Sport

Champions League/ Rruga drejt finales së 'Wembley', sa e vështirë aq dhe interesante

Manchester City - Real Madrid, përplasje “brirësh” për hegjemoni kontinentale…

15 Mars 2024, 13:46 Nga DOSJA

ZVICER - Në Nyon të Zvicrës është hedhur shorti i fazës çerekfinale të Champions League, ku janë përcaktuar duele vërtet spektakolare.

Kështu kampionët në fuqi të Evropës, Manchester City do të përballen me 14 herë kampionët e kontinentit, Real Madridin, në një duel që pritet të jetë vërtet i zjarrtë, ku ka duele individuale tepër interesante.

Si ai mes Haaland dhe Vinicius e sidomos ai mes Pep Guardiolës dhe Carlo Ancelotti, me trajnerin katalanas që sigurisht ka motivim të dyfishtë për të eliminuar ‘los blancos’. Për më tepër, Real Madridi do të kërkojë të marrë revanshin ndaj ‘Citizens’ për eliminimin në gjysmëfinale të sezonit të kaluar

Sfidë tjetër interesante është edhe ajo mes Paris Saint Germainit dhe Barcelonës. Është ky një duel që të kthen pas në vitin 2017, kur skuadra katalanase realizoi arritjen historike teksa përmbysi humbjen 4-0 të pësuar në Paris, duke fituar me rezultatin 6-1 në Spanjë.

Champions League/ Rruga drejt finales së 'Wembley', sa e

Nuk mund të anashkalohet as sfida mes Arsenalit dhe Bayern Munichut, me skuadrën bavareze që sheh Champions League, si shansin e vetëm për të shpëtuar sezonin, ndërkohë që Arsenali po përjeton një formë të mirë në kampionat.

Sfida e fundit çerekfinale është ajo që vë përballë Atletico Madridin, 3 herë finalist i Champions League dhe Borussia Dortmundit, fitues i kompeticionit në 1997.

Ndërkaq janë përcaktuar edhe çiftet gjysmëfinaliste, ku fituesja e Real Madrid -Manchester City do të përballet me fituesen e çiftit Arsenal - Bayern, ndërsa fituesja e çiftit PSG - Barcelona do të përballet me fituesin e Atletico Madrid - Borussia Dortmund.

B.T (Dosja.al)