Politike

Hargreaves thirrje Serbisë: Milan Radoiçiç me njerëzit e tij duhet të sillen para drejtësisë! Mbështesim institucionet e Kosovës që po hetojnë sulmet në vend

Ambasadori theksoi se Mbretëria e Bashkuar nuk ka informacione të privilegjuara mbi përgjegjësit e sulmeve, por bëri thirrje që Serbia të marrë masa konkrete.

3 Mars 2025, 20:57 Nga N.F
Hargreaves thirrje Serbisë: Milan Radoiçiç me njerëzit e
Jonathan Hargreaves

KOSOVË- Ambasadori britanik në Kosovë, Jonathan Hargreaves në një intervistë të zhvilluar së fundmi ka folur mbi sulmet që kanë ndodhur në territorin e Kosovës, duke përfshirë sulmin terrorist në Banjskë dhe atë në kanalin e Ibër-Lepencit. Në një intervistë në RTV Dukagjini, ambasadori Hargreaves ka kërkuar që Serbia të nxjerrë Milan Radoiçiç para drejtësisë për rolin e tij në sulmin në Banjskë. Ai më tej gjatë fjalës së tij theksoi angazhimin e Britanisë së Madhe për mbështetjen e sigurisë së Kosovës përmes pranisë së KFOR-it.

“Me të vërtetë, dy sulmet ishin të rënda. Sulmi në Banjskë ka qenë qartë një akt shumë i rëndë dhe një ngjarje destabilizuese mbi territorin e Kosovës. I ngjashëm, edhe sulmi në kanalin Ibër-Lepenc ishte një sulm i rëndë ndaj infrastrukturës qenësore. Të dyja kanë qenë shumë serioze,” tha ai.

Ambasadori theksoi se Mbretëria e Bashkuar nuk ka informacione të privilegjuara mbi përgjegjësit e sulmeve, por bëri thirrje që Serbia të marrë masa konkrete.

“Kemi qenë shumë të qartë me Serbinë se ata duhet të sjellin Radoiçiqin para drejtësisë dhe të përgjigjet për rolin e tij dhe të njerëzve që kanë punuar me të në sulmin e Banjskës. Ne përherë i bëjmë thirrje Serbisë që atë dhe bashkëpunëtorët e tij t’i thërrasin në përgjegjësi,” theksoi ai.

Më tej ambasadori britanik shprehu mbështetjen për institucionet e Kosovës që po hetojnë këto ngjarje.

“Ne jemi mbështetës të Policisë së Kosovës dhe të tjerëve që po hetojnë sulmin ndaj kanalit, por nuk kam informacione të privilegjuara se kush ka qenë përgjegjës për sulmin. Megjithatë, duhet të mbështesim këto hetime dhe t’i bëjmë thirrje Serbisë të bashkëpunojë me hetuesit,” përfundoi ai.

jonathan hargreaves kosove

Sondazh

Poll

MË SHUMË