Bota

Dhjetëra të vrarë nga sulmet izraelite në Gazë ndërsa nisin bisedimet për armëpushim

Ky sulm e çon numrin e viktimave në 62 gjatë 24 orëve të fundit, thanë autoritetet shëndetësore palestineze.

4 Janar 2025, 15:49 Nga E. D
Dhjetëra të vrarë nga sulmet izraelite në Gazë
foto ilustruese

GAZA- 12 persona mbetën të vrarë si pasojë e një sulmi ajror izraelit në qytetin e Gazës të shtunën në mëngjes, njoftuan mjekët palestinezë, ndërsa ndërmjetësuesit në Katar, nisën një përpjekje të re për një marrëveshje armëpushimi.

Ky sulm e çon numrin e viktimave në 62 gjatë 24 orëve të fundit, thanë autoritetet shëndetësore palestineze. Banorë dhe mjekë thanë se së paku 14 vetë kishin qenë në banesën e familjes Al-Ghoula kur ndodhi sulmi në orët e para të mëngjesit. Një dëshmitar tha për agjencinë e lajmeve Reuters se shumica e viktimave ishin gra dhe fëmijë. Deri tani nuk ka patur një deklaratë nga ushtria izraelite lidhur me ngjarjen.

Ushtria tha në një deklaratë të shtunën se kishte vazhduar operacionet këtë javë në qytetin Beit Hanoun në skajin verior të rajonit, ku ushtria ka vepruar prej tre muajsh dhe se kishte shkatërruar një kompleks ushtarak që ishte përdorur nga Hamasi.

Shtimi i operacioneve ushtarake izraelite dhe rritja e numrit të palestinezëve të vrarë gjatë ditëve të fundit ndodh ndërsa janë ripërtërirë përpjekjet për arritjen e një armëpushimi për t’i dhënë fund luftës 15-mujore dhe për kthimin e pengjeve izraelite, përpara se Presidenti i zgjedhur i Shteteve të Bashkuara, Donald Trump të marrë detyrën më 20 janar.

Negociatorët e Izraelit shkuan të enjten në Doha, për të rifilluar bisedimet e ndërmjetësuara nga Katari dhe Egjipti. Administrata e Presidentit Joe Biden, e cila po ndihmon në bisedime, i bëri thirrje Hamasit të premten që të pranojë një marrëveshje. Hamasi deklaroi se ishte i angazhuar për arritjen e një marrëveshjeje, por mbetet e paqartë se sa pranë arritjes së saj janë palët./VOA

lufta ne gaz

Sondazh

Poll

MË SHUMË