Bota

"Kemi nevojë për të rritur mbrojtjen", Von der Leyen: Nesër do të informoj vendet anëtare për planin e riarmatimit të Evropës

Ajo tha se paqja e qëndrueshme mund të ndërtohet vetëm mbi forcë dhe duke forcuar fillimisht veten.

3 Mars 2025, 15:15 Nga r.ll
"Kemi nevojë për të rritur mbrojtjen", Von der Leyen:
ursula von der leyen

BRUKSEL- Presidentja e Komisionit Evropian, Ursula von der Leyen thotë se nesër do të informojë vendet anëtare të BE-së për planet për të forcuar industrinë evropiane të mbrojtjes dhe aftësitë ushtarake të BE-së.

Presidentja e KE, e cila mori pjesë dje në samitin për Ukrainën në Londër, u tha gazetarëve se Evropa ka nevojë për një rritje masive në mbrojtje. Sipas saj paqja e qëndrueshme mund të ndërtohet vetëm mbi forcë dhe duke forcuar fillimisht veten.

“Nesër do të informoj vendet anëtare përmes një letre për planin e riarmatimit të Evropës. Ne kemi nevojë për një rritje masive në mbrojtje, pa asnjë dyshim. Ne duam paqe të qëndrueshme, por paqja e qëndrueshme mund të ndërtohet vetëm mbi forcën dhe forca fillon me forcimin e vetvetes”, është shprehur ajo.

Dhjetëra liderë prej Evropës, Kanadasë, Turqisë dhe NATO-s janë mbledhur në një samit të mbajtur më 2 mars në Londër, pas një jave të ngjeshur të diplomacisë, e cila kulmoi me një takim të shoqëruar me përplasje dhe tensione mes Zelenskyt dhe Trumpit në Shtëpinë e Bardhë.

Diskutimet me tone të ashpra mes Zelenskyt dhe Trumpit para kamerave kanë tronditur liderët evropianë, meqë ndër të tjera, presidenti ukrainas është akuzuar për mungesë respekti ndaj SHBA-së, dhe që po rrezikon të gjithë “duke luajtur bixhoz me Luftën e Tretë Botërore”.

Si Starmer, ashtu edhe Macroni, i kanë bërë thirrje Trumpit që të mos braktisë Ukrainën, dhe të jetë më i ashpër me Rusinë, në vizitat që kanë zhvilluar ndaras në Shtëpinë e Bardhë një javë më parë. Këto takime janë zhvilluar para vizitës së Zelenskyt në Uashington, i cili është larguar nga SHBA-ja pa nënshkruar marrëveshjen për minerale, të cilën Trump e konsideronte shumë të rëndësishme për bashkëpunimin e mëtejshëm. Trump ka thënë pas takimit se Zelensky “nuk është gati për paqe nëse Amerika është e përfshirë në të”, dhe që “mund të kthehet kur të jetë gati për paqe”.

ursula von der leyen

Sondazh

Poll

MË SHUMË