Politike

Gjikuria tha se u transformua lista e zgjedhësve në Himarë, Tavo: I keqardhur për reagimin tënd

Më tej, Tavo ripërsërit ftesën Gjikurisë që të jetë nënkryetari i tij në bashkinë e Himarës. 

5 Gusht 2024, 20:06 Nga I.A
Gjikuria tha se u transformua lista e zgjedhësve në Himarë, Tavo:
Vangjel Tavo

HIMARË- Kryetari i zgjedhur i Bashkisë Himarë, Vangjel Tavo ka komentuar postimin e rivalit të tij në zgjedhje Petro Gjikuria. Gjikuria në reagimin e tij publik pas rezultatit të zgjedhjeve, deklaroi se transformua lista e zgjedhësve në Himarë. Tavo thekson se është i keqardhur nga reagimi i Gjikurisë për rezultatin e zgjedhjeve. Tavo po ashtu ka dekalruar se ata votues me karta të skaduara janë votues të të dyve. Më tej, Tavo ripërsërit ftesën Gjikurisë që të jetë nënkryetari i tij në bashkinë e Himarës. 

Postimi i Plotë:

I dashur Petro, Sot Himara kishte një arsye të madhe për t’u gëzuar sepse ishte ajo fituesja e 4 gushtit, sikurse edhe unë e kisha dhe e kam zemrën plot nga mesazhet e pafundta të urimeve nga shumë e shumë banorë të Himarës, e mbështetës brenda e jashtë vendit. Por, një shkëndijë më shumë e këtij gëzimi ishte edhe telefonata juaj e urimit e para pak orëve. E vlerësova shumë dhe e pranova sinqerisht si një akt qytetarie dhe si sjellje e një njeriu me mendësi të hapur perëndimore, por, pa e mohuar, e prita edhe me shpresën se po më telefonoje për të pranuar ftesën time publike për t’iu bashkuar programit tonë të drejtimit të Bashkisë Himarë në pozicionin e zëvendëskryetarit.

Por, pritshmëria ime e lartë ndaj teje zgjati vetëm pak e tani jam i keqardhur për reagimin tënd, a thua se Himara është një fushë betejash ku përballen ushtri armike dhe jo alternativa politike dhe qytetare, si në të gjithë Shqipërinë demokratike.
Të kujtoj i dashur, se këtë herë në Himarë pati më shumë votues se sa vjet, kur qeveria e kishte shtyrë afatin e skadimit të kartave të identitetit. Dhe rezultati është ky që është, produkt i vullnetit të lirë të qytetarëve, ndërkohë që nuk pati se as nuk kishte si të kishte mijëra zgjedhës të cilëve iu mohua e drejta, pasi koha e votimeve 99.99% ka ikur me diktaturën.
Po, e vërtetë! Pati disa dhjetra qytetarë, votues të tutë dhe të mitë, që nuk mundën të votonin për shkak të dokumentave të skaduar të idenditetit, për të cilët kush e dëgjoi thirrjen e ministrisë së brendshme dhe e rinovoi mundi edhe të votonte normalisht.

Prandaj i dashur Petro, unë të përsëris ftesën time që të mos largohesh andej nga erdhe, po të qëndrosh bashkë me mua në krahun tim, në pozicionin e nënkryetarit të bashkisë. Do të isha shumë i nderuar nëse do ta pranoje propozimin tim, ndërsa në rast të kundërt të uroj megjithë zemër rrugë të mbarë për Amerikë dhe suksese atje. Por në të gjitha rastet le të mbetemi në kontakt dhe për Himarën mos u shqetëso, sepse është në duart të sigurta dhe ka mbështetjen e padiskutueshme të Edi Ramës dhe Partisë Socialiste. Sinqerisht Vangjel Tavo

Nga numërimi i 36 kutive të votimit, Tavo ka siguruar 5022 vota ndërsa Petro Gjikuria 3545 vota. 8678 zgjedhës ushtruan të drejtën e votës ditën e djeshme për të zgjedhur kryetarin e ri të bashkisë së Himarës, mes kandidatit socialist Vangjel Tavos dhe Petraq Gjikurisë, i cili kandidonte nën siglën “Bashkë Fitojmë’  të partive opozitare.

vangjel tavo petro gjikuria

Sondazh

Poll

MË SHUMË