Bota

Akuzohen se janë pjesë e një organizate terroriste, katër persona të arrestuar në Shkup dhe Gostivar

Pas kallëzimit penal nga Ministria, prokuroria për ndjekjen e krimit të organizuar dhe korrupsionit tashmë ka marrë masa për këtë rast ndërsa të dyshuarit janë në paraburgim.

24 Janar 2025, 22:45 Nga r.ll
Akuzohen se janë pjesë e një organizate terroriste, katër
foto ilustruese

SHKUP- Policia e Maqedonisë së Veriut ka arrestuar katër persona pasi akuzohen se janë pjesë e një organizate terroriste. Arrestimet e tyre kanë ardhur pas kontrolleve të ushtruara nga policia maqedonase në pesë lokacione në Shkup dhe Gostivar, ku dyshohet se ishin krijuar celula terroriste me ideologjinë e ISIS.

“Synimi i anëtarëve të celulës terroriste ishte kryerja e aktit terrorist kundër objektivave civile ose të ashtuquajtura objektiva të buta, gjegjësisht objekteve publike në vend, me qëllim të krijimit të ndjenjës së pasigurisë ose frikës tek qytetarët. Për të arritur qëllimin e tij, i akuzuari i parë ka krijuar disa grupe në rrjetin social Telegram, në të cilat shpërndante materiale propagandistike të marrë dhe të përkthyer më parë të ISIS-it duke rekrutuar anëtarë të ri”, thuhet në njoftimin e Ministrisë së Brendshme të Maqedonisë së Veriut, sipas mediave vendase. 

Pas kallëzimit penal nga Ministria, prokuroria për ndjekjen e krimit të organizuar dhe korrupsionit tashmë ka marrë masa për këtë rast ndërsa të dyshuarit janë në paraburgim.

“Duke pasur parasysh se janë plotësuar kushtet ligjore, prokurori publik në fjalë ka dorëzuar propozime te gjykatësi i procedurës paraprake në Gjykatën Themelore Penale në Shkup për caktimin e masës së paraburgimit për të gjithë të dyshuarit. Gjykatësi ka pranuar propozimet dhe të dyshuarve ua ka caktuar masën e paraburgimit prej 30 ditë”, thuhet në reagimin e tyre. Gjatë kontrollit të kryer nga policia në prani të prokurorit kompetent publik, te të gjithë të dyshuarit janë gjetur pushkë automatike, pistoleta, pajisje kompjuterike dhe telefona, të cilët do t’i nënshtrohen ekspertizës së mëtejshme.

maqedonia e veriut

Sondazh

Poll

MË SHUMË