Aktualitet

BIRN: “Metamorfoza” shfryhet në gjykatë, lirohen Xhevahir Lita dhe Oltion Bistri

Gjykimi për investitorin strategjik të qeverisë Rama, biznesmenin Pëllumb Gjoka dhe ish-funksionarin tjetër të policisë, Ardit Hasanabegaj është veçuar nga gjykata për shkak të zvarritjes së gjykimit.

18 Nëntor 2025, 18:30 Nga M.L
BIRN: “Metamorfoza” shfryhet në gjykatë, lirohen Xhevahir
Foto ilustruese

Gjykata e Posaçme kundër Korrupsionit dhe Krimit të Organizuar shpalli të martën më 18 nëntor masat e dënimit për pesë nga shtatë të pandehurit e çështjes penale të quajtur “Metamorfoza”, të cilët janë të akuzuar për vrasje e porositje të tyre, grup të strukturuar kriminal, korrupsion e armëmbajtje pa leje.

Për pesë të pandehurit Behar Brajoviç, Edmond Preka, Astmer Bilali, ish-prokurorin Xhevahir Lita dhe ish-drejtorin e njësisë së Operacionales në Policinë e Shtetit, Oltion Bistri, gjykata dha në total 26.6 vjet burg nga 34 vjet që kishte kërkuar SPAK – masa të cilat do të reduktohen me 1/3 për shkak të gjykimit të shkurtuar.

Gjykimi për investitorin strategjik të qeverisë Rama, biznesmenin Pëllumb Gjoka dhe ish-funksionarin tjetër të policisë, Ardit Hasanabegaj është veçuar nga gjykata për shkak të zvarritjes së gjykimit.

Ish-prokurori Xhevahir Lita dhe ish-kreu i njësisë Operacionale, Oltion Bistri përfituan lirim të menjëhershëm, pasi dënimi i dhënë nga gjykata është më i vogël se sa koha që ata kanë kaluar në paraburgim.

Trupi gjykues i kryesuar nga gjyqtarja Elteva Deda, me anëtare Irena Gjokën dhe Flora Hajredinajn e gjeti fajtor prokurorin Xhevahir Lita për veprën penale të korrupsionit në dy episode dhe zbulim të akteve sekrete. Lita u dënua me 5 vjet heqje lirie në total dhe pas aplikimit të gjykimit të shkurtuar me 3.4 vjet burg. Gjykata urdhëroi gjithashtu shuarjen e masës “arrest me burg” për shkak të shlyerjes së dënimit me kohën e paraburgimit.

Ndryshe nga Lita, gjykata e gjeti të pafajshëm Bistrin për akuzat e korrupsionit dhe pastrimit të parave dhe e dënoi atë me 3 vjet burg për zbulim të akteve sekrete. Për shkak të gjykimit të shkurtuar, dënimi u reduktua në 2 vjet – ndaj gjykata urdhëroi lirimin e tij me argumentin se ai kishte vuajtur më shumë burg se sa masa e dënimit.

Prokurorët e SPAK, Arben Kraja dhe Bledar Maksuti kërkuan 6 vjet burg për Litën dhe 9 vjet burg për Bistrin. Një vit më parë, Gjykata e Posaçme e Shkallës së Parë liroi pesë pasuri të paluajtshme të sekuestruara në kuadër të hetimit pasuror ndaj Bistrit. Fillimisht, me kërkesë të prokurorisë, u sekuestruan 20 dyqane, 10 apartamente, një vilë dhe një garazh, me vlerë totale rreth 3 milionë euro, në pronësi të Oltian Bistrit e personave të lidhur.

Në aplikim të gjykimit të shkurtuar, gjykata vendosi të martën dënimin përfundimtar të të pandehurit Behar Brajoviç me 8 vjet e 8 muaj burgim; ndaj Edmond Prekës 7 vjet heqje lirie dhe për Astmer Bilalin u caktua masa përfundimtare 5 vjet e 8 muaj burgim – dënime që janë më të buta nga ato të kërkuara prej SPAK./ Reporter.al

gjykata e posaçme kundër korrupsionit dhe krimit të organizuar

Sondazh

Poll

MË SHUMË