”, duke ngritur shqetësimin se një numër i madh personash të botës së krimit të organizuar janë pajisur me pasaporta greke, në rrethana që sipas tij ngrenë dyshime serioze për rrjete të mirëorganizuara me prapavijë politike dhe ultranacionaliste.

Hoxha tha se edhe atij personalisht i janë bërë oferta nga biznesmenë dhe individë të lidhur me qarqe politike dhe ultranacionaliste greke, me qëllim që të heshtë dhe të mos kritikojë Alfred Bejlerin apo politikat dhe fushatat greke në Shqipëri. Në këmbim, sipas tij, i është ofruar pajisja me pasaportë greke dhe përfitime të tjera.

“Më kanë ofruar njerëz biznesi të lidhur me qeveri dhe individë ultranacionalistë grekë që të hesht dhe, në këmbim, të më pajisin me pasaportë greke. Nuk kam pranuar,” deklaroi Hoxha.

Ai solli edhe shembuj konkretë, duke përmendur emra të njohur të krimit të organizuar shqiptar, të cilët sipas tij janë pajisur me pasaporta greke të rregullta. Mes tyre, Suel Çela, i shpallur në kërkim nga drejtësia shqiptare si kreu i bandës së Elbasanit, Gramoz Rexhepi, i cilësuar si njeri i karteleve të drogës në Amerikën Latine dhe i arrestuar në Ekuador me pasaportë greke, si dhe Plarent Dervishi, i përfshirë në dosje të rënda kriminale në Shqipëri.

“Pyetja është kush i pajisi këta me pasaporta? Është e njëjta linjë që më ofruan edhe mua,” theksoi Hoxha, duke hedhur dyshime se pas këtyre rasteve qëndron një rrjet i strukturuar interesash, që përdor shtetësinë si mjet ndikimi, mbrojtjeje dhe presioni ndaj gazetarëve, mediave dhe opinionit publik.

Deklaratat e tij kanë hapur një debat të fortë mbi rolin e shtetësisë greke në këto raste, lidhjet e mundshme me qarqe ultranacionaliste dhe ndikimin që këto struktura mund të kenë në politikën, median dhe sigurinë rajonale.

flamur vezaj artan hoxha

Sondazh

Poll

MË SHUMË