Bota

Edhe Uruguai i bashkohet vendeve që legalizojnë eutanazinë, miratohet ligji që lejon vdekjen e asistuar për personat në fazë terminale

Ligji i ri synon të garantojë të drejtën për t’u “përballur me vdekjen me dinjitet” për të gjithë të rriturit që janë mendërisht të shëndetshëm, por që ndodhen në fazën terminale të një sëmundjeje të pashërueshme ose që vuajnë në mënyrë të padurueshme nga sëmundje të pakthyeshme.

16 Tetor 2025, 08:25 Nga M.L
Edhe Uruguai i bashkohet vendeve që legalizojnë eutanazinë,
Foto ilustruese

AMERIKA LATINE- Siç pritej, Uruguai miratoi të mërkurën një ligj për fundin e jetës që lejon eutanazinë në kushte të caktuara, pas vitesh të tëra procesesh të vështira parlamentare mbi çështjen e mprehtë sociale. Senati e miratoi legjislacionin me një shumicë të gjerë prej 20 votash nga 31 anëtarët e pranishëm në seancë.

Shteti relativisht i vogël i Amerikës Latine me një popullsi shumicë katolike u bë kështu anëtar i rrethit të vogël të vendeve ku vdekja me asistencë mjekësore lejohet në kushte të caktuara, ku përfshihen edhe Kanadaja, Spanja, Zelanda e Re, Kuba, Kolumbia dhe Ekuadori.

Ligji i ri synon të garantojë të drejtën për t’u “përballur me vdekjen me dinjitet” për të gjithë të rriturit që janë mendërisht të shëndetshëm, por që ndodhen në fazën terminale të një sëmundjeje të pashërueshme ose që vuajnë në mënyrë të padurueshme nga sëmundje të pakthyeshme.

Pas një debati që zgjati mbi 10 orë në senat, projektligji u miratua me mbështetjen e plotë të partisë në pushtet dhe votën pro të disa deputetëve nga partitë e opozitës. Vendimi u përshëndet nga organizatat për të drejtat e njeriut dhe grupet pro-eutanazisë, ndërsa ka ngjallur debat në qarqet fetare dhe konservatore./ Dosja.al

uruguai

Sondazh

Poll

MË SHUMË