Politike

Masakra e Likoshanit dhe Qirezit, Kurti: Përkulemi me respekt ndaj martirëve! Mosveprimi i institucioneve është padrejtësi e dyfishtë për viktimat dhe familjet e tyre

28 Shkurt 2025, 14:46 Nga N.F
Masakra e Likoshanit dhe Qirezit, Kurti: Përkulemi me respekt ndaj
Kurti

KOSOVË- Kryeministri i Kosovës, Albin Kurti ka përkujtuar sot masakrën në Likoshan dhe Qirez pas sulmit të forcave serbe. Kurti në një postim në Facebook shkruan se më 28 shkurt 1998, sulmi i forcave speciale të Serbisë, me artileri të rëndë, vazhdoi për 28 orë në fshatrat Likoshan dhe Qirez. Ai theksoi se pas sulmeve me helikopterë dhe makina ushtarake, hynë edhe forcat policore serbe.

Kurti ndau rastin e një nëne 27-vjeçare e cila u vra me armë zjari brenda dhomës së saj. Ai shrkuan se Rukie Nebihuni ishte në muajin e shtatë të shtatzënisë dhe në prehër kishte vajzën e saj 3-vjeçare kur u masakruan. Kryeministri shton se Rukies ia vranë edhe bashkëshortin Ilirin, 30 vjeçar dhe kunatin Xhemshirin, 33 vjeçar. Ai thekson se atë ditë u vranë edhe 17 civilë shqiptarë të paarmatosur.

"Sot përkujtojmë civilët shqiptarë të vrarë: Beqir Sejdiu (26), Nazmi Sejdiu (24), Bedri Sejdiu (24), Bekim Sejdiu (23), Ilir Nebihu (30), Rukie Nebihu (27 vjeç, në muajin e shtatë të shtatzënisë), Xhemshir Nebihu (33), Ibish Rama (38), Behram Fazliu (50), Ismail Behrami (30), Gani Ahmeti (46), Ahmet Ahmeti (50), Hamzë Ahmeti (44), Hilmi Ahmeti (44), Driton Ahmeti (23), Naim Ahmeti (22), Lumni Ahmeti (19), Shemsi Ahmeti (18), Basri Ahmeti (18) dhe Elhami Ahmeti (16).

Përkujtojmë dëshmorët Rexhep Rexhepi (63), Beqir Rexhepi (30), Muhamet Gjeli (70) dhe Naser Gjeli (38) që ranë në luftimet ndërmjet UÇK-së dhe policisë serbe në Drenicë”, shkruan kryeministri.

Kurti thekson se për këtë masakër nuk është bërë drejtësi as nga prokuroria ndërkombëtare pas çlirimit dhe as e shtetit pas shpalljes së pavarësisë.

“Gjatë këtyre 27 viteve, shumë dëshmitarë kanë ndërruar jetë, duke e bërë edhe më të vështirë zbardhjen e së vërtetës. Ende ka plot të mbijetuar dhe dëshmitarë të gjallë, që presin të dëshmojnë.

Mosveprimi i institucioneve është padrejtësi e dyfishtë për viktimat dhe familjet e tyre, të cilat jetojnë me plagët e hapura dhe mungesën e përgjegjësisë. Përkulemi me respektin më të thellë ndaj të gjithë burrave e grave që ranë në rrugën tonë të gjatë për liri dhe Republikë. Lavdi dëshmorëve dhe martirëve të Likoshanit e Qirezit! I përjetshëm qoftë kujtimi për ta!”, shkruan Kurti. 

Masakra e Likoshanit dhe Qirezit, Kurti: Përkulemi me respekt ndaj

kurti masakra e likoshanit dhe qirezit

Sondazh

Poll

MË SHUMË