Bota

Guvernatori i Pensilvanisë evakuohet pas zjarrit të qëllimshëm në rezidencën zyrtare, Policia jep 10 mijë dollarë shpërblim për informacion

Autoritetet kanë bërë të ditur se zjarri dyshohet se është vënë qëllimisht, zjarri shkaktoi dëme të konsiderueshme në një pjesë të rezidencës

13 Prill 2025, 19:09 Nga A.Ll
Guvernatori i Pensilvanisë evakuohet pas zjarrit të
Guvernatori i Pensilvanisë, Josh Shapiro

SHBA - Guvernatori i Pensilvanisë, Josh Shapiro, dhe familja e tij janë evakuuar gjatë natës nga rezidenca zyrtare në Harrisburg, pasi një zjarr i qëllimshëm shpërtheu në një pjesë të banesës.

Shapiro konfirmoi ngjarjen përmes një deklarate në rrjetin X (ish-Twitter), duke theksuar se “askush nuk u lëndua dhe zjarri u shua me sukses.” Sipas tij, familja u zgjuar nga autoritetet që trokitën me forcë në derën e banesës ndërsa flakët po përhapeshin.

Autoritetet kanë bërë të ditur se zjarri dyshohet se është vënë qëllimisht. Nuk janë dhënë ende detaje mbi motivet apo ndonjë autor të dyshuar, por policia ka shpallur një shpërblim prej 10,000 dollarësh për çdo informacion që çon në identifikimin dhe arrestimin e përgjegjësit.

Zjarri shkaktoi dëme të konsiderueshme në një pjesë të rezidencës, ndërsa pjesa tjetër – ku ndodhej familja Shapiro – ishte ndërtuar me tulla dhe mbeti e paprekur nga flakët.

Ngjarja ndodhi vetëm disa orë pas përfundimit të natës së parë të Pesach, festa hebraike e Pashkës, të cilën guvernatori Shapiro dhe familja e tij e festuan në shtëpinë e tyre.

Hetimet për ngjarjen vazhdojnë, ndërsa autoritetet federale dhe shtetërore janë përfshirë në procesin e mbledhjes së provave dhe shqyrtimit të kamerave të sigurisë në zonë.

guvernatori i pensilvanisë josh shapiro

Sondazh

Poll